Premjer-ministr Erdahan, ščyra pryvitaŭšy Papu, padkreśliŭ rolu Turcyi, a asabliva Stambuła, jak miesca, dzie sustrakajucca roznyja kultury i cyvilizacyi.
28 listapada 2006 h. kala hadziny dnia pa miascovym časie (taki, jak u Biełarusi), Papa Benedykt XVI syšoŭ z trapa samalota italjanskich avijalinij, jaki pryziamliŭsia ŭ aeraporcie stalicy Turcyi Ankary. U aeraporcie Śviatoha Ajca sustreŭ premjer-ministr krainy Redžep Tajip Erdahan, a taksama ijerarchi Katalickaha Kaścioła ŭ Turcyi.
Papa byŭ apranuty ŭ doŭhi bieły płašč. Na jaho tvary była ŭśmieška, ale ŭ jaho vyrazie adčuvałasia taksama peŭnaje napružańnie, vyklikanaje, napeŭna, nieadnaznačnaj reakcyjaj na hety vizit kiraŭnika Kaścioła ŭ musulmanskuju krainu.
Paśla karotkaj cyrymonii pryvitańnia hości i sustrakajučyja prajšli ŭ VIP-zału aeraporta Ankary, dzie pad vialikim partretam Ataciurka adbyłasia razmova Śviatoha Ajca z tureckim premjeram, jaki siońnia ž vylataje ŭ Ryhu dla ŭdziełu ŭ samicie NATO. Sustreča była niadoŭhaj, i žurnalisty mahli prysutničać tolki na jaje pačatku, paśla čaho razmova praciahnułasia za začynienymi dźviaryma. Raniej sama mahčymaść sustrečy Papy z kiraŭnikom uradu Turcyi była pad vialikim pytańniem, i pra toje, što jana adbudziecca, stała viadoma tolki pierad vyletam Papy z Ryma.
Pačynajučy razmovu, Benedykt XVI skazaŭ, što z samaha pačatku svajho pantyfikatu žadaŭ naviedać Turcyju, jakaja jamu vielmi blizkaja. Jon taksama źviarnuŭ uvahu na važnaść dyjałohu pamiž cyvilizacyjami. Premjer-ministr Erdahan, ščyra pryvitaŭšy Papu, padkreśliŭ rolu Turcyi, a asabliva Stambuła, jak miesca, dzie sustrakajucca roznyja kultury i cyvilizacyi. U hetym kantekście jon pryvioŭ vytrymku sa stambulskaj dekłaracyi, pryniataj na samicie NATO ŭ 2004 h., u jakoj idzie havorka pra prava na sumiesnuju biaśpieku ŭsich krainaŭ biez adoźnieńnia pavodle prynaležnaści da toj ci inšaj cyvilizacyi.
Redžep Tajip Erdahan paprasiŭ u Benedykta XVI prabačeńnia za toje, što nie moža dalej spadarožničać jamu padčas jaho vizitu.
Kamientary