U pieršym reaktary AES «Fukusima-1» całkam raspłavilisia jadziernyja stryžni

Paliŭnyja stryžni ŭ pieršym reaktary avaryjnaj japonskaj AES "Fukusima-1" całkam raspłavilisia z-za pierahrevu, pakolki nie byli całkam pakrytyja vadoj. Zaraz raspłaŭlenaja masa, vidać, znachodzicca na dnie reaktara ŭ vadzie i achałodžvajecca, paviedamiŭ u čaćvier apieratar stancyi -- kampanija Tokyo Electric Power (TEPCO).

Kampanija ŭpieršyniu pryznała fakt poŭnaha raspłaŭleńnia jadziernaha paliva ŭ adnym z 3 paciarpiełych reaktaraŭ AES "Fukusima-1" -- poŭnaha mełtdaŭna. Paśla paćvierdžańnia faktu raspłaŭleńnia jadziernaha paliva hałoŭnuju niebiaśpieku ŭjaŭlaje vybuch vadarodu ŭnutry ŭstanoŭki. Adnak apieratar stancyi i ekśpierty ličać takuju niebiaśpieku niaznačnaj, paviedamlaje ITAR-TASS.

Źniešniaja pavierchnia korpusa reaktara zastajecca adnosna "prachałodnaj" -- jaje tempieratura składaje ad 100 i 120 hradusaŭ pa Celsii.

"Heta nie pavinna niepakoić, dla praduchileńnia nazapašvańnia vadarodu my napampoŭvajem u reaktar azot", -- paviedamiŭ siońnia na pres-kanfierencyi pradstaŭnik TEPCO. "Miarkujučy pa tempieratury, cisku i h.d., vierahodnaść vybuchu vielmi nievialikaja", -- zajaviŭ taksama žurnalistam viadomy ŭ Japonii śpiecyjalist pa atamnaj enierhietycy prafiesar Univiersitetu "Vaseda" Josiaki Aka.

Toje, što adbyłosia na reaktary, vyznačyli dziakujučy tamu, što ŭ pieršym enierhabłoku z kanca minułaha tydnia było ŭstalavanaje vientylacyjnaje abstalavańnie, jakoje častkova ačyściła pavietra ad radyjeaktyŭnych čaścicaŭ. Paśla hetaha ŭ budynak zmahli ŭvajści śpiecyjalisty i ŭstalavać vymiaralnyja prybory.

Vyśvietliłasia, što ŭzrovień vady ŭ pieršym reaktary ciapier na 5 mietraŭ nižej za štatny. Heta značyć, što tam znachodziacca całkam adkrytymi raspalenyja paliŭnyja stryžni daŭžynioj 4 mietry. U vyniku jany ŭžo całkam raspłavilisia ad pierahrevu. U toj ža čas na dnie reaktara jašče jość vada, jakaja astudžaje hetuju masu, ličać ekśpierty.

Raniej śpiecyjalisty TEPCO dapuskali, što stryžni ŭ pieršym reaktary razburylisia na 55%.

Ciapier kampanija pampuje pa 8 ton vady ŭ hadzinu ŭ prastoru pamiž korpusam reaktara i jahonaj źniešniaj achoŭnaj stalovy abałonkaj. Heta pavinna stvaryć "vadziany sarkafah" i spryjać efiektyŭnamu achałodžvańniu ŭstanoŭki.

Mierkavałasia taksama zmantavać u reaktara dadatkovuju sistemu vonkavaha achładžeńnia, u jakoj by cyrkulavała vada. Ciapier u hetyja płany, mahčyma, daviadziecca ŭnosić karektyvy.

Situacyja ŭ paciarpiełych druhim i trecim reaktarach taksama nie zusim zrazumiełaja. Ekśpierty TEPCO dapuskali, što paliva tam razburanaje na 30 i 35 adsotkaŭ. U druhim reaktary, miarkujučy pa ŭsim, jość paškodžańnie ŭ złučanym ź im basiejnie dla kandensacyi i astudžeńni pary. Praz hety prałom, vidać, idzie ŭciečka radyjoaktyŭnaj vady. U trecim reaktary adznačana praźmierna vysokaja tempieratura. Čaćviorty reaktar na momant udaru cunami pa AES 11 sakavika byŭ spynieny na techahlad, paliva ŭ im nie było. Piaty i šosty reaktary paciarpieli niašmat, jany zahłušanyja i znachodziacca ŭ stabilnym stanie

• 0
• 0
• 0
• 0
• 0
• 0
• 0
• 0