Žurnalisty-zajaŭniki pabyvali ŭ Hienprakuratury

Siońnia šaściora z 30-ižurnalistaŭ-padpisantaŭ «kalektyŭnaha zvarotu» da hienieralnaha prakurora sustrelisia z načalnikam upraŭleńnia pa nahladzie za vykanańniem zakanadaŭstva i zakonnaściu pravavych aktaŭ prakuratury Paŭłam Radzivonavym.

Sp. Radzivonaŭ skazaŭ, što piśmovy adkaz na zvarot najbližejšym časam budzie dasłany adnamu z padpisantaŭ. Siońnia ž jon prosta raspavioŭ pra zachady, zroblenyja prakuraturaj u źviazku sa zvarotam. U pryvatnaści, pra aficyjny list, jaki hienprakuror Ryhor Vasilevič 15 lipienia nakiravaŭ ministru ŭnutranych spraŭ Anatolu Kulašovu z napaminam pra pravy žurnalistaŭ.

«Pradstaŭnik prakuratury siońnia ŭ razmovie padkreśliŭ, što, kali dziaržaŭnyja struktury prymianiajuć zachady prymusovaha paradku, to i sami jany musiać stroha prytrymlivacca norm zakanadaŭstva, — raspavioŭ paśla sustrečy adzin z padpisantaŭ zvarotu, namieśnik staršyni BAŽ Andrej Bastuniec. — U prakuratury spadziajucca, što taki napamin rabotnikam milicyi budzie dastatkova efiektyŭnym, kab praduchilić u budučym prynamsi masavaje parušeńnie pravoŭ žurnalistaŭ. U toj ža čas, sp. Radzivonaŭ padkreśliŭ, što ŭ paciarpiełych žurnalistaŭ jość mahčymaść padać asabistyja skarhi na dziejańni siłavikoŭ."

Na sustrečy prysutničaŭ hałoŭny redktar «Jeŭraradyjo» Vital Zybluk, jaki dniami raspaviadaŭ BAŽ pra chod raźbiralnictva pa asobnaj skarzie troch žurnalistaŭ radyjostancyi. Siońnia vyśvietliłasia, što na padstavie hetaj skarhi v.a. hienieralnaha prakurora 2 žniŭnia vynies ministru ŭnutranych spraŭ asabistaje pradstaŭleńnie.

«Pa słovach sp-ra Radzivonava, prakuratura zapatrabavała pravieści z rabotnikami MUS tłumačalnuju rabotu, źbiaśpiečyć vykanańnie patrabavańniaŭ administratyŭnaha i pracesualna-vykanaŭčaha kodeksaŭ, arhanizavać dla milicyjantaŭ „kursy“ pa vyvučeńni peŭnych norm zakanadaŭstva, a taksama ŭźniała pytańnie pra mahčymaść pryciahnieńnia vinavatych da dyscyplinarnaj adkaznaści», — raspavioŭ A. Bastuniec.

***

Nahadajem, što 13 lipienia hrupa z 30-i žurnalistaŭ roznych ŚMI pieradała ŭ Hienprakuraturu «kalektyŭny zvarot»

z nahody zatrymańniaŭ i brutalnaha abychodžańnia z boku siłavikoŭ u časie vuličnych akcyj, a taksama z nahody nieabhruntavanych sudovych rašeńniaŭ u dačynieńni da šerahu žurnalistaŭ. Anałahičny zvarot byŭ nakiravany ministru ŭnutranych spraŭ, a kopii — ministru infarmacyi i staršyni Viarchoŭnaha suda.

Pakul što aficyjny adkaz pryjšoŭ tolki ź Viarchoŭnaha suda na imia adnaho z padpisantaŭ — namieśnika staršyni BAŽ Andreja Alaksandrava. Naśmieśnik staršyni suda Valeryj Kalinkovič napisaŭ, što «sudździ i inšyja słužbovyja asoby Viarchoŭnaha suda» nie majuć prava ŭmiešvacca ŭ razhlad kankretnych sudovych spraŭ, i što pryciahnutyja da adkaznaści asoby, nie zhodnyja z sudovymi vierdyktami, majuć prava abskardzić ich sami.

• 0
• 0
• 0
• 0
• 0
• 0
• 0
• 0