Mitrapalit Tadevuš Kandrusievič zaklikaŭ Łukašenku ŭvieści maratoryj na śmiarotnaje pakarańnie
havoračy pra apošnija padziei — śmiarotny prysud, vyniesieny Kavalovu i Kanavałavu.
«Źviartajusia da Prezidenta Respubliki Biełaruś Alaksandra Ryhoraviča Łukašenki i zakanadaŭčaj ułady ŭvieści maratoryj na śmiarotnaje pakarańnie, kab zatym zusim jaho admianić»,— adznačyŭ Mitrapalit Tadevuš Kandrusievič u intervju dla Catholic.by, havoračy pra apošnija padziei ŭ biełaruskim hramadstvie — śmiarotny prysud, vyniesieny Uładzisłavu Kavalovu i Dźmitryju Kanavałavu.
«Nijaki terarystyčny akt nie moža być apraŭdany i złačyncy pavinny atrymać spraviadlivaje pakarańnie. Pavodle vučeńnia Katalickaha Kaścioła, jakoje na hetuju temu vielmi šyroka pradstaŭlena u Katechizisie, abarona supolnaha dabra patrabuje, kab złačynca byŭ pazbaŭleny mahčymaści čynić zło. Vysiłak dziaržavy z metaj nie dapuścić raspaŭsiudžvańnia pavodzin, jakija parušajuć pravy čałavieka i asnoŭnyja pryncypy supolnaha hramadskaha žyćcia, adpaviadaje patrebie abarony supolnaha dabra.
Pravamocnaja hramadskaja ŭłada maje prava i abaviazak ustanavić pakarańnie, praparcyjanalnaje ciažaru złačynstva. Pieršaj metaj pakarańnia źjaŭlajecca vypraŭleńnie nieparadku, vyklikanaha złačynstvam. Akramia abarony hramadskaha paradku i biaśpieki ludziej, jano pavinna sadziejničać vypraŭleńniu vinavataha.
Kali poŭnaściu ŭstanoŭlena asoba i adkaznaść złačyncy, to tradycyjnaje vučeńnie Kaścioła nie vyklučaje śmiarotnaha pakarańnia, ale tolki tady, kali heta adziny mahčymy sposab abarony čałaviečaha žyćcia ad niespraviadlivaha ahresara. U toj ža čas Kaścioł zaklikaje da bieskryvavych mietadaŭ strymańnia i pakarańnia złačyncaŭ, pakolki jany najbolš adpaviadajuć kankretnym umovam ahulnaha dabra i hodnaści čałaviečaj asoby. Siońnia, źviartajučy ŭvahu na mahčymaści, jakimi vałodaje dziaržava dla praduchileńnia ciažkaha złačynstva i abiasškodžańnia złačyncy, nie pazbaŭlajučy kančatkova vinavataha mahčymaści vypravicca, vypadki absalutnaj nieabchodnaści vykarystańnia śmiarotnaha pakarańnia ŭžo vielmi redkija, a navat praktyčna ŭžo nie isnujuć. Pra heta śćviardžaŭ pry žyćci błahasłaŭlony Jan Pavieł II», — skazaŭ mitrapalit.
«Žyćcio čałavieka źjaŭlajecca samym vialikim Božym daram, jaki treba baranić ad začaćcia da naturalnaj śmierci. Navat kali złačynstva było varvarskim, pakarańnie nie pavinna być takim, bo pavodle navučańnia Chrysta, my pavinny kiravacca pryncypam nie „voka za voka i zub za zub“, ale pryncypam lubovi, i navat da tych, chto čynić nam zło», — zaznačyŭ Tadevuš Kandrusievič, i dadaŭ: «źviartajujasia da Prezidenta Respubliki Biełaruś Alaksandra Ryhoraviča Łukašenki i zakanadaŭčaj ułady ŭvieści maratoryj na śmiarotnaje pakarańnie, kab zatym zusim jaho admianić, zamianiŭšy pažyćciovym pazbaŭleńniem svabody, i pamiłavać usich asudžanych da vyšejšaj miery pakarańnia. Hetaha prosić Katalicki Kaścioł razam z Papam i biskupami va ŭsim śviecie dla tych krain, u jakich jašče isnuje kara śmiarotnaha pakarańnia».
Ciapier čytajuć
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty10
Kamientary