Mienskija ŭłady vyrašyli dapamahčy šmatdzietnym siemjam i vyłučyć 25 dołaraŭ na padrychtoŭku da škoły.
Mienskija ŭłady vyrašyli dapamahčy šmatdzietnym siemjam i vyłučyć 25 dołaraŭ na padrychtoŭku da škoły.
Niekalki dzion tamu Mienharvykankam padličyŭ, što na toje, kab nabyć usio nieabchodnaje da navučalnaha hoda, treba patracić ad 500 tys. da 2 młn rub. Takija ličby nazvaŭ načalnik upraŭleńnia handlu i pasłuhaŭ Mienharvykankamu Andrej Novikaŭ na presavaj kanfierencyi 29 lipienia.
Ułaśniki kramaŭ kažuć, što kancylarski bum pačaŭsia jašče ŭ kancy minułaha navučalnaha hoda – u traŭni. «Baćki, napeŭna, adčuvali, što praz try miesiacy ŭsio padaražaje, tamu zapasalisia zahadzia, – patłumačyła dyrektarka kramy «Śvietač» Ina Jeńčyk. – Ale pakupnikoŭ chapaje i ciapier».
Jana paviedamiła, što košty na kancylarskija tavary ŭźnialisia ŭ siarednim na 20–30 %: «Padaražali sšytki, albomy, pryčym jak biełaruskija, tak i rasiejskija – takaja situacyja z usioj papiarovaju pradukcyjaj».
Košty na adzieńnie taksama ŭźnialisia. Školnaja forma biełaruskaj vytvorčaści kaštuje ciapier ad 100 tys. rub., letaś takaja samaja kaštavała 65 tys. rub. Ceny na čaraviki ŭ firmovaj kramie pačynajucca ad 220 tys. rub.
U Mienharvykankamie kažuć, što razumiejuć, nakolki baćkam składana, tamu dla šmatdzietnych siemjaŭ vydzielać adnarazovuju dapamohu. «Jaje pamier fiksavany i nie zaležyć ad zarobku baćkoŭ – 30 % biudžetu pražytkovaha minimumu, to bok kala 25 dołaraŭ pavodle aficyjnaha kursu», – patłumačyła staršynia adździełu sacyjalnaj dapamohi Iryna Dudko.
Hetyja hrošy vydzielać na ŭsiu siamju. Kab atrymać ich, treba aformić daviedku ŭ škole, paśla zanieści jaje ŭ «Biełarusbank», i tolki tady hrošy pieraviaduć na admysłovy rachunak siamji – jaho treba stvaryć zahadzia.
Pavodle aficyjnych źviestak, u Miensku naličvajecca bolš za 5,5 tys. šmatdzietnych siemjaŭ. Ahułam ź biudžetu stalicy na padrychtoŭku dziaciej da škoły vydatkujuć 27,5 tys. dołaraŭ.
Kamientary