Načnoje palavańnie na ŭlotki

Siońnia nočču, prykładna a 2.00 kala mikrarajonu Šabany ŭ Miensku była zatrymanaja mašyna kandydata na deputata Mienskaha harsavietu, čalca partyi BNF Sieržuka Karpoviča razam ź jahonymi davieranymi asobami. U mašynie znachodzilisia ahitacyjnyja materyjały čatyroch zarehistravanych kandydataŭ, u tym liku lidera partyi BNF Vincuka Viačorki. Zatrymanych adpuścili praz try hadziny, ahitacyjnyja ŭlotki zastalisia ŭ milicyi.

U źviazku z zatrymańniem svaich ahitacyjnych materyjałaŭ Vincuk Viačorka maje namier źviarnucca ŭ Centarvybarkam. Sa słovaŭ spadara Viačorki, ciapier jahonyja ahitacyjnyja materyjały znachodziacca pad aryštam u Zavadzkim rajonnym upraŭleńni milicyi Miensku.

Padstavaj dla zatrymańnia stała toje, što ŭ supracoŭnikaŭ milicyi źjaviŭsia sumnieŭ nakont sapraŭdnaści dakumentaŭ na nakład pradukcyi. Ahitacyjnyja materyjały byli nadrukavanyja ŭ adpaviednaści z Vybarčym kodeksam i na hrošy, jakija vydatkoŭvajucca dla kandydataŭ na deputaty.

Kiroŭcu Ihara Ciškina, jaki pieravoziŭ drukavanuju pradukcyju na ŭłasnaj aŭtamašynie, buduć sudzić pavodle artykułu administracyjnaha kodeksu za «parušeńnie zakanadaŭstva ab vybarach, referendumie, adklikańni deputata». Pakarańnie pavodle hetaha artykułu praduhledžvaje štraf da 10 bazavych vieličyniaŭ abo papraŭčyja pracy z utrymańniem častki zarobku.

Ulotki milicyja kanfiskavała. Jak patłumačyli ŭ Kastryčnickim rajadździele, jany buduć pieradadzienyja na ekspertyzu pavodle źmiestu – ci niama ŭ ich zakliku da źviaržeńnia dziaržaŭnaha ładu abo jakich parušeńniaŭ Zakonu ab vybarach.

Što da źmiestu, to va ŭlotkach «Svabodu vybaru!» byli apisanyja pryčyny, ź jakich haradzkaja i abłasnaja vybarčyja kamisii nie zarehistravali kandydatami na vybary šerah viciebskich demakratyčnych aktyvistaŭ: Tacianu Sieviaryniec, maci viadomaha moładzievaha palityka, Chrystafora Žalapava, kiraŭnika abłasnoha štabu Alaksandra Milinkieviča ŭ časie minułych prezydenckich vybaraŭ, miascovaha lidera sacyjał‑demakrataŭ «Narodnaje Hramady» Alaksieja Haŭrucikava, redaktara hazety pradprymalnikaŭ «My i rynok» Siarhieja Parsiukieviča i suśvietna viadomaha spartoŭca Ihara Kanyhina.

Ulotki pryznačalisia dla raspaŭsiudu ŭ tych vybarčych akruhach Viciebsku, dzie mieli namier balatavacca hetyja asoby.

Zatrymanaha Ihara Ciškina adpuścili, zahadaŭšy čakać pozvy ŭ sud. Pa darozie z pastarunku milicyja zatrymała tych, chto čakaŭ u pastarunku jahonaha vyzvaleńnia: supracoŭniki DAI spynili mašynu Chrystafora Žalapava, u jakoj jechali Siarhiej Parsiukievič, Alaksiej Haŭrucikaŭ, siabra partyi BNF Kastuś Pierahud i miascovaja karespandentka «Radyjo Svaboda». Pratrymaŭšy kala paŭhadziny i pierapisaŭšy asabistyja źviestki kiroŭcy dy pasažyraŭ, milicyjanty dazvolili ŭsim raźjechacca.

Fota Partyja BNF