Łukašenka: «Ja vielmi časta sadžusia za rul i jezdžu pa horadzie»

Minsk pavinien pieratvarycca ŭ adzin ź lepšych sučasnych suśvietnych centraŭ, zajaviŭ 29 červienia na naradzie z aktyvam stalicy Alaksandr Łukašenka.

Havoračy pra novaha staršyniu Minharvykankama Mikałaja Ładućku, Łukašenka pryznaŭsia, što pytańnie z pryznačeńniem było dla jaho składanym: «Zaŭsiody niaprosta padbirać kandydaturu kiraŭnika rehijonu, ale hetaja pasada na asablivym rachunku dziela maštabaŭ i značnaści stalicy… Tamu ja doŭha pryhladaŭsia da Mikałaja Alaksandraviča Ładućki».

Jak paviedamiła pres‑słužba prezidenta, Łukašenka adznačyŭ, što tolki 30% minčukoŭ uvažajuć, što praca haradskich uładaŭ z nasielnictvam palepšała. Pałova nie zadavolena vyrašeńniem svaich pytańniaŭ u harvykankamie i administracyjach rajonaŭ. Łukašenka papiaredziŭ, što za ciahaninu, abyjakavaść, biezadkaznaść i hrubaść čynoŭnika zapytańnie budzie vielmi žorstkim: «Ludzi hadami nie mohuć dastukacca da vas sa svaimi pytańniami, ale, jak tolki ŭmiašajecca prezident abo Administracyja prezidenta, usie pieraškody akazvajecca lohka ŭstaranić. Vy pačyścicie, padfarbujecie tam, dzie ja mahu ŭbačyć, a toje, što robicca ŭ dvarach, na nie centralnych vulicach horada, u addalenych rajonach, vas užo nie cikavić. Raju nie rassłablacca:

ja vielmi časta sadžusia za rul i jezdžu pa horadzie. I nie daj boh ubaču dzieści biesparadak, navat u samych addalenych kutkach Minska».

Biełaruski kiraŭnik vykazaŭ niezadavalnieńnie tym, što adbyvajecca ŭ śfiery biźniesu. «Ja ŭžo stamiŭsia ad pastajannych skarhaŭ pradprymalnikaŭ», — skazaŭ jon.

Łukašenka zapatrabavaŭ spynić u stalicy machinacyi z aŭkcyjonami ziamli: «Spynicie chimičyć z aŭkcyjonami, kali stvarajucca ŭsie ŭmovy dla taho, kab ziamlu abo ofis atrymaŭ «svoj» čałaviek, i, napeŭna, dla čynoŭnika niebieskaryśliva».

Jon papiaredziŭ Ładućku i ŭvieś aktyŭ horada, što da novaha hoda situacyja ŭ Minsku pavinna być pierałamana:

«Adna skarha — i miery buduć prymać užo inšyja ludzi».

Pieršačarhovaj zadačaj źjaŭlajecca adnaŭleńnie dynamičnaha i efiektyŭnaha raźvićcia pramysłovaha kompleksu, bo Minsk «apynuŭsia na pieradapošnim miescy ŭ krainie pa tempach pramysłovaj vytvorčaści». Kiepska vyrašajecca zadača nasyčeńnia spažyvieckaha rynku ajčynnymi tavarami. Apošnimi hadami skłałasia niehatyŭnaja tendencyja rostu kolkaści nizkarentabielnych i stratnych arhanizacyj.

Łukašenka vykazaŭ niezadavalnieńnie tym, što letaś pa tempach rostu inviestycyj u asnoŭny kapitał siarod rehijonaŭ krainy Minsk zaniaŭ apošniaje miesca, i sioleta stalica zastajecca ŭ liku tych, chto adstaje.

Jon aburyŭsia tym, što ŭ horadzie dahetul nie naładžana dziejsnaja sistema kantrolu za metavym vykarystańniem vydzielenych ziamielnych učastkaŭ. U 2009 hodzie z‑za parušeńniaŭ ziamielnaha zakanadaŭstva staličny biudžet niedaatrymaŭ bolš za 15 młrd. rubloŭ.

Łukašenka źviarnuŭ uvahu na nieabchodnaść uzmacnieńnia kantrolu za jakaściu i terminami budaŭnictva žylla.

Za pieršyja čatyry miesiacy hetaha hoda Minsk nie tolki nie daciahnuŭ da zapłanavanych abjomaŭ, ale i pabudavaŭ mienš, čym hod tamu. Vybaračnaja pravierka ŭstanaviła šmatlikija fakty pryjomki ŭ ekspłuatacyju niedabudavanych damoŭ. Łukašenka padkreśliŭ, što biaździejańnie ŭ naviadzieńni paradku ŭ žyllovym budaŭnictvie ciahnie pramy padryŭ aŭtaryteta ŭłady i budzie rasceńvacca jak »sabataž z boku adpaviednych kiraŭnikoŭ z usimi mahčymymi vynikami».

Nie mienš narakańniaŭ vyklikaje praca žyllova‑kamunalnaj haspadarki. «Heta samaja balučaja tema dla minčan: letaś kolkaść skarhaŭ uzrasła amal na 30%, — skazaŭ Łukašenka. —

Nadzialeńnie ŽESaŭ pravami jurydyčnaj asoby pryviało nie da pavyšeńnia jakaści pasłuh, jak było abiacana, a da ŭzmacnieńnia biurakratyzacyi i bieskantrolnaści hetych arhanizacyj».

Usio bolšuju vastryniu i niezadavalnieńnie ludziej vyklikaje transpartnaja prablema. Zatory na darohach, pierahružanyja aŭtobusy, tralejbusy i tramvai, nieraźbiarycha z parkoŭkami transpartu, niedachop aŭtastajanak i haražoŭ — usio heta patrabuje »samaj pilnaj uvahi miascovych uładaŭ i aptymalnaha vyrašeńnia prablem». Taksama nieabchodna paskoryć vyrašeńnie prablemy padtapleńnia daždžavoj vadoj asobnych terytoryj horada. »Nienarmalna, što apošnim časam kožny mocny doždž pieratvarajecca dla nas u stychijnaje biedstva», — skazaŭ Łukašenka.

Jon źviarnuŭ uvahu na toje, što ŭ 2009 hodzie i sioleta adbyŭsia rost kolkaści złačynstvaŭ. «Z takoj situacyjaj mirycca nielha, kali my pastavili sabie na mecie pieratvaryć Minsk va ŭzornuju jeŭrapiejskuju stalicu», — skazaŭ Łukašenka, zapatrabavaŭšy aktyvizavać pracu pa baraćbie sa złačynnaściu.

Kolkaść karupcyjnych złačynstvaŭ u stalicy za minuły hod uzrasła na tracinu. 55% ad ahulnaj sumy chabaru, što vymahajecca, prypadaje na stalicu. «Nie nakidvajcie sami sabie piatlu na šyju», — zajaviŭ biełaruski kiraŭnik.

Adnosna horadabudaŭničaj palityki Łukašenka adznačyŭ, što jana ŭžo vyznačana i zastajecca niaźmiennaj: «My pavinny zabudoŭvać žyłyja kvartały, a pramysłovyja zony treba vynosić jak maha chutčej za miežy Minska. My nie budziem pieranasialać Minsk i davodzić da taho, kab u stalicy pražyvała pałova nasielnictva krainy».

• 0
• 0
• 0
• 0
• 0
• 0
• 0
• 0