Usie my kryšku mužčyny

Hładkaja skura, strojnaja fihura, zaściaroha ad ciažarnaści — za ŭsio adkazvajuć estrahieny. Ale časam ich zamała. Bałans pałavych harmonaŭ, zaprahramavany pryrodaj, časam parušajecca — i tut ža adbivajecca na tvary, fihury, zdaroŭi i navat charaktary žančyny. Ci treba jaho adnaŭlać? U bolšaści vypadkaŭ — tak.

Ci niebiaśpiečnaja harmonaterapija? Nie bolš za luboje inšaje lačeńnie. Usio zaležyć ad pravilnaha vybaru i prymianieńnia harmanalnych srodkaŭ.

Usie my kryšku mužčyny

U žanočym arhaniźmie vypracoŭvajucca nie tolki žanočyja, ale i mužčynskija pałavyja harmony (andrahieny). Parušeńnie raŭnavahi mienavita pamiž imi jarčej za ŭsio adbivajecca na źniešnaści. Prykładna ŭ 10–20% cudoŭnych dam pieravažaje «mužčynskaja frakcyja», i heta, jak praviła, vidać niaŭzbrojenym vokam: pačynajecca rost vałasoŭ u miescach, nieŭłaścivych słabamu połu: na tvary, vakoł saskoŭ, pa siaredniaj linii žyvata; pavyšajecca tłustaść skury, źjaŭlajucca vuhry, pryčym nie tolki na tvary, ale i na śpinie (typova mužčynskaja niepryjemnaść); «prylipajuć» lišnija kiłahramy, pryčym adkładajucca ŭ vobłaści žyvata (tak zvany abdaminalny typ atłuścieńnia), prykmietna pamianšajecca spakuślivaja roźnica pamiž talijaj i kłubami.

Kali taki dysbałans uźnikaje ŭ momant pałavoha vyśpiavańnia, jon moža prajavicca i ŭ asablivaściach ciełaskładu. U dziaŭčyny farmujecca «mužčynskaja» fihura — z vuzkim tazam i šyrokimi plačyma. Navat charaktar stanovicca bolš žorstkim, rezkim, rašučym. Jak praviła, takija žančyny hipierseksualnyja. A voś mienstrualny cykł u ich časta byvaje parušany: zatrymki miesiačnych až da poŭnaha spynieńnia.

Lišak mužčynskich pałavych harmonaŭ nie ličycca asabliva niebiaśpiečnym dla zdaroŭja. I da doktara takich žančyn zvyčajna pryvodziać abo kaśmietyčnyja prablemy (vuhrystaja chvaroba, zališniaje avałasieńnie), abo parušeńnie cykłu, biaspłodnaść. Jak praviła, im pryznačajuć śpiecyjalnyja kantraceptyvy, jakija nie tolki zaścierahajuć ad ciažarnaści, ale i pryhniatajuć vypracoŭku andrahienaŭ. U niekatorych vypadkach, asabliva kali sprava datyčycca biaspłodnaści, moža spatrebicca pryjom i inšych harmanalnych preparataŭ.

Chto vinavaty

«Złosnyja parušalniki» harmanalnaj raŭnavahi viadomyja:

— spadčynnaść;

— stresy i asabliva depresiŭnyja stany;

— doŭhi pryjom antydepresantaŭ i trankvilizataraŭ;

— złoŭžyvańnie ałkaholem;

— kureńnie, jakoje istotna paharšaje rabotu jaječnikaŭ;

— harmanalna-aktyŭnyja puchliny;

— imknieńnie skinuć vahu, čaho b heta ni kaštavała. Pry rezkim pachudzieńni da krytyčnaj adznaki (prykładna 48 kh) uźnikaje «amienareja vajennaha času» — jaječniki vyklučajucca, miesiačnyja spyniajucca i adnavić ich byvaje vielmi niaprosta. Pry hetym vielmi mocna pakutuje i źniešnaść.

Ličym estrahieny

Kali vy majecie bujny tempieramient i vysokuju pałavuju aktyŭnaść, enierhičnaja, ale razam z tym žanockaja, majecie bujnyja małočnyja załozy, hłyboki, vielmi «žanočy» hołas, to, chutčej za ŭsio, u vas ad pryrody vysoki ŭzrovień estrahienaŭ — hałoŭnych žanočych pałavych harmonaŭ. Dla «estrahiennych» dam charakternyja taksama suchija skura i vałasy, nievialiki rost, jany enierhična iduć pa žyćci i, jak praviła, vałodajuć dobrymi arhanizatarskimi zdolnaściami. Napiaredadni «krytyčnych» dzion adčuvajuć mocnaje niervovaje napružańnie.

Pry lišku estrahienaŭ treba nazirać za ŭzroŭniem druhoha žanočaha pałavoha harmonu — prahiesteronu. Mienavita jaho niedachop vyklikaje mocnyja mienstruacyi, skaračeńnie mienstrualnaha cykłu, ryzyku rańniaha raźvićcia endamietryjozu (u maładych hetaja chvaroba praciakaje značna ciažej) i biaspłodnaść.

Važny mienavita bałans harmonaŭ, a nie faktyčnaja ich kolkaść!

