Nacbank zajaŭlaje pra pahrozu devalvacyi praz emisijnaje refinansavańnia dziaržbankaŭ

Nacyjanalny bank Biełarusi kanstatuje zachavańnie vysokaj zaležnaści dziaržbankaŭ ad jaho karotkaterminovych resursaŭ i padkreślivaje emisijny charaktar takoj padtrymki, što pahražaje stabilnaści biełaruskaha rubla.

«Zachoŭvajecca vysokaja zaležnaść bankaŭ ad karotkaterminovych resursaŭ Nacyjanalnaha banka. Heta stvaraje dadatkovuju krynicu emisii, što ŭjaŭlaje pahrozu ŭstojlivaści nacyjanalnaj valuty», — zajaviŭ pieršy namieśnik staršyni praŭleńnia NBB Juryj Ałymaŭ na pašyranym pasiedžańni kiraŭnictva NBB, što prajšło ŭ kancy kastryčnika. Vystupleńnie Ju. Ałymava ŭ sieradu apublikavaŭ časopis NBB «Bankaŭski vieśnik».

Pry hetym Ałymaŭ ličyć deficyt likvidnaści biełaruskich bankaŭ pieršačarhovaj z prablem, jakija ŭźnikajuć u bankaŭskim siektary «z ulikam składanych umovaŭ raźvićcia ekanomiki».

Jon padkreślivaje, što rehulatar źbirajecca žorstka abmiežavać emisijnaje refinansavańnie bankaŭ. «Nacyjanalny bank u metach zabiaśpiečańnia ŭstojlivaści biełaruskaha rubla zrobić bolš žorstkimi padychody da akazańnia resursnaj padtrymki bankaŭ. Abjom refinansavańnia da kanca 2011 hoda budzie žorstka abmiežavany i pastupova źnižany», — skazaŭ Ałymaŭ.

Pavodle jaho słovaŭ, «u hetych umovach bankam daviadziecca samastojna vyrašać prablemy z ułasnaj likvidnaściu». «Nieabchodna vybudoŭvać kredytnuju palityku, u tym liku pry kredytavańni dziaržaŭnych prahram, z ulikam svaich mahčymaściaŭ pa farmavańni resursnaj bazy za košt nieemisijnych krynic», — skazaŭ jon. Ałymaŭ taksama zajaviŭ, što «Nacyjanalny bank budzie prymać miery pa minimizacyi rostu emisii najaŭnych hrošaj», nahadaŭšy, što za 9 miesiacaŭ abjom najaŭnych hrošaj u zvarocie vyras u 1,7 razu (na Br3,2 trłn), da Br7,7 trłn na 1 kastryčnika 2011 hoda. Jon rastłumačyŭ, što skaracić kolkaść najaŭnych NBB raźličvaje za košt «stabilizacyi ekanamičnaj situacyi i stymulavańnia terminovych bankaŭskich układaŭ u nacyjanalnaj valucie, udaskanaleńnia narmatyŭna-pravavoj bazy pa arhanizacyi najaŭnaha hrašovaha zvarotu, raźvićcia sistemy bieznajaŭnych raźlikaŭ».

Jak nahadvaje ahienctva, NBB z 19 kastryčnika abmiežavaŭ, a z 4 listapada całkam spyniŭ dostup bankaŭ da pastajanna dastupnych instrumientaŭ padtrymki likvidnaści (kredyty oviernajt i ŭhody svop oviernajt). Emisijnaja rublovaja likvidnaść dajecca ciapier tolki «Biełarusbanku» i «Biełahraprambanku» ŭ ramkach dvuchbakovych instrumientaŭ padtrymki likvidnaści ŭ «ručnym» režymie, na 1 dzień. Miž tym, niahledziačy na dekłaracyi ab uzmacnieńni žorstkaści emisijnaha refinansavańnia dziaržbankaŭ, u listapadzie siaredniadzionny abjom padtrymki likvidnaści dziaržbankaŭ praciahvaje zastacca na dakryzisnym uzroŭni i składaje Br3,5–4 trłn u dzień.

• 0
• 0
• 0
• 0
• 0
• 0
• 0
• 0