Na sustreču z Sańnikavym u Homieli pryjšli 650 vybarščykaŭ

U homielskim DK «Fiestyvalny» 5 śniežnia adbyłasia sustreča kandydata ŭ prezidenty Andreja Sańnikava z vybarščykami. Heta pieršy kandydat, jaki naviedaŭ abłasny centr za čas ahitacyjnaj kampanii.

Mierapryjemstva prajšło pry pierapoŭnienaj zale, raźličanaj na 600 miescaŭ. Kaardynatar hramadzianskaj kampanii «Jeŭrapiejskaja Biełaruś» Andrej Babicki pradstaviŭ hamialčanam kandydata ŭ prezidenty jak čałavieka, jaki «prapanuje nam usim razam pamianiać łysuju ryzinu».

Sańnikaŭ tezisna aznajomiŭ vybarščykaŭ sa svajoj prahramaj. «Biełaruś začakałasia pieramien, nas nazyvajuć apošniaj dyktaturaj u Jeŭropie, heta hańba dla krainy. U Rasii z pačatku 90-ch užo treci prezident, va Ukrainie — čaćviorty, užo nie havoračy pra našych susiedziaŭ litoŭcaŭ, palakaŭ. Šasnaccać hadoŭ — heta zanadta šmat. Hałoŭnaje — što nas pazbavili prava vybaru. Ale siońnia ŭ nas jość unikalny histaryčny šans, tamu što ŭpieršyniu my možam paŭpłyvać na los krainy», — vykazaŭ svoj punkt hledžańnia kandydat. Jon zaklikaŭ hamialčan nie iści na daterminovaje hałasavańnie i zaprasiŭ 19 śniežnia ŭ 20.00 na płošču ŭ Minsku.

Žychary Homiela zadali kandydatu kala 20 pytańniaŭ, u pryvatnaści, ab nacyjanalnaj idei, losie biełaruskaj movy, vyrašeńni demahrafičnych prablem, pryvatyzacyi pradpryjemstvaŭ, mahčymaści ŭvachodžańnia ŭ Jeŭrasajuz, NATO, pryznańnie niezaležnaści Paŭdniovaj Asiecii i Abchazii. Sańnikaŭ adkazaŭ, što Biełaruś — niejtralnaja kraina i ŭ NATO ŭvachodzić joj nie treba, jak nie treba i pryznavać Paŭdniovuju Asieciju i Abchaziju.

Sańnikaŭ admoŭna adkazaŭ na pytańnie, ci maje jon namier paśla mahčymaj pieramohi na vybarach adkryć archivy KDB, kab addać hałosnaści proźviščy ahientaŭ siłavoha viedamstva. Pavodle słoŭ kandydata, mohuć paciarpieć niavinnyja ludzi, na jakich, da prykładu, uźviali paklop. Taksama vybarščykaŭ chvalavała, što zrobić Sańnikaŭ z BRSM i prafsajuzami.

Mnohija hamialčanie, jakija stali ŭ čarhu da mikrafona, kab zadać pytańni kandydatu, nie atrymali adkazaŭ. Davieranyja asoby kandydaty pierapynili sustreču, rastłumačyŭšy heta tym, što ŭ ich napieradzie «ciažkaja daroha».

U hutarcy z žurnalistami Sańnikaŭ adznačyŭ, što pa vynikach sustrečy ŭ jaho skłałasia «cudoŭnaje ŭražańnie». «Pieramieny mahčymyja, jość šans, jość padtrymka, ciapier my bačym: niama nijakaj padtrymki ŭ Łukašenki, jość padtrymka ŭ demakratyi», — ličyć jon. Sańnikaŭ zajaviŭ, što ŭ jaho niama nadziei na sumlennyja vybary.

«Štości možna zrabić dla padliku hałasoŭ, hałoŭnaje — kab daterminovaje hałasavańnie nie spracavała tak, jak jano pracuje na falsifikacyi», — padsumavaŭ kandydat.

• 0
• 0
• 0
• 0
• 0
• 0
• 0
• 0