Illa Vasilevič. Partret na fonie krataŭ

Siońnia ŭ sudzie Partyzanskaha rajona Minska pačynajecca sud nad Illom Vasilevičam.

Samy małady fihurant spravy. Naradziŭsia 6 žniŭnia 1991 u Baranavičach. Vučyŭsia ŭ baranavickaj himnazii. Paśla dziaviataha kłasa pastupiŭ u Minski politechničny kaledž. Vydatna vučyŭsia ŭ kaledžy, byŭ starastam hrupy. Za ŭdzieł u akcyi pratestu 19 śniežnia Illa adsiedzieŭ 10 sutak aryštu i byŭ adpuščany dadomu. Jamu paviedamili, što administracyja Minskaha politechničnaha kaledža vyklučaje jaho z vučelni. 5 studzienia małady čałaviek byŭ zaprošany ŭ administracyju kaledža dla padpisańnia adpaviednych papieraŭ, ale ŭ vučelni Illu čakali supracoŭniki KDB, jakija paviedamili, što jon padazravany pa kryminalnaj spravie, i źmiaścili spačatku ŭ IČU na Akreścina, a potym pieraviali ŭ SIZA na Vaładarskaha.

19 śniežnia Illa byŭ na Płoščy. Mnie ź im udałosia parazmaŭlać uviečary 19-ha. Jon byŭ uzrušany, uschvalavany — heta pieršyja vybary ŭ jahonym žyćci. Vieryŭ u pieramieny. Adsiedzieŭ 10 sutak aryštu za ŭdzieł u akcyi pratestu. U žodzinskim izalatary pieranios vielmi mocny stres. Chłopcy, jakija siadzieli razam, dapamahali jamu jak samamu małodšamu. Kali my sustrelisia 30-ha śniežnia, paśla adsiedki, Illa byŭ vielmi razhubleny, drenna siabie adčuvaŭ. Ale pačućcio adkaznaści pieramahło: «Treba być na zaniatkach, u mianie łabaratornyja raboty».

Tam jaho adrazu ž vyklikaŭ dyrektar kaledža i zapatrabavaŭ, kab Illa napisaŭ pakajalnuju tłumačalnuju, što na płoščy apynuŭsia vypadkova, inakš jaho adličać. Illa žalu nie vykazaŭ i zajaviŭ, što prabačeńnia prasić nie źbirajecca, bo nie ličyć siabie vinavatym, i kajacca jamu niama ŭ čym. 5 studzienia jaho vietliva zaprasili zajści ŭ administracyju kaledža dla padpisańnia niejkich papieraŭ. Ale tam jaho ŭžo čakali supracoŭniki KDB: paviedamili, što jon padazravany pa kryminalnaj spravie. Źmiaścili spačatku ŭ IČU na Akreścina, a potym pieraviali ŭ SIZA na Vaładarskaha. Dahetul jon «jak tyhr u kletcy», — tak piša ź SIZA pra siabie Iluša.

Vielmi pieražyvaŭ, kali 22 studzienia pamierła babula, a jaho nie puścili na pachavańnie. Babulu jon vielmi lubiŭ. Pieražyvaje i za svajho siabra Fiodara Mirzajanava, studenta Biełaruskaha dziaržaŭnaha ekanamičnaha ŭniviersiteta, jaki taksama čakaje sudu…

Nam jaho vielmi nie chapaje. Ja vieru, Illa aptymist — jon spadziajecca, i słušna robić, tamu što my ŭsie vierym i hanarymsia im.

Volha Bandaronak, stryječnaja siastra Illi Vasileviča

• 0
• 0
• 0
• 0
• 0
• 0
• 0
• 0