Što źmienicca dla biełarusaŭ paśla padpisańnia novaha mihracyjnaha pahadnieńnia z Rasijaj
Novaje mihracyjnaje pahadnieńnie pamiž Biełaruśsiu i Rasijaj praduhledžvaje mahčymaść ujezdu ŭ Rasiju pa ID-kartkach, biesterminovaje znachodžańnie hramadzian dźviuch krain na terytoryi susiedniaj dziaržavy i spraščeńnie afarmleńnia dakumientaŭ, piša vydańnie Office Life.
U lipieni Alaksandr Łukašenka padpisaŭ ukaz ab uchvaleńni prajekta źmienaŭ u pahadnieńnie ab roŭnych pravach hramadzian u śfiery mihracyi, a ŭ kancy vieraśnia baki padpisali vynikovy pratakoł.
Adnym z hałoŭnych novaŭviadzieńniaŭ stanie mahčymaść jeździć u Rasiju pa ID-kartkach lubym vidam transpartu. Ciapier hety dakumient vykarystoŭvajecca tolki ŭnutry krainy. Dla biełarusaŭ heta dazvolić aščadzić na afarmleńni bijamietryčnaha pašparta, kali jany padarožničajuć tolki ŭ Rasiju. Akramia taho, možna budzie addać pašpart u pasolstva dla afarmleńnia vizy i adnačasova jeździć u susiedniuju krainu pa ID-kartcy.
Pratakoł taksama zamacoŭvaje prava hramadzian Biełarusi biesterminova znachodzicca ŭ Rasii, a hramadzian Rasii — u Biełarusi. Adnak pry znachodžańni ŭ susiedniaj krainie bolš za 90 dzion rehistracyja pa-raniejšamu budzie abaviazkovaj.
Paradak afarmleńnia dakumientaŭ taksama sprościać. Termin razhladu zajaŭ na pastajannaje žycharstva skarociać z troch da dvuch miesiacaŭ, a dazvoł na časovaje žycharstva buduć vydavać na padstavie samoha fakta najaŭnaści hramadzianstva adpaviednaj krainy.
Źmieniacca i praviły ŭjezdu ŭ Biełaruś dla dziaciej da 14‑ci hadoŭ z rasijskim hramadzianstvam. Zamiest paśviedčańnia ab naradžeńni im spatrebicca zamiežny pašpart.
Novyja praviły pačnuć dziejničać nie adrazu: pratakoł jašče pavinny ratyfikavać zakanadaŭčyja struktury abiedźviuch krain.
Kamientary