Kolki hrošaj zarablajuć niabožčyki?

Časopis «Forbes» apublikavaŭ štohadovy rejtynh pamierłych znakamitaściaŭ pavodle ich ciapierašnich zarobkaŭ. Upieršyniu za ŭsiu historyju isnavańnia rejtynha na pieršym miescy apynuŭsia salist «Nirvany» Kurt Kabejn, jaki pasunuŭ z tronu lehiendu rok‑n‑roła Ełvisa Preśli – biezumoŭnaha lidera rejtynhu za ŭsie papiarednija hady. Rejtynh bazujecca na licenzavanych dachodach, atrymanych dziakujučy tvoram pamierłych zorak.

Kurt Kabejn

Kurt Kabejn z muzyčnaha hurta «Nirvana» zarabiŭ ŭ adnym tolki minułym hodzie 50 młn. dalaraŭ. 5 krasavika 1994 h. uva ŭzroście 27 hadoŭ jon skončyŭ žyćcio samahubstvam.

Ełvis Preśli

U 2005 h. Ełvis jašče zarabiŭ 45 młn. dalaraŭ; u 2006 h. jon mieŭ dachod «usiaho tolki» 42 młn. dalaraŭ. Lideram prodažaŭ siarod jahonych tvoraŭ pa‑raniejšamu źjaŭlajucca dyski «Greatest Hits». Jon pamior 16 žniŭnia 1977 h. uva ŭzroście 42 hadoŭ ad paraliča serca.

Čarłz M. Šulc

Štodzionna ŭ 2400 hazetach pa ŭsim śviecie možna sustreć Čarli Braŭna, Snupi i inšych hierojaŭ seryi komiksaŭ «Peanuts». Adnyja tolki pravy na hetych persanažaŭ prynieśli ich aŭtaru ŭ minułym hodzie 35 młn. dalaraŭ. 12 lutaha 2000 h. jon pamior uva ŭzroście 77 hadoŭ ad raku.

Džon Lenan

U ZŠA «Beatles» pa‑raniejšamu štohod pradajuć zvyš 1 młn. dyskaŭ. 24 młn. dalaraŭ ad ich prodažu iduć u kišeni Džona Lenana. Muzyka byŭ zabity 8 śniežnia 1980 h. uva ŭzroście 40 hadoŭ.

Albert Ejnštejn

Bolšaść hrošaŭ Ejnštejn pa‑raniejšamu zarablaje dziakujučy prodažu pravoŭ na jahonuju vyjavu. U minułym hodzie zarobak navukoŭca skłaŭ 20 młn. dalaraŭ. 18 krasavika 1955 h. jon pamior uva ŭzroście 76 hadoŭ svajoj śmierciu.

Endzi Ŭorchał

A mastak Endzi Ŭorchał zarablaje hrošy pravami na svaje karciny. Bujnyja marki kštałtu «Levi Strauss» nie zastajucca abyjakavymi da jaho mastactva. 22 lutaha 1987 h. Uorchał pamior uva ŭzroście 58 hadoŭ ad uskładnieńniaŭ paśla aperacyi. U 2006 h. jon zarabiŭ 19 młn. dalaraŭ.

Doktar Sejs (Teador Hiejziel)

Vynachodnik Hrynča u minułym hodzie zarabiŭ 10 młn. dalaraŭ dziakujučy prodažu jahonych dziciačych knižak. Akramia taho, ciapier Hrynča možna pabačyć i na Bradvei — 12 pastanovak na tydzień (na 4 bolej za standart) havorać sami za siabie. Doktar Sejs pamior 24 vieraśnia 1991 h. uva ŭzroście 87 hadoŭ svajoj śmierciu.

Rej Čarłz

Nie źnikaje i zacikaŭlenaść muzykaj i žyćciom Reja Čarłza. Vialikaja častka z 10 młn. dalaraŭ, jakija jon zarabiŭ u 2006 h., pachodzić ad prodažu DVD. 10 červienia 2004 h. muzyka pamior uva ŭzroście 73 hadoŭ ad prablemaŭ ź piačonkaj.

Merylin Manro

Symbal halivudzkaha hlamuru jašče siońnia atrymlivaje hrošy dziakujučy reklamnym damovam. Siarod apošnich prajektaŭ – reklamnyja kampanii «Dom Perignon» i «General Motors». Vialikaja častka z zaroblenych u 2006 h. 8 młn. dalaraŭ pachodzić ad prodažu jaje ŭłasnaj seryi parfumy. 5 žniŭnia 1962 h. aktorka ŭva ŭzroście 36 hadoŭ pamierła ad pieradaziroŭki snatvornych srodkaŭ.

Džoni Keš

Džoni Keš pradaŭ u 2005 h. «tolki» 2,8 młn. dyskaŭ u ZŠA, u 2006 h. užo cełych 3,6 młn. Vypusk novaha albomu «Personal File», dzie źmieščanyja jašče raniej nievydavanyja pieśni, zrabiŭ značny ŭniosak u rost prodažaŭ — u 2006 h. Džoni Keš moh zapisać na svoj rachunak 8 młn. dalaraŭ. Jon pamior 12 vieraśnia 2003 h. uva ŭzroście 71 hadoŭ ad uskładnieńniaŭ dyjabetu.

Džon Tołkijen

Ludzi fanaciejuć ad hobitaŭ – dastatkova tolki pahladzieć na kolkaść pradadzienych DVD z trylohijaj «Uładar Piarścionkaŭ» za adzin minuły hod. Jany prynieśli Tołkijenu 7 młn. dalaraŭ. Aŭtar pamior 2 vieraśnia 1973 h. uva ŭzroście 81 hadoŭ ad jazvy.

Džordž Charysan

U červieni 2006 h. u Łas‑Vehasie pačaŭsia pakaz novaha šoŭ pad nazvaj «Love», jakoje karystajecca mnohimi pieśniami z repertuaru «Beatles». Heta pryniesła miž inšym 7 młn. dalaraŭ u kišeni Džordža Charysana, jaki pamior ad raku 29 listapada 2001 h. uva ŭzroście 58 hadoŭ.

Bob Marli

Najvialikšaja zorka rehi ŭsich časoŭ pa‑raniejšamu pradaje vialikuju kolkaść dyskaŭ. Akramia taho, u 2006 h. na rynak vyjšła padrabiaznaja ilustravanaja bijahrafija «Marley Legend», što, vidać, znajšła svajho čytača siarod šmatlikich jahonych prychilnikaŭ. 7 młn. dalaraŭ muzyka atrymaŭ u 2006 h. Jon pamior 11 traŭnia 1981 h. uva ŭzroście 36 hadoŭ ad raku. Darečy, 6 lutaha ŭsio prahresiŭnaje čałaviectva adznačyć jahony 62-i dzień narodzinaŭ.

• 0
• 0
• 0
• 0
• 0
• 0
• 0
• 0