Sustreča kiraŭnikoŭ MZS Uschodniaha partniorstva prachodzić bieź Biełarusi

Pradstaŭniki Biełarusi nie ŭdzielničajuć u sustrečy ministraŭ zamiežnych spraŭ krain Uschodniaha partniorstva i Vyšahradskaj hrupy 5 sakavika ŭ Prazie. Pra heta paviedamiŭ pres-sakratar Ministerstva zamiežnych spraŭ Čechii Vit Kałarž.

«Biełaruskija ŭłady byli zaprošanyja na ŭzroŭni namieśnika ministra zamiežnych spraŭ. Vierahodna, miesca dla biełaruskaj delehacyi pakinuć pustym, i kresła, na žal, budzie svabodnym», — dadaŭ Kałarž.

U svaju čarhu pres-sakratar biełaruskaha MZS Andrej Savinych zajaviŭ: «My vyrašyli nie ŭdzielničać u hetym mierapryjemstvie. Udavacca ŭ detali nie maju namieru».

Tym časam, jak paviedamlaje MZS Čechii, na sustrečy čakajecca prysutnaść viarchoŭnaha pradstaŭnika ES pa zamiežnych spravach i palitycy biaśpieki Ketryn Eštan i jeŭrakamisara pa pytańniach pašyreńnia i palityki dobrasusiedstva Štefana Fiule.

Admova Biełarusi ad udziełu ŭ pražskaj sustrečy prachodzić na fonie dypłamatyčnaha kanfliktu pamiž Minskam i Brusielem.

***

27 lutaha Saviet ministraŭ zamiežnych spraŭ krain ES pryniaŭ rašeńnie pašyryć śpis nieŭjaznych u krainy Jeŭrasajuza pradstaŭnikoŭ biełaruskaj dziaržavy, uklučyŭšy ŭ jaho jašče 21 proźvišča. 28 lutaha biełaruskija ŭłady rekamiendavali kiraŭniku pradstaŭnictva Jeŭrasajuza Majry Mory i pasłu Polščy Lešaku Šarepku «vyjechać u svaje stalicy dla kansultacyj, kab davieści svajmu kiraŭnictvu ćviorduju pazicyju biełaruskaha boku ab nieprymalnaści nacisku i sankcyj». U adkaz na heta ŭsio krainy ES adklikali svaich pasłoŭ ź Minska.

Uschodniaje partniorstva — inicyjatyva ES, jakaja achoplivaje šeść krain Uschodniaj Jeŭropy i Paŭdniovaha Kaŭkaza: Armieniju, Azierbajdžan, Biełaruś, Hruziju, Małdovu i Ukrainu. UP było zasnavana 27 krainami ES i šaściu partniorskimi krainami na samicie ŭ Prazie 7 maja 2009 hoda. Inicyjatyva skiravana na ŭmacavańnie adnosin pamiž ES i jaho ŭschodnimi susiedziami za košt pahłybleńnia palityčnaha supracoŭnictva i ekanamičnaj intehracyi.

Vyšahradskaja hrupa, taksama viadomaja jak «Vyšahradskaja čaćviorka», — sajuz Vienhryi, Polščy, Słavakii i Čechii. Pakazvaje imknieńnie hetych centralna-jeŭrapiejskich dziaržaŭ supracoŭničać pa šerahu kirunkaŭ, jakija ŭjaŭlajuć uzajemnuju cikavaść, u miežach jeŭrapiejskaj intehracyi. VH utvorana 15 lutaha 1991 hoda na sustrečy prezidentaŭ Vienhryi, Polščy i Čechasłavakii ŭ Vyšahradzie (Vienhryja).

• 0
• 0
• 0
• 0
• 0
• 0
• 0
• 0