Łobanu — 3, Fiedarkieviču — 3,5, Sakretu — 3, Kazakovu — 3, Daroninu — 3,5, Macukieviču — 3 hady kałonii

U sudzie Maskoŭskaha rajona Minska 12 maja ahučanyja prysudy ŭ dačynieńni da hrupy ŭdzielnikaŭ akcyi 19 śniežnia. Uładzimir Łoban asudžany da 3 hod pazbaŭleńnia voli, Andrej Fiedarkievič - da 3,5, Jaŭhien Sakret - da 3, Siarhiej Kazakoŭ - da 3, Dźmitryj Daronin - da 3,5 hadoŭ u kałonii ahulnaha režymu, Vital Macukievič - da 3 hadoŭ kałonii stroha režymu. Takija pakarańni vyniesła 12 traŭnia Alena Šylko, sudździa suda Maskoŭskaha rajona Minska.

Fihuranty kryminalnaj spravy abvinavačvalisia pavodle kryminalnaha artykuła «masavyja biesparadki». Usie jany ŭdzielničali ŭ akcyi pratestu 19 śniežnia.

11 traŭnia dziaržaŭny abvinavaŭca prasiŭ pakarać padsudnych: Łobana i Fiedarkieviča — tryma z pałovaj hadami kałonii strohaha režymu, Sakreta, Kazakova, Daronina, Macukieviča — čatyrma hadami źniavoleńnia, paviedamlaje Radyjo Svaboda.

***

Takim čynam kolkaść asudžanych za Płošču, z ulikam prieventyŭna zatrymanych, a zatym asudžanych Źmitra Daškieviča i Eduarda Łobana, dasiahnuła 22 čałaviek.

Za ŭdzieł u masavych biesparadkach Vasil Parfiankoŭ pryhavorany da čatyroch hadoŭ pazbaŭleńnia voli ŭ kałonii strohaha režymu; Alaksandr Atroščankaŭ — da čatyroch hadoŭ u kałonii ŭzmocnienaha režymu; Mikita Lichavid — da troch z pałovaj hadoŭ pazbaŭleńnia voli, Dźmitryj Novik i Alaksandr Małčanaŭ — da troch z pałovaj i troch hadoŭ u kałonii ŭzmocnienaha režymu adpaviedna; hramadzianie RF Arciom Breus i Ivan Haponaŭ — da štrafu ŭ 300 bazavych vieličyniaŭ (10,5 młn. rubloŭ) kožny; Dźmitryj Miadźviedź — da troch hadoŭ abmiežavańnia voli biez nakiravańnia ŭ papraŭčuju ŭstanovu. Aleś Kirkievič asudžany na 4 hady źniavoleńnia, Pavieł Vinahradaŭ — na 4 hady, Andrej Pratasienia — 3 hady, Źmicier Drozd — na 3 hady, Uładzimir Chamičenka — 3 hady.

Za padrychtoŭku dziejańniaŭ, što parušajuć hramadski paradak (art. 342), na 2 hady kałonii ahulnaha režymu byŭ asudžany kaardynatar «Jeŭrapiejskaj Biełarusi» Źmicier Bandarenka. Aproč taho, za złosnaje chulihanstva byli taksama asudžanyja Źmicier Daškievič i Eduard Łobaŭ — na dva i čatyry hady pazbaŭleńnia voli adpaviedna. Ich zatrymali 18 śniežnia, za dzień da prezidenckich vybaraŭ.

***

Tym časam praciahvajucca čatyry sudy. Na łavach padsudienych znachodziacca 21 čałaviek.

U sudzie Leninskaha rajona 11 maja pačaŭsia praces nad kandydatami ŭ prezrdenty Mikałajem Statkievičam i Dźmitryjem Usam. Jany abvinavačvajucca ŭ arhanizacyi masavych biesparadkaŭ, jakija supravadžajucca nasillem nad asobaj, pahromami, źniščeńniem majomaści i ŭzbrojenym supraciŭleńniem pradstaŭnikam ułady (č. 1 art. 293 KK).

Razam z byłymi kandydatami sudziać Alaksandra Kviatkieviča, Dźmitryja Bułanava, Andreja Paźniaka, Arcioma Hrybkova i Alaksandra Kłaskoŭskaha. Pa viersii śledstva, jany źjaŭlajucca «najbolš aktyŭnymi ŭdzielnikami masavych biesparadkaŭ». Pieršyja čaćviora abvinavačvajucca pa č. 2 art. 293 KK (udzieł u masavych biesparadkach). Kłaskoŭskamu pradjaŭlena abvinavačańnie adrazu pa troch artykułach Kryminalnaha kodeksa: č. 1 i č. 2 art. 293 (arhanizacyja i ŭdzieł u masavych biesparadkach), art. 369 (źniavaha pradstaŭnika ŭłady) i art. 382 KK (samavolnaje prysvajeńnie zvańnia abo ŭłady słužbovaj asoby).

U sudzie Zavodskaha rajona Minska prachodzić praces nad Irynaj Chalip — žonkaj eks-kandydata ŭ prezidenty Andreja Sańnikava, Paŭłam Sieviaryncam — kiraŭnikom štaba kandydata ŭ prezidenty Vitala Rymašeŭskaha i Siarhiejem Marcalevym — kiraŭnikom štaba Mikałaja Statkieviča. Jany abvinavačvajucca pa č. 1 art. 342 KK (arhanizacyja i padrychtoŭka dziejańniaŭ, jakija hruba parušajuć hramadski paradak, abo aktyŭny ŭdzieł u ich). Im pahražaje da 3 hadoŭ pazbaŭleńnia voli.

U sudzie Partyzanskaha rajona słuchajecca sprava eks-kandydata ŭ prezidenty Andreja Sańnikava, a taksama ŭdzielnikaŭ akcyi Ilji Vasileviča, Aleha Hniedčyka, Fiodara Mirzajanava i Uładzimira Jaromienka. Jany abvinavačvajucca pa častcy 1 artykuła 293 KK (arhanizacyja masavych biesparadkaŭ).

U sudzie Frunzienskaha rajona sudziać dvuch byłych kandydataŭ u prezidenty Uładzimira Niaklajeva i Vitala Rymašeŭskaha, a taksama členaŭ ich kamand Andreja Dźmitryjeva, Alaksandra Fiadutu, Nastu Pałažanku i Siarhieja Vaźniaka. Jany abvinavačvajucca pa častcy 1 artykuła 342 KK (arhanizacyja i padrychtoŭka dziejańniaŭ, jakija hruba parušajuć hramadski paradak, abo aktyŭny ŭdzieł u ich). Vaźniak akramia hetaha abvinavačvajucca pa častcy 1 artykuła 401 KK (zaviedama niepraŭdzivaje pakazańnie).

• 0
• 0
• 0
• 0
• 0
• 0
• 0
• 0