Naviedniki vitali adkryćcio pieradvybarčaha sajta putin2012.ru patrabavańniami adstaŭki.
12 studzienia startavaŭ sajt pieradvybarčaj kampanii premjer-ministra Rasii Uładzimira Pucina putin2012.ru.
Jon stvorany pry padtrymcy dziaržaŭnaha infarmacyjnaha ahienctva RIA Novosti. Sajt raskazvaje pra bijahrafiju, vopyt i zacikaŭlenaści pretendenta na prezidenckuju pasadu. Jon źmiaščaje prajekt pieradvybarčaj prahramy, a taksama maje rubryku «Narodnaje mierkavańnie».
Na fotazdymkach Pucin paŭstaje sapraŭdnym ruskim patryjotam. Raździeł «Bijahrafija» supravadžajecca zdymkam na fonie biarozak, u padrubrycy «Za rulom» premjer kiruje vyklučna rasijskim abo savieckimi aŭtamabilami — ad «Vołhi» z «Nivaj» da «Łady Kaliny».
Darma paciašalisia rasijskija błohiery sa sprobaŭ Pucina pieraniać u Łukašenki łaŭry chakieista №1. Raździeł «Zacikaŭlenaści» sustrakaje naviednikaŭ putin2012.ru vyjavaj premjera ŭ chakiejnaj formie. Čorny koler šlema vyhladaje simvalična — badaj što Uładzimir Uładzimiravič nie byŭ by suprać paraŭnańnia jaho z Dartam Vejderam. Nie mienš simvalizmu i asabistaj apiecy nad amurskim tyhram dy biełym miadźviedziem, padmacavanaja vykazvańniem samoha apiekuna: «Ja sam nie palaŭničy, tamu źviary mohuć spać spakojna».
Skandalnaje adkryćcio
Adkryćcio sajta adznačyłasia patrabavańniami syści ŭ adstaŭku i źniać kandydaturu na pasadu prezidenta, a taksama analityčnymi artykułami ŭ suśvietnych ŚMI.
«The Washington Post» adznačaje ihnaravańnie sajtam pratestaŭ u Rasii. A takcama adsutnaść infarmacyi pra česnyja vybary i česnuju ŭładu.
Niby padmacoŭvajučy napisanaje ŭ «WP», administracyja sajta nieŭzabavie prybrała krytyčnyja kamientary. Paźniej pres-sakratar Pucina nazavie ich «chakierskaj atakaj».
U svaju čarhu «Deutsche Welle» praanalizavała prajekt pieradvybarčaj prahramy premjera. Surazmoŭcy «DW», rasijskija palityki i palitołahi, vykazali niedaŭmieńnie i rasčaravańnie z nahody prajekta. Pa ich słovach, z takim naboram abiacańniaŭ da ŭłady iduć tyja, chto raniej nie zajmaŭ takich pasadaŭ. Tym bolš nie zrazumieła, jak kiraŭnik uradu patłumačyć vybarščykam, čamu nie ździejśniŭ toje, što abiacaje ciapier, u časy svajho raniejšaha prezidenctva.
Sajt Pucina adkazvaje na heta cytataj, źmieščanaj na hałoŭnaj staroncy: «Kali ja za štości biarusia, ja namahajusia davieści spravu da łahičnaha zaviaršeńnia, albo jak minimum pryvieści hetuju spravu da maksimalnaha efiektu».
Ciapier čytajuć
Jak u halečy śpivałasia radnia Łukašenki? Małaviadomyja fakty6
Kamientary