Biełaruskija kardyjachirurhi praviali ŭnikalnuju apieracyju na sercy ŭ Respublikanskim navukova-praktyčnym centry «Kardyjałohija». Jany vydalili 36,3 hrama praźmierna razrosłaj sardečnaj myšcy, skarystaŭšysia tolki adnym dostupam — praz aortu. Pry hetym vierchavinu serca nie razrazali.
Pavodle śpiecyjalistaŭ centra, u apublikavanaj suśvietnaj miedycynskaj litaratury niama apisańniaŭ apieracyj, padčas jakich takim sposabam vydalali b vialiki abjom tkanki.
Pacyjentu dyjahnastavali hipiertrafičnuju kardyjamijapatyju — zachvorvańnie, pry jakim sardečnaja myšca praźmierna pataŭščajecca. U vyniku pamianšajecca ŭnutranaja prastora serca i kryvi stanovicca ciažej prachodzić praź jaho.
U biełarusa była asabliva składanaja, dyfuznaja forma chvaroby: myšca pataŭščałasia nie ŭ adnym miescy, a adrazu na niekalkich učastkach levaha žałudačka, u tym liku kala jaho vierchaviny. Pavodle vynikaŭ kampjutarnaj tamahrafii, u adnym z učastkaŭ taŭščynia sardečnaj myšcy dasiahała 40 milimietraŭ — čatyroch santymietraŭ.
Pierad apieracyjaj daktary stvaryli trochmiernuju madel serca na asnovie źviestak kampjutarnaj tamahrafii i ultrahukavoha daśledavańnia. Heta dazvoliła dakładna vyznačyć, dzie i kolki tkanki nieabchodna vydalić.
Chirurhi praviali mijasieptektamiju — apieracyju, padčas jakoj vydalajuć častku patoŭščanaj sardečnaj myšcy, što pieraškadžaje narmalnamu ruchu kryvi.
Asnoŭnaja składanaść była ŭ tym, kab dabracca da najbolš ciažkadastupnych učastkaŭ. Lekary pracavali praz aortu — najbujniejšuju kryvianosnuju sudzinu, pa jakoj kroŭ vychodzić z serca. Im udałosia praniknuć na hłybiniu 10 santymietraŭ ad aartalnaha kłapana i vydalić lišniuju tkanku navat pablizu vierchaviny serca.
Dadatkova razrazać vierchavinu nie spatrebiłasia, dziakujučy čamu ŭdałosia paźbiehnuć źviazanaj z takim dostupam dadatkovaj traŭmy serca.
Usiaho chirurhi vydalili 36,3 hrama tkanki — bolš za 10% pieršapačatkovaj masy myšcy levaha žałudačka. Dla paraŭnańnia, u amierykanskaj klinicy Cleveland Clinic u sieryi z 682 padobnych apieracyj, praviedzienych u 2018—2023 hadach, najbolšaja masa vydalenaj tkanki składała 32 hrama. Takim čynam, biełaruskija śpiecyjalisty pieravysili hety pakazčyk na 4,3 hrama, vykarystaŭšy tolki adzin dostup praz aortu.
Paśla apieracyi maksimalnaja taŭščynia sardečnaj myšcy pacyjenta źmienšyłasia z 40 da 18 milimietraŭ. Taksama źniziŭsia hradyjent cisku — pakazčyk, jaki dazvalaje acanić, nakolki mocna ŭskładnieny vychad kryvi z serca. Jon źmienšyŭsia z 38 da 6 milimietraŭ rtutnaha słupka.
Pry hetym serca zachavała zdolnaść narmalna skaračacca, a jaho naturalny rytm nie parušyŭsia. Paślaapieracyjny pieryjad prajšoŭ biez uskładnieńniaŭ. Na 12‑ia sutki pacyjenta vypisali z balnicy ŭ zdavalniajučym stanie. Pavodle infarmacyi RNPC «Kardyjałohija», ciapier jon adčuvaje siabie dobra.
Ciapier čytajuć
Demakraty adbirajuć u respublikancaŭ Sienat i Pałatu pradstaŭnikoŭ u ZŠA
Kamientary