Źjaviŭsia suśvietny interaktyŭny servis ab zamkach, pałacach i krepaściach. Biełaruskija tam taksama jość
U internecie źjaviŭsia novy interaktyŭny servis Castle Map, jaki sabraŭ na adnoj karcie bolš za 7700 zamkaŭ, krepaściaŭ i pałacaŭ sa 141 krainy. U mižnarodny atłas trapili i biełaruskija pomniki — usiaho 39 abjektaŭ, piša Domovita.by.
Servis stvaryŭ raspracoŭščyk, viadomy pad nikam Flightmussy. U bazu traplajuć nie ŭsie zapar histaryčnyja pabudovy, a tolki tyja, dla jakich jość dakładnyja kaardynaty, fatahrafii i apisańni ŭ niekalkich moŭnych raździełach Vikipiedyi. Na momant publikacyi na karcie było 7738 abjektaŭ.
Najbolš zamkaŭ i inšych padobnych pomnikaŭ naličvajecca ŭ Ispanii — kala 600. U pieršuju dziasiatku taksama ŭvachodziać Francyja, Hiermanija i Vialikabrytanija. Adzinaj azijackaj krainaj u hetym topie stała Japonija.
Abjekty na karcie padzielenyja na niekalki katehoryj: zamki i pałacy, abarončyja krepaści i forty, a taksama ruiny.
Asobny rejtynh pakazvaje papularnaść histaryčnych abjektaŭ. Jana vyznačajecca na asnovie cikavaści karystalnikaŭ i kolkaści zhadak u internecie.
Najvyšejšaje miesca siarod biełaruskich pomnikaŭ zaniała Bresckaja krepaść — 285‑ie ŭ suśvietnym rejtynhu. Pavodle stvaralnikaŭ karty, jana papularniejšaja za 92% usich abjektaŭ, uklučanych u atłas. Za apošnija dva miesiacy infarmacyju pra krepaść zapytvali amal 10 tysiač razoŭ.
Paśla Bresckaj krepaści ŭ biełaruskim śpisie iduć Niaśvižski zamak i Stary zamak u Hrodnie.
Usiaho na kartu Biełarusi naniesienyja 24 zamki, 2 krepaści, 5 pałacaŭ i 8 ruin. Dla 33 pomnikaŭ paznačanyja dakładnyja daty ich zasnavańnia — ad X stahodździa da siaredziny XX stahodździa. Najbolšaja kolkaść abjektaŭ u śpisie datujecca XVI stahodździem: da hetaha pieryjadu adnosiacca 10 pomnikaŭ.
Karta taksama pakazvaje hieahrafičnaje raźmierkavańnie biełaruskich zamkaŭ i pałacaŭ. Najbolšaja ich kancentracyja nazirajecca vakoł Minska: u radyusie 100 kiłamietraŭ ad stalicy znachodziacca 11 pabudoŭ. Značnaja hrupa histaryčnych abjektaŭ raźmieščanaja i ŭ rajonie Bresta.
Adlehłaść pamiž samym paŭnočnym abjektam u Ikaźni i samym paŭdniovym u Davyd-Haradku składaje amal 400 kiłamietraŭ.
«Pačynaju razumieć ludziej, jakija žyvuć u turystyčnych haradach i nie lubiać zajezdžych». Što turystyčny bum prynosić Hrodnu
U Minkulcie raskazali, jakija pałacy i siadziby buduć adnaŭlać najbližejšym časam
Zamki ŭ Livanie i savany ŭ Paŭdniovym Sudanie ŭklučyli ŭ śpis suśvietnaj spadčyny pad pahrozaj
Apublikavali novy rejtynh najbolš papularnych historyka-architekturnych pomnikaŭ Biełarusi
Mir i Niaśviž pieranasyčanyja turystami. Va ŭsim vinavatyja błohiery i sacyjalnyja sietki
U Lachavičach pachvalilisia kopijaj histaryčnaha zamka, jakaja musić pryciahnuć turystaŭ — čatyry budki bolš nahadvajuć prybiralni
Kamientary
A tut užo sprava samich biełarusaŭ - parupicca, kab unieści našyja pomniki z fota ŭ Vikipiedyju. Nichto akramia samich biełarusaŭ heta nie zrobić.
Źviestki ŭ Vikipiedyju moža ŭnosić luby čałaviek.
Biełarusy! Davajcie rabić našu biełaruskuju Vikipiedyju razam!
Kožny dadaść pa abzacu i pa niekalki fotak, ci stvoryć artykuł pra toje, pra što jašče niama artykuła i my ŭsie razam budziem małajcy!
NN, trymajcie ideju na artykuł pra mif Čornaj Rusi. Niekali tema była častkova zakranutaja ŭ adnym z artykułaŭ. Chacia varta było b napisać pra mif nie tolki hetaj kalarovaj Rusi.