Zahadki Płoščy

Ad padziejaŭ 19 śniežnia prajšło ŭžo bolš za piać miesiacaŭ. Minuli sudy nad kandydatami. Troje ź ich apynulisia ŭ źniavoleńni na doŭhi termin. Niekatoryja ž atrymali ŭmoŭnaje pakarańnie. Tym nie mienš, na peŭnyja pytańni, źviazanyja z Płoščaj, adkazaŭ usio jašče niama. Na adny, mahčyma, adkazy atrymajem tolki paśla vychadu z turmy ŭsich viaźniaŭ. Na inšyja — tolki paśla adkryćcia archivaŭ śpiecsłužbaŭ.

Zahadka № 1. Chto i našto źbiŭ Niaklajeva?

Kandydata ŭ prezidenty, lidara kampanii «Havary praŭdu» Uładzimira Niaklajeva źbili la ofisa arhanizacyi na Kalektarnaj, kali šeście ruchałasia da Kastryčnickaj płoščy. Supracoŭniki DAI pieraharadzili kałonie darohu jašče ŭ toj momant, kali išło aficyjnaje hałasavańnie. Potym nalacieli ludzi ŭ čornym. Dastałasia ŭsim, ale Niaklajevu bolš za astatnich. Jaho sa strasieńniem mozhu dastavili ŭ Balnicu chutkaj dapamohi.

Isnuje niekalki najbolš raspaŭsiudžanych viersij hetaha zdareńnia.

I. U demanstrantaŭ prosta sprabavali zabrać hukaŭzmacnialnuju techniku. Kali ž źbivali Niaklajeva, to nie raźličyli ź siłaj.

II. Niaklajeva vyklučyli z hulni płanamierna. Alaksandr Fiaduta vykazaŭ zdahadku, što heta mahli być siły, zacikaŭlenyja ŭ radykalizacyi Płoščy. Palittechnołah kaža, što «Havary praŭdu» była zacikaŭlenaja tolki ŭ mirnym raźvićci Płoščy. Značyć, niekatoryja inšyja kandydaty byli nastrojeny bolš rašuča. Takim čynam, kali byŭ vyklučany Niaklajeŭ, to inicyjatyvu ŭ svaje ruki amal bieśpieraškodna brali bolš radykalnyja kandydaty.

III. Praz paru dzion paśla Płoščy byŭ zvolnieny načalnik «Ałmaza» Karpiankoŭ. Nie vyklučana, što hetaja adstaŭka taksama mahła być źviazanaja sa źbićciom Niaklajeva. Karpiankoŭ ličyŭsia blizkim siabram byłoha ministra Uładzimira Navumava. Taho samaha Navumava, jaki pracuje ŭ maskoŭskaj firmie, hiendyrektara jakoj pryznačaje asabista Uładzimir Pucin. Karpiankoŭ z Navumavym razam pačynali ŭ «Ałmazie», potym pracavali ŭ achovie Łukašenki. Praz Karpiankova, kažuć niekatoryja, Maskva mahła paŭpłyvać na chadu Płoščy, sarvaŭšy mirny vynik i tym samym pryznańnie vybaraŭ Jeŭropaj.

Pa našych źviestkach, niekatoryja z aktyvistaŭ «Havary praŭdu» na nastupnyja dni paśla vybaraŭ mieli avijabilety na paŭdniovyja kurorty.

Heta značyć, što da doŭhaha supraćstajańnia jany nie rychtavalisia. Pavodle słovaŭ Fiaduty, kampanija była zacikaŭlenaja ŭ mirnaj Płoščy. «Jak i Łukašenka», — miarkuje Fiaduta, choć nie moža viedać apošniaha.

Zahadka № 2. Chto pavioŭ ludziej na płošču Niezaležnaści?

Stajać na Kastryčnickaj doŭhi čas ludzi nie mahli. Pa-pieršaje, vialikaja častka placa była zalitaja koŭzankaj. Pa-druhoje, raŭła muzyka, što navat pobač z vystupoŭcami było mała što čuvać. Pa-treciaje, kandydaty bajalisia paŭtaryć «pamyłku Milinkieviča», h.zn. stajać na miescy.

Mikoła Statkievič tady zaklikaŭ: «Davajcie pojdziem, paprosim Łukašenku vyzvalić hety budynak». Žurnalisty zrazumieli heta jak zaklik iści da Administracyi prezidenta, kinuŭšysia ŭ skvier u bok Doma aficeraŭ. Tym časam kałona, zaniaŭšy prajeznuju častku praśpiekta, nakiravałasia da płoščy Niezaležnaści.

Kandydaty i davieranyja asoby byli daloka nie napieradzie kałony. Na niejki čas jany jašče spynilisia na skryžavańni z Enhielsa, kab vieści pieramovy z supracoŭnikami DAI.

Što rabiłasia napieradzie, chto vioŭ za saboj kałonu, niezrazumieła.

Nie vyklučana, što heta mahli być zahadzia padrychtavanyja pravakatary, jakija zaklikali ludziej u padrychtavanuju pastku. Ale mahčyma, heta byli niejkija ludzi Sańnikava ci Niaklajeva.

