Tenisny kort, plaž i aranžareja. Jak pad Niaśvižam źbirajucca pierarabić staražytny park siadziby Rdułtoŭskich
Siadziba Rdułtoŭskich u ahraharadku Snoŭ doŭhija hady zastavałasia adnoj z samych zakrytych siadzib Niaśvižskaha rajona. U pałacava-parkavym kompleksie XIX stahodździa raźmiaščaŭsia vajskovy špital, tamu starońnich asob na terytoryju nie puskali. Ale paśla pierachodu da pryvatnaha inviestara sprava narešcie dajšła i da maštabnych pieramien u navakolnym parku. Vydańnie Domovita.by pahladzieła, jak źmienicca staražytny majontak.
Na sajcie Niaśvižskaha rajvykankama źjaviłasia paviedamleńnie pra hramadskija abmierkavańni płana kiravańnia hetaj zialonaj zonaj na najbližejšyja 10 hadoŭ. Miarkujučy pa schiemach, zamiest zaraśnikaŭ vakoł pałaca źjavicca pryhožaja łakacyja dla adpačynku ź plažam, tenisnym kortam i ŭłasnaj aranžarejaj.
Ad zakrytaj terytoryi da turystyčnaha centra
Pałacava-parkavy ansambl u Snovie źjaviŭsia ŭ 20‑ch hadach XIX stahodździa dziakujučy ŭładalniku tutejšych ziemlaŭ Kazimiru Rdułtoŭskamu. Pa prajekcie architektara Branisłava Tyčeckaha tut uźviali adzin z najbujniejšych kłasičnych pałacaŭ u Biełarusi, a vakoł raźbili prastorny piejzažny park. Hałoŭnym honaram majontka była składanaja vodnaja sistema na race Snoŭka: ź sietkaj kanałaŭ, sažałkami i dvuma štučnymi astravami, kudy viali ažurnyja piešachodnyja mościki.
Paśla ŭsich uzrušeńniaŭ XX stahodździa pałac źmianiŭ status i na doŭhija hady staŭ zakrytym vajskovym špitalem. Za hłuchim pierymietram i KPP staražytnyja alei ź viekavymi jasieniami i klonami pastupova ździčeli, choć jašče ŭ 1987 hodzie park płoščaj 10,52 hiektara aficyjna pryznali bataničnym pomnikam pryrody miascovaha značeńnia. Sam kompleks uklučyli ŭ śpis historyka-kulturnych kaštoŭnaściaŭ, ale zvyčajnyja padarožniki ŭbačyć pałac mahli chiba što tolki zdalok.
Pierałomny momant nastupiŭ paśla taho, jak zapuścieły majontak vykupiŭ pryvatny inviestar — «Pieršaja kampanija Błahadarava Ja.A.» Naprykancy 2025 hoda Niaśvižski rajvykankam pieradaŭ firmie kiravańnie ŭsim parkavym kompleksam.
Kab pryvieści zialonuju zonu ŭ paradak i adkryć jaje dla turystaŭ, spatrebiłasia vyznačyć rehłamient usich budučych rabot. Dla hetaha navukoŭcy z Nacyjanalnaj akademii navuk Biełarusi padrychtavali padrabiazny dziesiacihadovy płan raźvićcia terytoryi, jaki dniami i vystavili na hramadskaje abmierkavańnie.
Korty, plaž i kapitalnaja aranžareja
Pa raźlikach śpiecyjalistaŭ, pad novyja pabudovy, placoŭki i darožki pojdzie kala 45 sotak. Heta mienš za piać pracentaŭ terytoryi, tak što praktyčna ŭvieś histaryčny park zastaniecca cichaj zialonaj zonaj dla špacyrach. Raboty razhornucca tolki na zapuściełych palanach i kala bieraha sažałki, dzie i abstalujuć asnoŭnyja miescy dla adpačynku.
Na svabodnych učastkach źbirajucca abstalavać adrazu niekalki novych łakacyj:
- kapitalny budynak aranžarei płoščaj 300 kvadratnych mietraŭ;
- abharodžany tenisny kort na 500 kvadratnych mietraŭ;
- šmatfunkcyjanalnaja spartyŭnaja placoŭka na 500 kvadrataŭ i dziciačaja hulniavaja zona na 200 kvadrataŭ;
- uparadkavany piasčany plaž na bierazie sažałki płoščaj 200 kvadratnych mietraŭ;
- aŭtamabilnaja stajanka, raźličanaja prykładna na 20 mašyn.
Akramia spartyŭnych placovak, na schiemach uparadkavańnia raźmieščanyja zialony łabirynt, altanki, ratonda, piešachodnyja mastki i draŭlanyja pirsy. Staražytnaja vodnaja sistema siadziby z dvuma nasypnymi astravami i sietkaj kanałaŭ budzie zachavanaja: sažałki paetapna rasčyściać, a bierahavuju liniju ŭmacujuć.
Novyja alei, padśvietka i dostup praz KPP
Prahułačnuju častku parku płanujuć całkam adaptavać dla kamfortnaha adpačynku. Zamiest raźbitych darožak źjavicca sietka alej z roznymi typami brukavańnia:
- častku centralnych i piejzažnych maršrutaŭ adsypluć hranitnaj i cahlanaj kroškaj;
- hałoŭnyja piešachodnyja zony i prajezdy vykładuć brukam;
- spartyŭnyja i hulniavyja placoŭki zabiaśpiečać humavym pokryvam i štučnaj travoj.
Uzdoŭž asnoŭnych alej zmantujuć lichtary, a pad ziamlu schavajuć nieabchodnyja kamunikacyi — vadapravod, kanalizacyju, ciepłatrasu i hazazabieśpiačeńnie.
Stan starych jasieniaŭ i lip praciahnuć kantralavać, prybirajučy tolki avaryjnyja haliny i suchija stvały. Parter pierad hałoŭnym fasadam dapoŭniać hazonami i žyvymi aharodžami, a na svabodnych učastkach zakładuć novy pładovy sad.
Pa raźlikach ekołahaŭ, abnoŭleny park zmoža prymać da 4080 čałaviek u sutki. Dostup na terytoryju pakul zastajecca stroha praz budynak kantrolna-prapusknoha punkta. Pry hetym kiraŭničaja kampanija pakinuła za saboj prava časova abmiažoŭvać uvachod, kali nahruzka na navakolnaje asiarodździe akažacca zanadta vysokaj.
U Niaśvižskim zamku dla turystaŭ adkryli padziemnyja chady i bastyjony
Źjaviŭsia suśvietny interaktyŭny servis ab zamkach, pałacach i krepaściach. Biełaruskija tam taksama jość
Karciny ź biełaruskaj siadziby Radziviłaŭ viarnuli, ale ŭ Polšču
U Biełarusi vyrašyli źniščyć lubyja prajavy «polskaści»? Ułady ciškom rychtujuć hłabalnuju začystku Dziaržaŭnaha śpisu pomnikaŭ
U Niaśvižy ź vialikaj źnižkaj pradajuć stohadovuju viłu polskich čynoŭnikaŭ. Za što jaje chvalili mižvajennyja krytyki?
Ciapier čytajuć
«Viedajecie, Łukašenka nie prezident». Jany tak uśmichnulisia, kiŭnuli». Departavany z Hruzii Leŭ Michiejeŭ raskazaŭ, jak ź im abychodzilisia ŭ Armienii33
Kamientary