Homielskim pravaabaroncam stała viadoma pra kryminalny pieraśled supracoŭnika Mazyrskaha naftapierapracoŭčaha zavoda Jaŭhiena Viarhieja. Niekalki miesiacaŭ jon znachodziŭsia ŭ SIZA № 3 u Homieli. Jaho abvinavacili pavodle častak 1 i 2 artykuła 361‑4 Kryminalnaha kodeksa — u «sadziejničańni ekstremisckaj dziejnaści».
Jaŭhiena Viarhieja, jaki pracavaŭ načalnikam ustanoŭki katalityčnaj vytvorčaści bienzinaŭ, zatrymali jašče ŭ listapadzie abo śniežni 2025 hoda. Spačatku mužčynu ŭtrymlivali ŭ izalatary časovaha ŭtrymańnia Mazyrskaha RAUS, a zatym pieraviali ŭ SIZA № 3 u Homieli. U śledčym izalatary jon pravioŭ bolš za siem miesiacaŭ.
Pa infarmacyi pravaabaroncaŭ, abvinavačvańnie było źviazana z tym, što Viarhiej šukaŭ, atrymlivaŭ i raspaŭsiudžvaŭ infarmacyju praz manitorynhavy telehram-kanał «Biełaruski Hajun».
Pavodle apošniaj infarmacyi, Jaŭhien Viarhiej užo vyjšaŭ ź miesca źniavoleńnia i padaŭ apielacyju. Vierahodna, sud adbyŭsia i jamu pryznačyli pakarańnie ŭ vyhladzie abmiežavańnia voli. Dakładnyja padrabiaznaści spravy pakul nieviadomyja.
Da zatrymańnia Viarhiej ličyŭsia adnym z najbolš daśviedčanych supracoŭnikaŭ Mazyrskaha NPZ. Pra jaho nieadnarazova pisali halinovaja hazieta kancerna «Biełnaftachim», zavodskaja hazieta i miascovaje praŭładnaje vydańnie.
U 2022 hodzie padčas śviatkavańnia Dnia horada ŭ Mazyry, jakoje tady sumiaścili z «Dniom narodnaha adzinstva», Viarhieja ŭznaharodziła Hanarovaj hramataj Mazyrskaha rajvykankama tahačasnaja kiraŭnica rajonnaj administracyi Alena Paŭlečka. Uznaharodu jamu ŭručyli za dobrasumlennuju pracu, vysoki prafiesijanalizm i značny ŭniosak u sacyjalna-ekanamičnaje raźvićcio Mazyrskaha rajona.
Ciapier čytajuć
Ceny na kvatery ŭ «Minsk-Śviecie» padajuć, a ŭ Minsku — rastuć. Sumnyja pierśpiektyvy dla rajona?3
Kamientary