Stvarajecca fond arendnaha žylla

U Biełarusi stvarajecca fond arendnaha žylla. Heta praduhledžana ŭkazam prezidenta № 512 «Ab niekatorych pytańniach vykarystańnia dziaržaŭnaha žyllovaha fondu», jaki Alaksandr Łukašenka padpisaŭ 8 listapada.

Jak paviedamiła pres-słužba prezidenta, dakumientam praduhledžana stvareńnie fondu žyłych pamiaškańniaŭ kamiercyjnaha vykarystańnia dziaržaŭnaha žyllovaha fondu ź liku svabodnych (vyzvalenych) žyłych pamiaškańniaŭ dziaržaŭnaha žyllovaha fondu, a taksama nabytych, pabudavanych (rekanstrujavanych) žyłych damoŭ śpiecyjalna z hetaj metaj.

Pry hetym finansavańnie budaŭnictva (rekanstrukcyi), nabyćcio žyłych pamiaškańniaŭ kamiercyjnaha vykarystańnia płanujecca ažyćciaŭlać za košt biudžetnych srodkaŭ, srodkaŭ, atrymanych ad zdačy žyłych pamiaškańniaŭ kamiercyjnaha vykarystańnia, i inšych krynic, nie zabaronienych zakanadaŭstvam.

Ukazam dajecca prava na atrymańnie žyłych pamiaškańniaŭ kamiercyjnaha vykarystańnia hramadzianam, jakija stajać na ŭliku dla palapšeńnia žyllovych umoŭ, a taksama jakija nie stajać na takim uliku.

Žyłyja pamiaškańni kamiercyjnaha vykarystańnia nie padlahajuć abmienu, raździełu, prodažu ci pryvatyzacyi, a taksama zdačy pa dahavoru padnajmu.

Va ŭkazie vyznačany paradak uklučeńnia žyłych pamiaškańniaŭ dziaržaŭnaha žyllovaha fondu ŭ skład žyłych pamiaškańniaŭ kamiercyjnaha vykarystańnia, paradak davańnia žyłoha pamiaškańnia kamiercyjnaha vykarystańnia, apłaty za karystańnie takim žyłym pamiaškańniem i za žyllova-kamunalnyja pasłuhi, paradak zaklučeńnia dahavora najmu žyłoha pamiaškańnia kamiercyjnaha vykarystańnia i paradak vysialeńnia ź jaho.

Pamier płaty za karystańnie žyłymi pamiaškańniami kamiercyjnaha vykarystańnia budzie vyznačacca «zychodziačy z pamieru bazavaj staŭki płaty za karystańnie takimi pamiaškańniami, jakaja ŭstanaŭlivajucca Savietam ministraŭ, z prymianieńniem kaeficyjentaŭ, vyznačanych abłvykankamami i Minharvykankamam u zaležnaści ad miesca znachodžańnia žyłoha pamiaškańnia».

Srodki, atrymanyja ad zdačy žyłych pamiaškańniaŭ kamiercyjnaha vykarystańnia, buduć nakiroŭvacca na budaŭnictva ci rekanstrukcyju takich pamiaškańniaŭ. «Takaja miera dazvolić pastajanna pavialičvać dziaržaŭny žyllovy fond dla zdačy pa dahavorach najmu žyłych pamiaškańniaŭ kamiercyjnaha vykarystańnia. Tym samym buduć zabiaśpiečany akupnaść zatrat na stvareńnie fondu i viartańnie biudžetnych srodkaŭ. Akramia taho, stvareńnie takoha fondu budzie ŭ peŭnaj stupieni spryjać vyrašeńniu žyllovaj prablemy hramadzian», — adznačajecca ŭ paviedamleńni pres-słužby.

• 0
• 0
• 0
• 0
• 0
• 0
• 0
• 0