Aficyjna stvaryli Akademiju intelektualnych technałohij. Čamu i jak tam buduć vučyć?
Alaksandr Łukašenka padpisaŭ ukaz ab stvareńni Akademii intelektualnych technałohij. Novaja ŭstanova pačnie rychtavać śpiecyjalistaŭ z 1 vieraśnia 2027 hoda. Navučańnie budzie vieścisia pa kirunkach pryrodaznaŭčych navuk, pramysłovych i ličbavych technałohij, a taksama inšych pierśpiektyŭnych śpiecyjalnaściach.
Dla pastupleńnia ŭ akademiju praduhledžany asobny paradak adboru ŭ formie respublikanskaha konkursu. Udzielničać u im zmohuć vypuskniki škoł, navučency kaledžaŭ, studenty VNU, śpiecyjalisty pradpryjemstvaŭ i navukoŭcy. Papiarednija etapy konkursu buduć prachodzić u Minsku, abłasnych centrach i bujnych haradach.
Kandydatam treba budzie pradstavić ułasnuju ideju, raspracoŭku, vynachodnictva abo racyjanalizatarskuju prapanovu.
Tyja, chto projdzie papiaredni adbor, zmohuć udzielničać u finalnym etapie. Jon budzie prachodzić niepasredna ŭ akademii ŭ farmacie praktyčnaha intensivu. Udzielniki buduć vykonvać indyvidualnyja i hrupavyja zadańni, publična abaraniać svaje prajekty i prachodzić unutranaje ŭstupnaje vyprabavańnie.
Da navučańnia płanujuć pryciahnuć viadučych navukoŭcaŭ i vykładčykaŭ, a taksama kiraŭnikoŭ i śpiecyjalistaŭ pradpryjemstvaŭ, jakija majuć značnyja dasiahnieńni ŭ navucy, inavacyjach i vytvorčaści. Navučalnyja prahramy možna budzie źmianiać z ulikam patreb kankretnych halin. Studenty taksama zmohuć samastojna vybirać śpieckursy, sumiežnuju śpiecyjalizacyju abo śpiecyjalnaść.
Častka navučańnia budzie prachodzić niepasredna na pradpryjemstvach. Studenty buduć pracavać nad realnymi vytvorčymi zadačami, zajmacca prajektnaj i navukova-daśledčaj dziejnaściu samastojna abo ŭ hrupach. Miarkujecca, što vynikam stanuć kankretnyja pradukty i raspracoŭki, jakija možna budzie ŭkaraniać u ekanomicy abo kamiercyjalizavać.
Paśpiachova aprabavanyja ŭ akademii ekśpierymientalnyja adukacyjnyja prahramy i sučasnyja mietady navučańnia płanujuć vykarystoŭvać i ŭ inšych ustanovach adukacyi.
Paśla zakančeńnia navučańnia studenty pavinny buduć zdać dziaržaŭny ekzamien, a taksama abaranić startap-prajekt abo prykładnuju navukova-daśledčuju rabotu.
Za dziejnaściu akademii budzie sačyć naziralnaja rada na čale ź ministram adukacyi. U jaje taksama ŭvojduć kiraŭniki profilnych ministerstvaŭ i viedamstvaŭ, pradstaŭniki Nacyjanalnaj akademii navuk Biełarusi i Parka vysokich technałohij.
Dekłarujecca, što stvareńnie akademii pavinna sfarmavać miždyscyplinarnaje navukova-adukacyjnaje asiarodździe, aryjentavanaje na praktyčny vynik i ciesnuju suviaź adukacyi z realnym siektaram ekanomiki.
Stała viadoma, kali možna budzie pastupać u novuju Akademiju intelektualnych technałohij
U Biełarusi moža źjavicca Akademija intelektualnych technałohij
U Akademii navuk vučać štučny intelekt kiravać raskładam haradskoha transpartu
Ministr adukacyi: Repietytaraŭ nie ŭsprymaju ad słova «zusim»
U biełaruskich škołach źmianili prahramu pa fizkultury
Ciapier čytajuć
Chto z palitviaźniaŭ vyjšaŭ na svabodu 16 vieraśnia POŬNY ŚPIS11
Kamientary