Беларускія кардыяхірургі правялі ўнікальную аперацыю на сэрцы ў Рэспубліканскім навукова-практычным цэнтры «Кардыялогія». Яны выдалілі 36,3 грама празмерна разрослай сардэчнай мышцы, скарыстаўшыся толькі адным доступам — праз аорту. Пры гэтым верхавіну сэрца не разразалі.
Паводле спецыялістаў цэнтра, у апублікаванай сусветнай медыцынскай літаратуры няма апісанняў аперацый, падчас якіх такім спосабам выдалялі б вялікі аб’ём тканкі.
Пацыенту дыягнаставалі гіпертрафічную кардыяміяпатыю — захворванне, пры якім сардэчная мышца празмерна патаўшчаецца. У выніку памяншаецца ўнутраная прастора сэрца і крыві становіцца цяжэй праходзіць праз яго.
У беларуса была асабліва складаная, дыфузная форма хваробы: мышца патаўшчалася не ў адным месцы, а адразу на некалькіх участках левага жалудачка, у тым ліку каля яго верхавіны. Паводле вынікаў камп’ютарнай тамаграфіі, у адным з участкаў таўшчыня сардэчнай мышцы дасягала 40 міліметраў — чатырох сантыметраў.
Перад аперацыяй дактары стварылі трохмерную мадэль сэрца на аснове звестак камп’ютарнай тамаграфіі і ультрагукавога даследавання. Гэта дазволіла дакладна вызначыць, дзе і колькі тканкі неабходна выдаліць.
Хірургі правялі міясептэктамію — аперацыю, падчас якой выдаляюць частку патоўшчанай сардэчнай мышцы, што перашкаджае нармальнаму руху крыві.
Асноўная складанасць была ў тым, каб дабрацца да найбольш цяжкадаступных участкаў. Лекары працавалі праз аорту — найбуйнейшую крывяносную судзіну, па якой кроў выходзіць з сэрца. Ім удалося пранікнуць на глыбіню 10 сантыметраў ад аартальнага клапана і выдаліць лішнюю тканку нават паблізу верхавіны сэрца.
Дадаткова разразаць верхавіну не спатрэбілася, дзякуючы чаму ўдалося пазбегнуць звязанай з такім доступам дадатковай траўмы сэрца.
Усяго хірургі выдалілі 36,3 грама тканкі — больш за 10% першапачатковай масы мышцы левага жалудачка. Для параўнання, у амерыканскай клініцы Cleveland Clinic у серыі з 682 падобных аперацый, праведзеных у 2018—2023 гадах, найбольшая маса выдаленай тканкі складала 32 грама. Такім чынам, беларускія спецыялісты перавысілі гэты паказчык на 4,3 грама, выкарыстаўшы толькі адзін доступ праз аорту.
Пасля аперацыі максімальная таўшчыня сардэчнай мышцы пацыента зменшылася з 40 да 18 міліметраў. Таксама знізіўся градыент ціску — паказчык, які дазваляе ацаніць, наколькі моцна ўскладнены выхад крыві з сэрца. Ён зменшыўся з 38 да 6 міліметраў ртутнага слупка.
Пры гэтым сэрца захавала здольнасць нармальна скарачацца, а яго натуральны рытм не парушыўся. Пасляаперацыйны перыяд прайшоў без ускладненняў. На 12‑я суткі пацыента выпісалі з бальніцы ў здавальняючым стане. Паводле інфармацыі РНПЦ «Кардыялогія», цяпер ён адчувае сябе добра.
Цяпер чытаюць
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары