Alimpijskaja čempijonka Piekina stała matulaj

Alimpijskaja Piekina ŭ kidańni mołata Aksana Miańkova hetaj vosieńniu stała matulaj. 24 vieraśnia ŭ jaje naradziłasia dačka Aryna. Zaraz, kali dziaŭčyncy bolš za miesiac i ŭ Aksany źjaviŭsia niejki baćkoŭski staž, my pavinšavali jaje z pryjemnymi padziejami i raspytali, jak źmianiłasia žyćcio alimpijskaj čempijonki.

— Aksana, dačka atrymała imia ŭ spadčynu ad kahości ź blizkich?

— Nie. My zahadzia vyrašyli, što, kali budzie chłopčyk, nazaviom jaho Arsienij, kali dziaŭčynka — Aryna. Mnie padabajucca hetyja imiony, i mužu taksama.

— Uzhadajcie samy pryjemny momant, kali ŭpieršyniu ŭbačyli niemaŭla.

— Kali mnie jaje ŭpieršyniu prynieśli, u mianie adrazu naviarnulisia ślozy. Mnie rabili kiesarava siačeńnie, i ja, zdajecca, cełuju viečnaść čakała, pakul mianie adpuściać z reanimacyi. Vielmi ciažka: ty čakaješ, čakaješ... Nu i kali ŭbačyła narešcie, to raspłakałasia.

— U jakim raddomie źjaviłasia na śviet Aryna?

— U Łaŭsanaŭskaj balnicy, u Mahilovie.

— Da vas stavilisia jak da "zornaj" pacyjentki?

— Nu, zrazumieła, što ŭsie viedali, — proźvišča ž nie schavaješ. Praŭda, tam, zdajecca, da ŭsich matul adnosiny vydatnyja. Ja nikoli nie čuła, kab na kahości kryčali: "Idzicie, nie pieraškadžajcie, mamaša!"

— Zvyčajna daktary trymajuć u tonusie budučych mam, asabliva, kali sprava datyčycca lišniaj vahi...

— Mnie tolki skazali, što ja krychu pierabrała vahu. Padčas ciažarnaści ja nabrała 26 kiłahramaŭ. Ščyra kažučy, nie dumała, što tak chutka adnaŭlusia i skinu lišniaje. Uvohule zdavałasia, što skinuć heta nierealna. Ale zaraz zastałosia ŭsiaho paru kiłahramaŭ.

— Čaho bolš za ŭsio bajalisia padčas ciažarnaści?

— Zrazumieła, rodaŭ, jak i bolšaść budučych mam. Zdavałasia, što ja nie vytrymaju. Kali mnie skazali, što budzie apieracyja, mnie adrazu stała lahčej.

— Vy ŭžo źmirylisia z tym faktam, što praca mamy — heta 24 hadziny ŭ sutki, bieź pierapynkaŭ i vychadnych?

— Viedajecie, mnie vielmi dapamahaje moj muž. Ja ŭžo trenirujusia, i mnie nie davodzicca 24 hadziny ŭ sutki siadzieć doma. Nočču da Aryny ŭstaje muž, u mianie jość mahčymaść vyspacca. Što datyčycca babul, to my paprasili ŭ pieršy ž dzień ich nie turbavacca. I adna, i druhaja babula ŭziali adpačynki na pracy, i pačałosia... My z Aleham paprasili ich jechać dadomu i vyrašyli, što pakul pasprabujem spraŭlacca samastojna.

— Što ciažej: treniravacca ci być mamaj?

— Napeŭna, być mamaj. Adkaznaść nieparaŭnalnaja.

— Dačka bolš padobnaja na vas ci na muža?

— Jana mianiajecca: kali spačatku była bolš padobnaja na muža, to zaraz ni ja, ni Aleh nie znachodzim u joj ničoha svajho. Ale nam kažuć, što ŭsio napieradzie.

— Paśla Alimpijady vy atrymali kvateru ŭ Minsku, ale vyrašyli zastacca žyć u Mahilovie?

— Pa-pieršaje, ja tak pryzvyčaiłasia žyć u Mahilovie. Pa-druhoje, tut u nas vydatnaja baza "Alimpijec", dzie nam pabudavali sučasny siektar dla šturchańniaŭ.

— Raskažycie historyju z "padmanutymi dolščykami", jakimi vy ledź nie stali.

— Patrapali nam niervy niadrenna. Naš dom pavinny byli zdać jašče ŭ 2008 hodzie, ale jaho dahetul jašče budujuć. Nie viedaju, što tam možna budavać stolki času? Dom adnapadjezdny na 27 kvater! Tym bolš na tyja srodki, jakija brali z nas kožny miesiac. Nie viedaju, kudy jany ich układvali i zaraz układvajuć. Vyjści z hetaha budaŭnictva nam udałosia tolki padklučyŭšy ŭsich, kaho možna było: i Ministerstva sportu, i hubiernatara... Mnie tak škada tych ludziej, jakija budujuć dva hetyja damy, bo zabrać nazad svaje srodki vielmi ciažka. U vyniku tolki za dva dni da taho, jak naradziłasia Aryna, my pierasialilisia ź internata ŭ kvateru, jakuju nabyli, zabraŭšy, narešcie, srodki z hetaha dolevaha budaŭnictva.

— Abstavić meblaj novaje žyllo paśpieli?

— Razam z Aleham nabyvali meblu i abstaŭlali jašče da naradžeńnia Aryny. Zału abstavić pakul nie paśpieli. Ja nie vieru ŭ prykmiety, i my z Aleham zahadzia nabyli ŭsio dla Aryny: i kalasku, i łožačak, i bałdachin, i adzieńnie. Tak što jaje pakoj byŭ całkam hatovy i atrymaŭsia samym pryhožym.

— Vy kazali, što pačali treniravacca...

— Tak, pryčym siońnia ja ŭpieršyniu paśla pierapynku pasprabavała kidać mołat. Trenier skazaŭ, što atrymlivajecca navat lepš, čym da ciažarnaści. Tak što ŭsio pajšło na karyść.

— Hety hod vy płanujecie pryśviacić tolki treniroŭkam i adnaŭleńniu?

— Chto viedaje? Mahčyma, udasca padrychtavacca i vystupić i na sioletnim čempijanacie śvietu.

• 0
• 0
• 0
• 0
• 0
• 0
• 0
• 0