Niedachop estrahienaŭ prajaŭlajecca infantylnaj źniešnaściu, nieraźvitymi, «płoskimi» hrudźmi, tonkaj, pierhamientnaha vyhladu skuraj, vysokim hołasam, niaŭstojlivym nastrojem pierad miesiačnymi, panižanym libida. Praciahłaść cykłu moža być jak mienš za 28 dzion, tak i bolš za 1–3 miesiacy, mienstruacyi biednyja i doŭžacca časam mienš za 2 dni. Niedachop estrahienaŭ patrabuje harmanalnaj karekcyi. Z-za takoha niedachopu pakutuje mozh (prablemy z pamiaćciu, panižeńnie razumovaj aktyŭnaści), pamianšajecca ščylnaść kaściej, pavyšajecca ryzyka hipiertanii i aterasklerozu, parušajecca rabota straŭnika i kišečnika, žančyna pačynaje chutka stareć.

Siaredni ŭzrovień estrahienaŭ stvaraje ŭraŭnavažany typ žančyny. U joj usio ŭ mieru: žanockija źniešnaść i hołas, siaredniaha pamieru kruhlavyja małočnyja załozy, aksamitnaja skura, bieź pierapadaŭ nastroj napiaredadni krytyčnych dzion, siaredniaha ŭzroŭniu libida.

Hetyja, biezumoŭna, prybliznyja harmanalnyja partrety nahladna demanstrujuć, jakuju vialikuju rolu adyhryvajuć u našym žyćci estrahieny. Pry vybary harmanalnych kantraceptyŭnych preparataŭ heta abaviazkova treba ŭličvać.

Našy strachi

Čaho bajacca žančyny? Raspaŭnieć, stracić seksualnuju pryvabnaść i sapsavać źniešnaść. Mienavita takija pabočnyja efiekty my pa iniercyi prypisvajem lubym harmanalnym srodkam — ad kantraceptyvaŭ da lekaŭ. Nibyta jany:

1. Spryjajuć naboru vahi. Heta samy žyvučy mif. U 2–12% žančyn ich pryjom sapraŭdy pravakuje nabor 2–3 kh. Heta źviazana ź nievialikaj zatrymkaj vadkaści ŭ arhaniźmie, ale praz 2–3 miesiacy paśla pačatku pryjomu kantraceptyvaŭ vaha prychodzić u normu. Kali nie — źmianicie preparat: mahčyma, vy vałodajecie indyvidualnaj adčuvalnaściu da kankretnaha harmonu. A voś surjoznaje prybaŭleńnie ŭ vazie (da 10 kh na praciahu hoda) niepasredna z kantraceptyvami nie źviazanaje. Pryčyna: charčovaja niastrymanaść (harmanalnyja preparaty banalna pavialičvajuć apietyt, źnižajučy paroh nasyčeńnia) abo prablemy z padstraŭnikavaj ci ščytapadobnaj załozaj (časta na fonie pryjomu harmonaŭ prajaŭlajucca skrytyja endakrynnyja zachvorvańni).

2. Źnižajuć pałavuju ciahu. Daśledavańni apošnich hadoŭ dakazvajuć: takoje moža zdarycca, pakolki harmanalnyja kantraceptyvy źnižajuć kolkaść svabodnaha estrahienu ŭ kryvi. Ale vierahodnaść hetaha nievialikaja, a žančyny, jakija bajacca padobnych nastupstvaŭ, mohuć vybrać dla siabie nie tabletki abo płastyr, a, naprykład, unutrymatačnyja sistemy, jakija dazavana vyłučajuć harmony, — hetyja srodki dziejničajuć vyklučna łakalna, nie ŭpłyvajučy na ahulnuju karcinu kryvi.

3. Pavyšajuć zhusalnaść kryvi, pavialičvajučy vierahodnaść trambozaŭ. Sučasnyja nizkadazavanyja srodki ŭ hetych adnosinach značna bolš biaśpiečnyja, čym preparaty papiarednich pakaleńniaŭ.

4. Pryhniatajuć vypracoŭku ŭłasnych harmonaŭ. Heta časovy efiekt, pryčym stanoŭčy: prafiłaktyka endamietryjozu, svojeasablivy «adpačynak» dla jaječnikaŭ.

Nie bajacca, a raicca!

Karektavać harmanalny fon možna i treba, ale nijakaj samadziejnaści! Navat u prymianieńni kantraceptyvaŭ: usie jany dziejničajuć pa-roznamu, i padbirać ich pavinien doktar, jakomu viadomyja vašy «harmanalnyja sakrety».

Siońnia ŭ aptekach prapanujecca vialikaja kolkaść raślinnych preparataŭ, jakija ŭtrymlivajuć izafłavony, tak zvanyja travianyja estrahieny. Apošnija taksama mohuć dapamahčy adkarektavać harmanalny fon, pazbavicca ad pieradmienstrualnaha sindromu, ale tolki ŭ tych vypadkach, kali simptomy niajarka vyražanyja. I choć pradajucca hetyja leki ŭ adździełach «Biez recepta», padbirać ich taksama pavinien urač.

• 0
• 0
• 0
• 0
• 0
• 0
• 0
• 0