Na toje, kab pierakanać vybarcaŭ, u ich jość roŭna miesiac — da 19 śniežnia, kali adbudziecca hałasavańnie.
Ad siońniašniaha dnia kandydaty na vybarach prezydenta pačynajuć ahitacyju. Na toje, kab pierakanać vybarcaŭ, u ich jość roŭna miesiac — da 19 śniežnia, kali adbudziecca hałasavańnie. Usiaho ŭ vybarach prymaje ŭdzieł 10 kandydataŭ, uklučna ź dziejnym kiraŭnikom krainy Alaksandram Łukašenkam.
Vybarčy štab kandydata ad Abjadnanaj hramadzianskaj partyi Jarasłava Ramančuka ŭžo padrychtavaŭ i pieradaŭ arkušy na rezervavańnie zajaŭ na sustrečy z vybarcami. Adnačasova aktyvisty štabu źviarnulisia ŭ bank z zajaŭkaj na adkryćcio rachunku dla pieradvybarčych achviaravańniaŭ i ŭ drukarni — z zamovami na publikacyju zahadzia padrychtavanych ulotak.
Sam spadar Ramančuk u bližejšuju subotu idzie rabić zapis na radyjo, a ŭ paniadziełak u jaho buduć pieršyja pieradvybarčyja sustrečy ŭ rehijonach.
Pieradvybarčy tur Ramančuka nazyvajecca «Miljon pociskaŭ ruk»:
«My pačynajem ź Bieraściejščyny, ź miažy z Zachadam, i budziem voś takoj „strełkaj“ jechać navierch, na poŭnač, u Viciebskuju vobłaść, da Vierchniadźvinska. Heta budzie takaja symbaličnaja strełka, jakaja budzie pakazvać, što my źbirajemsia rabić u našaj krainie, a my chočam pierš za ŭsio źlikvidavać usie miežy, kab Zachad pryjšoŭ da Biełarusi. Heta taki symbal. Budziem naviedvać nia tolki ŭsie abłasnyja centry, ale ŭsie harady, u jakich pražyvaje bolš za 50 tysiač ludziej, kab maksymalna aktyŭna vykarystoŭvać kožny dzień».
Aleś Michalevič hetymi dniami ŭ pieršuju čarhu vyrašaje arhanizacyjnyja prablemy:
«Ja zaraz zajmajusia peŭnymi techničnymi pytańniami, druk materyjałaŭ, adładžvańnie sietki ich raspaŭsiudu, i hetym źbirajusia zajmacca bližejšym časam. Spadziajusia, što chutka źjaviacca ahitacyjnyja tumby dla vybarčaj infarmacyi, jakija ja zmahu abviesić svaimi plakatami. Plus da hetaha ja pierakrojvaju svoj vybarčy hrafik, tamu što siońnia było skazana, kali zapis na telebačańni, kali debaty. Adpaviedna hetyja dni vypadajuć z maich pajezdak pa rehijonach».
Pieršaja pajezdka ŭ rehijony ŭ Alesia Michaleviča čakajecca ŭ paniadziełak ci aŭtorak.
Kandydat ad BNF Ryhor Kastusioŭ u pieršuju čarhu źbirajecca ŭzhadnić plany vybarčaj kampanii z adnapartyjcami: u piatnicu projdzie pasiedžańnie Ŭpravy, u subotu — Sojmu Partyi BNF.
«U nas užo ŭzory plakataŭ i ŭlotak raspracavanyja. Maja ž zadača jak najbolš, maksymalna arhanizavać sustrečy z žycharami roznych haradoŭ, nasielenych punktaŭ našaj krainy. Sustrečy, sustrečy, jašče raz sustrečy».
Ryhor Kastusioŭ kaža, što jon zacikaŭleny ŭ tym, kab sustrakacca z vybarščykami i razam ź inšymi kandydatami, u tym liku i Alaksandram Łukašenkam.
Kamientary