U padpale stancyi Starlink u Bałharyi padazrajuć dvuch hramadzian Hiermanii

Advakaty padazravanych, pryznačanyja dziaržavaj, zajavili pra namier abskardzić hetaje rašeńnie. Na abskardžańnie adviedziena try dni.

Pavodle viersii abvinavačańnia, Isłam i Biejtuła zajechali ŭ Bałharyju 9 kastryčnika praz pamiežny punkt Kałocina na miažy ź Sierbijaj, zajaviŭšy, što prybyli z turystyčnaj metaj. Jany praviali ŭ krainie ŭsiaho niekalki hadzin, paśla čaho vyjechali ŭ bok Sierbii praz toj ža samy punkt na aŭtamabili ź niamieckimi numarami. Pavodle niamieckich dakumientaŭ, abodva padazravanyja naradzilisia ŭ 2007 hodzie. Ich ciapierašniaje miesca žycharstva nieviadomaje.

Jak paviedamlaje bałharskaje ahienctva BTA sa spasyłkaj na materyjały abvinavačańnia, u vyniku padpału try anteny spadarožnikavaj suviazi zhareli całkam, jašče dźvie byli častkova źniščanyja, a try atrymali niaznačnyja paškodžańni. Kali vinu padazravanych dakažuć, im pahražaje ad troch da 12 hadoŭ pazbaŭleńnia voli.

Pra pažar na stancyi Starlink kala Safii raniej paviedamiła apazicyjnaja kaalicyja «Demakratyčnaja Bałharyja». Pavodle jaje źviestak, 9 kastryčnika na sakretnym abjekcie naŭmysna padpalili 11 z 17 anten. Jany zabiaśpiečvajuć suviaź z kampanijaj SpaceX i vykarystoŭvajucca Ukrainaj padčas vajny suprać Rasii.

Bałharskija apazicyjnyja partyi nie vyklučajuć dyviersii i miarkujuć, što da jaje moža być datyčnaja Rasija. 14 kastryčnika fakt padpału paćvierdziŭ premjer-ministr Bałharyi Rumien Radzieŭ. Kiraŭnik bałharskaha Ahienctva nacyjanalnaj biaśpieki Płamien Tončaŭ zajaviŭ, što, pavodle jaho acenki, pažar staŭ vynikam dyviersii. Ministr unutranych spraŭ Bałharyi Ivan Demiardžyjeŭ paviedamiŭ pra ŭzmacnieńnie achovy takich abjektaŭ, choć adkaznaść za ich biaśpieku farmalna lažyć na ŭładalnikach.

Padobny incydent adbyŭsia ŭ Polščy 23 vieraśnia, kali ŭ vyniku padpału paciarpieła naziemnaja stancyja Starlink kala Varšavy. Pavodle vydańnia Bild, stancyja na karotki čas spyniła pracu, ale paźniej jaje adnavili. Paciarpiełych nie było.

Polskija ŭłady nazvali zdareńnie sprobaj dyviersii. Vice-premjer Kšyštaf Haŭkoŭski zajaviŭ, što, choć pramych dokazaŭ datyčnaści Rasii niama, mnohija prykmiety adpaviadajuć novaj rasijskaj daktrynie viadzieńnia atak.

12 kastryčnika premjer-ministr Polščy Donald Tusk paviedamiŭ, što ŭ Hiermanii zatrymali dvuch hramadzian Turcyi ŭ miežach rasśledavańnia polskaha padpału. Jon nazvaŭ incydent jašče adnym aktam hibrydnaj vajny. Kiraŭnik polskaha MUS Marcin Kierviński zajaviŭ, što padazravanym vystaviać abvinavačańni ŭ dyviersii pa zadańni zamiežnaj dziaržavy. Paźniej stała viadoma pra zatrymańnie jašče dvuch padazravanych pa hetaj spravie.

• 0
• 0
• 0
• 0
• 0
• 0
• 1
• 0