Historyja pieramovaŭ ułady z apazicyjaj — Łukašenka zaŭždy abvodziŭ vakoł palca

Prapanova Alaksandra Łukašenki «pradstaŭnikam usich palityčnych siłaŭ sieści za kruhły stoł dla vypracoŭki zachadaŭ pa palapšeńni situacyi ŭ krainie» — užo čaćviertaja za čas jahonaha prezidenctva. Try papiarednija nie dali nijakich vynikaŭ.

Upieršyniu ideju «kruhłaha stała» ŭsich palityčnych siłaŭ nieŭzabavie paśla pieramohi A.Łukašenki na prezidenckich vybarach 1994 hoda prapanoŭvaŭ jaho pamočnik Siarhiej Posachaŭ.

Druhaja sproba ŭnutrybiełaruskaha dyjałohu była zroblenaja ź inicyjatyvy ES u 1997 hodzie, paśla kanstytucyjnaha refierendumu 1996 hodm i ŭviadzieńnia pieršych dypłamatyčnych abmiežavańniaŭ adnosna aficyjnaha Minska z boku Zachadu. Pieramovy pačalisia 17 červienia 1997 hoda. Uradavy bok pradstaŭlali ministr zamiežnych spravaŭ Ivan Antanovič, namieśnik kiraŭnika administracyi Ivan Paškievič i načalnik hałoŭnaha ŭpraŭleńnia hramadska-palityčnaj infarmacyi administracyi Michaił Padhajny. Viarchoŭny Saviet pradstaŭlali daśviedčanyja staršynia razahnanaha Viarchoŭnaha Savieta Miačesłaŭ Hryb, vice-śpikier Hienadź Karpienka i staršynia mižnarodnaj kamisii parłamienta Piatro Kraŭčanka.

Nastupnaja sproba dyjałohu była zroblenaja ŭ 1999 hodzie pad ehidaj kansultacyjna-naziralnaj misii ABSIE na čale z Chansam-Hieorham Vikam. U tych pieramovach z uradavaha boku ŭdzielničali pamočnik prezidenta Michaił Sazonaŭ, redaktar haziety «Sovietskaja Biełoruśsija» Pavieł Jakubovič, dyrektar Instytuta sacyjalna-palityčnych daśledavańniaŭ pry administracyi prezidenta Jaŭhien Matusievič i inšaja asoby. Apazicyjny bok pradstaŭlali: ad Abjadnanaj hramadzianskaj partyi — Anatol Labiedźka i Stanisłaŭ Bahdankievič; ad Partyi kamunistaŭ Biełarusi — Siarhiej Kalakin i Alena Skryhan, ad Narodnaj Hramady — Mikoła Statkievič i Miačesłaŭ Hryb; ad BSDH — Stanisłaŭ Šuškievič i Aleh Trusaŭ, ad Partyi pracy — Leanid Lemiašonak; ad ŁDPB — Siarhiej Hajdukievič i Aleh Markievič; ad BNF — Jury Bieleńki; ad Partyi žančyn «Nadzieja» — Valancina Palevikova. U skład apazicyjnaj delehacyi taksama ŭvachodziŭ kiraŭnik centra pravavoj abarony ŚMI pry Biełaruskaj asacyjacyi žurnalistaŭ Michaił Pastuchoŭ, ekśpiert centru pravavoj abarony ŚMI Jury Taparašaŭ i hałoŭny redaktar ​​analityčnaj słužby BiełaPAN Uładzimir Hłod.

• 0
• 0
• 0
• 0
• 0
• 0
• 0
• 0