Biełaruska Karyna Kazłoŭskaja zavajavała na čempijanacie Polščy pa stralbie z łuka siem załatych miedaloŭ. Bolš prosta nie było
Biełaruskaja łučnica z polskim hramadzianstvam Karyna Kazłoŭskaja zavajavała siem załatych miedaloŭ na čempijanacie Polščy pa stralbie z łuka, jaki prachodziŭ u Biełastoku. Jana pieramahła na dystancyjach 30, 50, 60 i 70 mietraŭ, a taksama ŭ źmiešanym, kamandnym i ahulnym žanočym zalikach, piša «Radyjo Svaboda».
Kazłoŭskaja dziakujučy svajmu fienamienalnamu pośpiechu ŭvajšła ŭ historyju polskaj stralby z łuka. Jana stała pieršaj spartsmienkaj, jakaja zdoleła vyjhrać usie siem vidaŭ prahramy čempijanatu, atrymaŭšy zołata ŭ 100% spabornictvaŭ.
Letaś Karyna ŭžo była čempijonkaj Polščy. Sioleta ž pieramoh i jaje kłub «Łučnik» z horada Žyviec, za jaki jana vystupaje.
Pavodle słoŭ spartsmienki, letaś joj davodziłasia pracavać u papularnaj polskaj sietcy kramaŭ «Žabka», kab zarablać na žyćcio i adnačasova praciahvać treniroŭki. Sioleta nieabchodnaść u dadatkovaj pracy adpała: jaje treniroŭki i vystupleńni ciapier padtrymlivaje kampanija InPost, jakaja zajmajecca dastaŭkaj pasyłak.
U vieraśni 2027 hoda Kazłoŭskaja płanuje pajechać u Kałumbiju na čempijanat śvietu. Tam buduć razyhryvacca licenzii na ŭdzieł u Alimpijskich hulniach 2028 hoda. A jašče sioleta jaje čakaje Kubak Polščy ŭ Žešuvie.
Karyna Kazłoŭskaja — nieadnarazovaja čempijonka Biełarusi pa stralbie z łuka. Na Alimpijadzie ŭ Tokia ŭ 2021 hodzie jana razam ź biełaruskaj kamandaj zaniała čaćviortaje miesca.
31 maja 2022 hoda spartsmienka paviedamiła, što pakinuła biełaruskuju zbornuju i vyjechała z krainy. Jana tłumačyła svajo rašeńnie praciahłym stresam, źviazanym z Alimpijadaj, pandemijaj, vybarami 2020 hoda, palityčnymi represijami ŭ Biełarusi i vajnoj va Ukrainie. Pavodle jaje słoŭ, dziela sportu jana doŭhi čas maŭčała i ciarpieła prynižeńni, pahrozy, zapałochvańnie i ŭzmacnieńnie kantrolu.
U 2020 hodzie Kazłoŭskaja razam ź dziasiatkami inšych biełaruskich spartsmienaŭ padpisała list za sumlennyja vybary. Paśla pierajezdu ŭ Polšču jana pačała vystupać za polskuju zbornuju. U červieni 2023 hoda ŭ składzie nacyjanalnaj kamandy Polščy Karyna zavajavała bronzavy miedal na Kubku Jeŭropy.
U lutym 2025 hoda, amal praz try hady paśla pierajezdu ź Biełarusi, Kazłoŭskaja atrymała polskaje hramadzianstva.
Brat biełaruskaj karalevy pryhažości trapiŭ u reanimacyju ŭ Azierbajdžanie2
Brat biełaruskaj karalevy pryhažości trapiŭ u reanimacyju ŭ Azierbajdžanie
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary