U 1998 hodzie jana pryjšła ŭ Kupałaŭski teatr i stała sapraŭdnaj zorkaj biełaruskaj sceny. Adnak samaja viadomaja rola Zielankoŭskaj — Nastaśsia Słuckaja ŭ adnajmiennym filmie, jaki vyjšaŭ u 2003 hodzie. «Nastaśsia Słuckaja» vyjaviłasia adnym z samych papularnych biełaruskich filmaŭ, siarod hledačoŭ navat chadziła lehienda pra isnavańnie alternatyŭnaj viersii stužki z absalutna inšymi dyjałohami, jakuju pakazvajuć vyklučna padpolna. Tolki za hetuju rolu Śviatłana Zielankoŭskaja atrymała piać roznych uznaharodaŭ. Da taho ž, spadarynia Zielankoŭskaja siabruje ź Siarhiejem Michałkom i zdymajecca ŭ klipach «Lapisaŭ».
Jakija pieśni nazavie Śviatłana siarod svaich lubimych?
«Biełaruskaja narodnaja pieśnia «Darožka» sa mnoj razam usio žyćcio. Ja rehularna viartajusia da jaje. Jana vielmi śvietłaja, narodnyja pieśni — heta i jość samo žyćcio, sapraŭdnyja śpievy dušy. Nastroj hetaj pieśni mnie vielmi blizki.
Adnojčy bard Alaksiej Halič śpieŭ «Pahoniu» na vieršy Bahdanoviča, ja była vielmi ŭražanaja, i paprasiła jaho naśpiavać mnie miełodyju, kab ja mahła jaje zapomnić. Vielmi lublu hetuju viersiju «Pahoni». Heta pieśnia prymušaje pracavać serca. Jana sapraŭdy zapalvaje enierhijaj, a što takoje našaje žyćcio? Heta i jość enierhija.
Na žal, znajści «Pahoniu» ŭ vykanańni Alaksieja Haliča ŭ nas nie atrymałasia. Tamu prapanujem vam viersiju z alboma «Ja naradziŭsia tut»
I, kaniečnie, pieśnia «Lapisa Trubiackoha» «Hraj». Heta pieśnia spałučaje ŭ sabie mieładyčnaść, moc, jaskravaść. Zmročny kuplet raptoŭna pierachodzić u prypieŭ, jaki hučyć jak podych svabody, pieramohi. Heta pieśnia pra nabalełaje — my ź Siarhiejem šmat abmiarkoŭvali jaje. Heta vielmi mocnaja pieśnia, jana adnačasova liryčnaja i nabalełaja. Adna z samych lubimych maich pieśniaŭ, jana, jak i papiarednija dźvie, vielmi śvietłaja i pry hetym niasie stanoŭčuju enierhiju.
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii18
Kamientary