Да фіналу «Еўрафэсту» Гюнеш рыхтуе новую песню

Да фіналу тэлевізійнага музычнага праекта «Еўрафэст», нацыянальнага адборачнага тура конкурсу песні «Еўрабачанне-2012», Гюнеш падрыхтуе новую песню, а астатнія выканаўцы дапрацуюць нумары.

Фінал пройдзе 14 лютага ў сталічным Палацы спорту.

Нагадаем, у паўфінале Гюнеш выступіла з баладай And morning will come. Як заявіла спявачка 24 студзеня на прэс-канферэнцыі ў Мінску, у фінале будзе гучаць новая песня. І песня, і нумар будуць кардынальна адрознівацца ад таго, што было. «Гэта будзе сюрпрыз, — сказала Гюнеш. — Я хачу захаваць некаторую інтрыгу». Паводле яе слоў, зараз пачынаюцца рэпетыцыі нумара.

Фіналістка Алена Ланская пра магчымасць замены песні All my life, з якой яна выступала ў паўфінале, сказала наступнае: «Скажу шчыра, на гэты момант лепшай за All my life песні мы пакуль не знайшлі. Калі да 14 лютага мы раптам знойдзем песню, то, магчыма, штосьці зменіцца». Паводле яе слоў, зараз ідзе праца над пастаноўкай нумара, распрацоўваюцца касцюмы. «Не хочацца раскрываць падрабязнасці, бо гэта ў першую чаргу спаборніцтва, — сказала Ланская. — Гэта будзе ў асноўным праца са святлом». Паводле яе слоў, вырашана прыбраць з нумара скрыпачоў. Ланская таксама адзначыла, што надае ўвагу працы над англійскім вымаўленнем.

Як заявіў прадстаўнік Вікторыі Алешкі, кампазітар яе песні Dream Яўген Алейнік, у фінале выканаўца не будзе мяняць ні песню, ні канцэпцыю нумара. Пры гэтым поўнасцю плануецца змяніць антураж і афармленне. «Нам здалося, што на паўфінальным шоу мы крыху перабралі з чырвоным колерам. Будуць зроблены больш лёгкія акцэнты», — сказаў Алейнік. Да фіналу рыхтуецца акрабатычны нумар з удзелам бэк-вакалістаў. Алейнік сцвярджальна адказаў на пытанне, ці працуе Алешка над англійскім вымаўленнем. Аднак, паводле яго слоў, класічная эстрадна-сімфанічная песня «ў прынцыпе апраўдвае акцэнт»: многія прывыклі слухаць такія творы ў выкананні французаў і італьянцаў, якія спяваюць з моцным акцэнтам.

Гурт Litesound мае намер пакінуць для фіналу кампазіцыю We are the heroes. Яна атрымала станоўчы водгук ад пераможцы конкурсу «Еўрабачанне-2009» нарвежскага музыканта беларускага паходжання Аляксандра Рыбака. Песня таксама мае «вельмі вялікі поспех» у інтэрнэце і ў журналістаў. Зараз гурт займаецца падрыхтоўкай нумара.

Прадстаўнік Uzari Ніна Лахіна паведаміла, што выканаўца не будзе мяняць песню The winner, але будзе дапрацавана яе аранжыроўка, магчыма, змены закрануць рытм. Пры гэтым нумар, паводле яе слоў, «стаў значна шырэйшым і цікавейшым». «Будзе прыгожа, і маляўніча, і ярка, і феерычна», — абяцае Лахіна.

• 0
• 0
• 0
• 0
• 0
• 0
• 0
• 0