U Hiermanii robat čapiŭsia da 16‑hadovaj dziaŭčyny. Chto budzie pakarany?

Jak paviedamlaje palicyja Kiolna, niezvyčajnaje zdareńnie adbyłosia pozna ŭviečary 10 kastryčnika kala restarana chutkaha charčavańnia ŭ centry horada. 16‑hadovaja dziaŭčyna znachodziłasia tam ź siabroŭkami, kali da jaje zzadu nabliziŭsia robat vyšynioj kala 120 santymietraŭ. Jon dakranuŭsia da jahadzic dziaŭčyny, a zatym zrabiŭ «šturchalnyja ruchi ŭ bok jaje jahadzic».

Zdareńnie zdymali na videa i tranślavali ŭ žyvym efiry ŭ sacsietkach 16‑hadovy ŭładalnik robata i jaho 19‑hadovy spadarožnik, supravadžajučy tranślacyju nieprystojnymi kamientarami.

Dziaŭčyna paviedamiła pra zdareńnie ŭ palicyju. Nieŭzabavie pravaachoŭniki znajšli dvuch padazravanych niepadalok. Sam robat užo lažaŭ u bahažniku aŭtamabila Volkswagen. Palicejskija kanfiskavali jaho razam z mabilnymi telefonami abodvuch maładych ludziej.

Robat vyhladaŭ davoli ekstravahantna: čyrvona-załacisty korpus, biełaja majka, soncaachoŭnyja akulary, nakładnyja vusy i łancuh pad zołata. Padobnyja čałaviekapadobnyja robaty kaštujuć ad 5 da 9 tysiač dalaraŭ.

Jak piša Associated Press, u internecie raspaŭsiudzilisia videazapisy, na jakich vidać, jak dvoje maładych ludziej supravadžajuć robata da hrupy dziaŭčat. Jon dakranajecca da adnoj ź ich i abdymaje inšych. Paśla nieprystojnych ruchaŭ adzin z chłopcaŭ sprabuje adciahnuć robata, a ludzi navokał śmiajucca.

Pradstaŭnik palicyi Kiolna u kamientary Associated Press zajaviŭ, što pravaachoŭniki nikoli raniej nie sutykalisia z padobnymi zdareńniami. Pavodle jaho słoŭ, heta absalutna novaja dla palicyi situacyja. Dvum junakam pakul nie pradjaŭlenyja abvinavačvańni, ale jany ličacca padazravanymi.

Vypadak pastaviŭ pierad śledčymi niezvyčajnaje jurydyčnaje pytańnie: chto niasie adkaznaść za seksualnyja damahańni, kali da čałavieka dakranajecca robat?

Jak tłumačać niamieckija jurysty, robat u takoj situacyi moža razhladacca jak instrumient u rukach čałavieka. Tamu toje, što dziaŭčyny dakranułasia mašyna, samo pa sabie nie vyklučaje adkaznaści za seksualnyja damahańni.

Pakul palicyja rasśleduje zdareńnie pavodle padazreńnia ŭ abrazie seksualnaha charaktaru. Śledčyja vyśviatlajuć, jak kiravali robatam padčas incydentu i ci byli jaho ruchi naŭmysna arhanizavanyja. Pry hetym jurysty nie vyklučajuć, što dziejańni padazravanych mohuć kvalifikavać i pavodle inšych artykułaŭ, u tym liku ab seksualnych damahańniach.

• 0
• 0
• 9
• 5
• 1
• 0
• 4
• 0