Da finału «Jeŭrafestu» Hiunieš rychtuje novuju pieśniu

Da finału televizijnaha muzyčnaha prajekta «Jeŭrafest», nacyjanalnaha adboračnaha tura konkursu pieśni «Jeŭrabačańnie-2012», Hiunieš padrychtuje novuju pieśniu, a astatnija vykanaŭcy dapracujuć numary.

Finał projdzie 14 lutaha ŭ staličnym Pałacy sportu.

Nahadajem, u paŭfinale Hiunieš vystupiła z baładaj And morning will come. Jak zajaviła śpiavačka 24 studzienia na pres-kanfierencyi ŭ Minsku, u finale budzie hučać novaja pieśnia. I pieśnia, i numar buduć kardynalna adroźnivacca ad taho, što było. «Heta budzie siurpryz, — skazała Hiunieš. — Ja chaču zachavać niekatoruju intryhu». Pavodle jaje słoŭ, zaraz pačynajucca repietycyi numara.

Finalistka Alena Łanskaja pra mahčymaść zamieny pieśni All my life, ź jakoj jana vystupała ŭ paŭfinale, skazała nastupnaje: «Skažu ščyra, na hety momant lepšaj za All my life pieśni my pakul nie znajšli. Kali da 14 lutaha my raptam znojdziem pieśniu, to, mahčyma, štości źmienicca». Pavodle jaje słoŭ, zaraz idzie praca nad pastanoŭkaj numara, raspracoŭvajucca kaściumy. «Nie chočacca raskryvać padrabiaznaści, bo heta ŭ pieršuju čarhu spabornictva, — skazała Łanskaja. — Heta budzie ŭ asnoŭnym praca sa śviatłom». Pavodle jaje słoŭ, vyrašana prybrać z numara skrypačoŭ. Łanskaja taksama adznačyła, što nadaje ŭvahu pracy nad anhlijskim vymaŭleńniem.

Jak zajaviŭ pradstaŭnik Viktoryi Aleški, kampazitar jaje pieśni Dream Jaŭhien Alejnik, u finale vykanaŭca nie budzie mianiać ni pieśniu, ni kancepcyju numara. Pry hetym poŭnaściu płanujecca źmianić anturaž i afarmleńnie. «Nam zdałosia, što na paŭfinalnym šou my krychu pierabrali z čyrvonym koleram. Buduć zrobleny bolš lohkija akcenty», — skazaŭ Alejnik. Da finału rychtujecca akrabatyčny numar z udziełam bek-vakalistaŭ. Alejnik śćviardžalna adkazaŭ na pytańnie, ci pracuje Aleška nad anhlijskim vymaŭleńniem. Adnak, pavodle jaho słoŭ, kłasičnaja estradna-simfaničnaja pieśnia «ŭ pryncypie apraŭdvaje akcent»: mnohija pryvykli słuchać takija tvory ŭ vykanańni francuzaŭ i italjancaŭ, jakija śpiavajuć z mocnym akcentam.

Hurt Litesound maje namier pakinuć dla finału kampazicyju We are the heroes. Jana atrymała stanoŭčy vodhuk ad pieramožcy konkursu «Jeŭrabačańnie-2009» narviežskaha muzykanta biełaruskaha pachodžańnia Alaksandra Rybaka. Pieśnia taksama maje «vielmi vialiki pośpiech» u internecie i ŭ žurnalistaŭ. Zaraz hurt zajmajecca padrychtoŭkaj numara.

Pradstaŭnik Uzari Nina Łachina paviedamiła, što vykanaŭca nie budzie mianiać pieśniu The winner, ale budzie dapracavana jaje aranžyroŭka, mahčyma, źmieny zakranuć rytm. Pry hetym numar, pavodle jaje słoŭ, «staŭ značna šyrejšym i cikaviejšym». «Budzie pryhoža, i malaŭniča, i jarka, i fiejeryčna», — abiacaje Łachina.

• 0
• 0
• 0
• 0
• 0
• 0
• 0
• 0