U Biełarusi zastałosia 13 dzion

“Na toje, kab pahadzicca z patrabavańniami Rasiei, u Miensku zastałosia 13 dzion”. Tak piša siońniašni “Kommiersant'”.

Zahałovak i padzahałovak publikacyi hučać, naŭprost kažučy, cynična: “U Miensku niama słovaŭ. A moža nie zastacca i suverenitetu”.

Maskva sapraŭdy ŭvajšła ŭ smak vyśviatleńnia stasunkaŭ z tutejšymi kiroŭnymi viarchami. Ale ž suverenitet nia jość cackaj, jakuju adbirajuć u Łukašenki za toje, što nia choča dzialicca truboju!

Voś kryŭdziacca maskoŭcy, kali čujuć zakidy nakont imperskaha mentalitetu. A jon ža choćki-niachoćki vyłazić. Usio adno hladziać na biełaruskuju niezaležnaść jak na niejkuju histaryčnuju niedarečnaść...

Ale heta adzin bok prablemy. I dzivicca pavodzinam Kramla niama čaho. Rana ci pozna musiła spraŭdzicca vysłoŭje pra biaspłatny syr, što byvaje tolki ŭ pastcy. Voś Maskva i čakaje siońnia la svajoj rasčynienaj pastki.

I zhodnaja čakać jašče 13 dzion.

Darečy, hazeta “Vriemia novostiej” padaje amal što anekdatyčnuju versiju: nibyta rasiejcy navat uhavorvali halandzki bank padvysić u niekalki razoŭ acenačny košt “Biełtranshazu”, kab tolki zładzić doŭhačakany hiešeft!

Tak ci nie, ale sprava pakul što – ni ź miesca.

U minułuju piatnicu, kali prahučali słovy biełaruskaha aficyjnaha kiraŭnika pra nibyta znojdzienuju supolna z Pucinym nitačku, aŭtar hetych radkoŭ raiŭ nie śpiašacca z vysnovami. U pryvatnaści, nakont taho, što kapitulacyja de-fakta adbyłasia.

I sapraŭdy, nastupnyja kamentary maskoŭskaha druku, źnitavanaha z kramloŭskimi krynicami, zaśviedčyli: pieramovy na najvyšejšym uzroŭni 15 śniežnia pravalilisia. Jak zaznačyŭ adzin z aŭtaraŭ, Łukašenku nie pašenciła źbić košt hazu ni na cent.

Karaciej, rasiejski bok praciahvaje hnuć svajo: ad novaha hodu haz pa 200 dalaraŭ plus myta na naftu, jakoje faktyčna stavić kryž na prybytkach ad prodažu bienzynu dy salarki ŭ Eŭraźviaz.

Maskva kateharyčna nia vieryć namiokam biełaruskaha kiraŭnictva na hatovaść da niejkich zruchaŭ u pytańniach kanstytucyjnaha aktu dy adzinaj valuty. Toje, što ŭ nas chto-kolviek paličyŭ vykidańniem biełaha ściahu, rasiejcy rascanili jak čarhovy niemudrahielisty maneŭr.

Voś krasamoŭnaja replika ekanamista Michaiła Dzialahina u “KP” : “Hetuju vudu jon (Łukašenka) zakidaje ŭžo nia pieršy raz, kab padražnić Rasieju. Nasamreč Łukašenku heta niavyhadna. Uviadzieńnie rubla faktyčna aznačaje stratu Mienskam svajoj niezaležnaści — chaj sabie pakul što i ekanamičnaj. Što zahadajecie rabić biełaruskaj elicie i biznesu, kali ŭsie hrošy buduć u Maskvie?”.

Biełaruskija viarchi razumiejuć sytuacyju nia horaj za Dzialahina.

I zusim nia vyklučana, što Łukašenka ryzyknie vyprabavać nervy kramloŭskaha vizavi. Tak iduć na taran, raźličvajučy, što ŭ apošni momant supiernik zbaicca.

Va ŭsiakim razie, palitolah Valer Karbalevič zaznačaje: jość vialikim pytańniem, nakolki Pucin psychalahična hatovy da poŭnamaštabnaha kanfliktu z apošnim stratehičnym chaŭruśnikam.

Tak što možam dačakacca jašče i niesankcyjanavanaj adpampoŭki hazu, i žorstkaj antykramloŭskaj rytoryki z vusnaŭ aficyjnaha kiraŭnika.

Inšaja reč, što zakon biaspłatnaha syru ŭsio adno niaŭmolny. Ułada musić tak ci inačaj płacić pavodle rachunkaŭ. I nia tolki Maskvie.

• 0
• 0
• 0
• 0
• 0
• 0
• 0
• 0