U Biełarusi ŭpieršyniu vypuścili «dyjetyčny» enierhietyk. U im amal niama kiłakałoryj
U Biełarusi ŭpieršyniu vypuścili enierhietyčny napoj ź vielmi nizkaj kałaryjnaściu. Minski zavod biezałkaholnych napojaŭ, jaki šmat hadoŭ vyrablaje enierhietyk Bizon, pašyryŭ asartymient i pradstaviŭ Bizon Light, piša vydańnie Blizko.by.
Na etykietcy novaha napoju paznačana, što jon nie źmiaščaje kałoryj, choć nasamreč jahonaja enierhietyčnaja kaštoŭnaść składaje 2 kiłakałoryi na 100 mililitraŭ. Tamu nazyvać jaho dyjetyčnym možna tolki ŭmoŭna: vykarystoŭvać enierhietyk dla pachudańnia nie varta.
Hałoŭnaje adroźnieńnie Bizon Light ad inšych biełaruskich enierhietyčnych napojaŭ — adsutnaść vuhlavodaŭ, prynamsi pavodle infarmacyi na ŭpakoŭcy. U inšych ajčynnych enierhietyčnych napojach zvyčajna źmiaščajecca ad 11 da 14 hramaŭ vuhlavodaŭ na 100 mililitraŭ, a ich kałaryjnaść składaje 40—55 kiłakałoryj. Siarod papularnych zamiežnych napojaŭ vysokaj kałaryjnaściu vyłučajecca Burn: u im 13,5 hrama vuhlavodaŭ i 56 kiłakałoryj na 100 mililitraŭ.
Zamiest cukru ŭ Bizon Light vykarystoŭvajucca padsałodžvalniki acesulfam kaliju i sukrałoza. U inšym pradukcie taho ž zavoda — Bela Cola Light — vykarystoŭvajecca bolš składanaja sumieś padsałodžvalnikaŭ: fruktoza, cykłamat natryju, acesulfam kaliju i sacharynat natryju.
Kolkaść vitaminaŭ u novym napoi takaja ž, jak u zvyčajnym Bizon. Na 100 mililitraŭ prypadaje 1,2 milihrama vitaminu Je, 2,14 milihrama vitaminu V3, abo RR, 0,24 milihrama vitaminu V6 i 18 mikrahramaŭ vitaminu V7, viadomaha taksama jak vitamin N.
Utrymańnie kafieinu składaje ad 15 da 40 milihramaŭ na 100 mililitraŭ. Pavodle techničnaha rehłamientu Mytnaha sajuza, jaho kancentracyja ŭ enierhietyčnych napojach nie pavinna pieravyšać 40 milihramaŭ na taki abjom.
Pry hetym užo niekalki hadoŭ vytvorcy nie abaviazanyja paznačać na ŭpakoŭcy dakładnuju kolkaść kafieinu. Heta vyhladaje supiarečliva, pakolki enierhietyčnyja napoi ličacca patencyjna niebiaśpiečnymi dla padletkaŭ, a ich prodaž asobam da 18 hadoŭ zabaronieny, ale infarmacyja pra asnoŭny kampanient, jaki zabiaśpiečvaje enierhietyčny efiekt, moža adsutničać.
Biełaruskija vytvorcy ŭžo vypuskali enierhietyčnyja napoi bieź niekatorych zvykłych inhredyjentaŭ. Naprykład, zvyčajny Bizon nie ŭtrymlivaje taŭrynu i raniej rekłamavaŭsia pad łozunham «Enierhija. Siła. Biez taŭrynu». A Viciebskaje abłspažyŭtavarystva na svaim filijale va Ušačach vyrablaje napoj Energy Prolong biez kafieinu. Zamiest jaho vykarystoŭvajecca suchi ekstrakt leŭziei, jakuju taksama nazyvajuć maralim koraniem.
Pavodle źviestak Blizko.by, u Biełarusi enierhietyčnyja napoi vyrablajuć prynamsi vosiem kampanij. Siarod ajčynnych marak — Atom, Bizon, Bizon Light, Ultimo, Slam, Dynami, Energy Prolong, «Urahan», Flash Up, Level, No Limit i Nosorog. Niekatoryja ź ich majuć abmiežavany rynak zbytu: naprykład, Ultimo pradajecca tolki ŭ kramach «Susiedzi», a Slam vyrablajecca vyklučna dla rasijskaha rynku.
Kamientary