Chadyka: Ułady robiać drobnyja paskudstvy suprać «Čarnobylskaha šlachu»

Dazvoliŭšy šeście i mitynh 26 krasavika padčas «Čarnobylskaha šlachu», minskija ŭłady ŭsio ž zadavolili nie ŭsie prośby arhkamiteta pa praviadzieńni akcyi, paviedamiŭ adzin ź jaje zajaŭnikaŭ prafiesar Juryj Chadyka 20 krasavika na pres-kanfierencyi ŭ Minsku.

U pryvatnaści, ułady dazvolili pravieści šeście pa vulicy Surhanava pa tratuary, a nie pa pieršaj pałasie prajeznaj častki. «Nam rastłumačyli, što heta budzie pieraškadžać ruchu transpartu, chacia tyja ž tralejbusy mohuć spakojna jechać i pa druhoj pałasie. Liču, naadvarot, vialikaj kolkaści ludzi budzie składana pieramiaščacca pa tratuarach u viačerni čas, kali ludzi iduć z pracy, asabliva kala transpartnych prypynkaŭ», — skazaŭ Chadyka.

Akramia taho, adznačyŭ jon, arhkamitet chacieŭ atrymać ad uładaŭ harantyi, što hukaŭzmacnialnaja aparatura hetym razam nie budzie aryštavana. «Dakładnych harantyj my nie atrymali, chacia doŭha razmaŭlali z namieśnikam načalnika HUUS Minharvykankama Iharam Jaŭsiejevym. Ad jaho prahučała tolki vusnaja damoŭlenaść, što kali ŭsie papiery buduć aformleny pravilna, nichto aparaturu nie kranie», — paviedamiŭ Chadyka.

Siońnia ž u Minharvykankamie zajaŭniku akcyi było prapanavana padpisać papieru ab praviadzieńni prafiłaktyčnaj hutarki z metaj niedapuščalnaści parušeńnia zakanadaŭstva padčas masavaha mierapryjemstva. Pakolki ŭ vykankamie nie dali harantyj taho, što aparatura nie budzie aryštavana, Chadyka jaje padpisać admoviŭsia.

«Ułada ŭmieje tolki vystaŭlać niejkija patrabavańni, jana nie choča ni ŭ jakoj formie iści nasustrač hramadzianskaj supolnaści navat u taki dzień, jak čarhovaja hadavina avaryi na Čarnobylskaj AES.

Astatnija zajaŭniki akcyi — pradstaŭnik HA «Ekadom» i hramadskaj kampanii «Astravieckaja atamnaja — heta złačynstva» Taćciana Novikava, lidar Partyi BNF Alaksiej Janukievič, pradstaŭnik arhkamiteta pa stvareńni partyi «Biełaruskaja chryścijanskaja demakratyja» Dzianis Sadoŭski i namieśnik staršyni mižnarodnaj hramadskaj arhanizacyi «Małady front» (Čechija) Mikałaj Dziemidzienka — pad dakumientam ab praviadzieńni prafiłaktyčnaj hutarki padpisalisia.

Arhanizatary majuć namier pravieści šeście z 18.30 da 19.30 ad budynka prezidyuma Nacyjanalnaj akademii navuk pa vulicy Surhanava da parku Družby Narodaŭ, dzie adbudziecca hadzinny žałobny mitynh. Zakončyć mierapryjemstva płanujecca ŭskładańniem kvietak da Čarnobylskaj kaplicy kala carkvy ŭ honar abraza Božaj Maci «Spatoleńnie zahinułych», raźmieščanaj pobač z parkam.

• 0
• 0
• 0
• 0
• 0
• 0
• 0
• 0