«Usio pajšło pa płanu Sańnikava», — skazaŭ u intervju «NN» Dźmitry Us.

Zahadka № 3. Ci byŭ u kandydataŭ płan?

Alaksandr Fiaduta raskazaŭ, što kandydaty mielisia damahacca sustrečy ź Siarhiejem Sidorskim. Vieści ź im pieramovy, jak z čałaviekam, jakomu naležyć ułada paśla taho, jak nie abirajuć prezidenta. Kandydaty płanavali nacisnuć na knopku ŭ Domie ŭrada, a adtul da ich musiŭ spuścicca dziažurny. Mienavita jamu i pavinny byli pieradać rezalucyju. Mitynhoŭcy ž musili stajać da toj pary, pakul Sidorski nie daść adkaz.

Vyhladaje, što hetki płan byŭ uzhodnieny pamiž Niaklajevym i Sańnikavym. Ale Niaklajeva na Płoščy nie było, tamu vykonvać jaho musiŭ adzin Sańnikaŭ.

«Da płoščy Niezaležnaści ŭsio išło pavodle płanu», — kaža Fiaduta.

Miž tym, Vital Rymašeŭski na sudzie nad Andrejem Sańnikavym u pakazańniach kazaŭ, što na prystupkach Doma prafsajuzaŭ było damoŭlena iści da budynka Administracyi prezidenta, uziaŭšy jaho ŭ ludskaje koła, kab nie dać bić škło.

«Płan sabracca na płoščy i pajści da budynka Administracyi prezidenta, kab stać vakoł jaho ŭ ačapleńni, — paćviardžaje kandydat ad BNF Ryhor Kastusioŭ. — Heta nie płan Kastusiova, jaho viedali i źbiralisia prytrymlivacca ŭsie kandydaty, što sabralisia 19 śniežnia na płoščy Kalinoŭskaha».

Jaki byŭ płan Statkieviča, absalutna nieviadoma. Napiaredadni jon kazaŭ, što heta budzie zaležać ad toj kolkaści ludziej, što pryjdzie na Płošču.

Vyhladaje, što takija kandydaty, jak Rymašeŭski, Kastusioŭ ci Michalevič, zusim nie viedali pra płan Sańnikava-Niaklajeva iści da Sidorskaha.

Zahadka № 4. Adkul uzialisia rydloŭki?

Raniej vykazvałasia dumka, što za pačatkam šturmu Doma ŭrada stajali pravakatary. Mienavita jany pieršymi pačali bić dźviery budynka, a ŭžo potym za imi pabiehli ŭdzielniki akcyi.

Mnohija błohiery sprabavali znajści pravakataraŭ siarod tych ludziej, što stajali na hanku Doma ŭrada. Pieršym takim byŭ nazvany ahient «Navušnik» Uładzimir Chamičenka. Chłopiec, jaki vyjšaŭ z turmy za dva tydni da Płoščy. Jon nikoli nie byŭ u apazicyi. Chamičenka vychoŭvaŭsia ŭ internacie. Jość pytańni i da psichičnaha raźvićcia chłopca.

Viadoma, što takoha čałavieka śpiecsłužby mahli skarystać u svaich metach. Potym byli inšyja sproby znajści pravakataraŭ. Pa nieaściarožnaści nazyvalisia imiony Alaksandra Małčanava i Vitala Macukieviča, jakija potym byli asudžanyja.

Z Macukievičam uvohule atrymałasia prykraja situacyja. Jaho asudzili, u tym liku, na asnovie pakazańniaŭ niekatorych demakratyčnych aktyvistaŭ, a taksama siabroŭ, jakija takim čynam ratavali siabie. Jaho mnohija paśpieli zaličyć da pravakataraŭ.

Mnohija hipotezy pra pravakataraŭ hruntavalisia na zvyčajnych infarmacyjnych źlivach, tamu da ich treba stavicca hranična aściarožna.

Bolej pravakataraŭ znajści nie ŭdałosia. Naturalna, što dla pačatku «šturmu» dastatkova było nanieści niekalki pieršych udaraŭ pa škłu, jakija nie paśpieli zafiksavać reparciory, paśla čaho ŭžo spracavaŭ efiekt natoŭpu.

Dyk voś, na niekatoryja pytańni sudy adkazaŭ tak i nie dali

. Fatohrafami było zafiksavana, jak niejki niemałady mužčyna nios da ŭvachoda ŭ Dom urada niekalki rydlovak.

*** Ad redaktara. Razabracca ŭ zahadkach Płoščy važna, kab zrazumieć, chto byŭ chto. Razam z tym, my ličym, što ŭsie palitviaźni musiać być vyzvalenyja. Niezaležna ad čyichści płanaŭ, Płošča sabrałasia, bo ludzi vykazvali svoj pratest suprać parušeńniaŭ demakratyi i pravoŭ čałavieka.

• 0
• 0
• 0
• 0
• 0
• 0
• 0
• 0