«Hazpram» płanuje pavialičyć u 2013 hodzie tranzit hazu praź Biełaruś na 25%

Abjom transparciroŭki hazu «Hazpromam» u režymie tranzitu pa terytoryi Biełarusi ŭ 2013 hodzie moža skłaści da 60 młrd. kubamietraŭ. Pra heta havorycca ŭ materyjałach da hadavoha schodu akcyjanieraŭ AAT «Hazprom».

Takim čynam,

zapłanavany abjom transparciroŭki hazu praź Biełaruś na nastupny hod na 25% bolšy, čym abjom mierkavanaha tranzitu ŭ 2012 hodzie.

Hiendyrektar «Biełtranshazu» Uładzimir Majoraŭ u sakaviku 2012 hoda ŭ intervju karparatyŭnamu časopisu «Hazprom» paviedamiŭ, što tranzit hazu praz terytoryju Biełarusi ŭ 2012 hodzie miarkujecca na uzroŭni 48 młrd. kubamietraŭ (na 4 młrd. kubamietraŭ bolš, čym u 2011 hodzie).

«U pryncypie tranzitnyja mahutnaści hazapravoda Jamał — Jeŭropa składajuć 33 młrd. kubamietraŭ, a hazatranspartnaj sistemy AAT „Biełtranshaz“ — kala 30 młrd. kubamietraŭ. Adnak sistema „Biełtranshazu“ vykarystoŭvajecca tolki na 50%, što abumoŭlena nizkim zapytam na haz u krainach — spažyŭcach rasijskaha pryrodnaha hazu. Na ŭnutrany rynak u 2012 hodzie my płanujem pastavić 21,5 młrd. kubamietraŭ hazu. Biełaruskaja ekanomika pastupova adnaŭlajecca, i joj treba bolš hazu. Akramia taho, rostu pastavak hazu budzie sadziejničać i značnaje źnižeńnie jaho zakupačnaj cany (z 306 da 166 dołaraŭ za 1 tys. kubamietraŭ)», — adznačaŭ Majoraŭ.

Ciapier na razhlad hadavoha schodu akcyjanieraŭ «Hazproma» siarod inšaha vyniesieny dahavor, zhodna ź jakim «Biełtranshaz» u 2013 hodzie akazvaje pasłuhi pa transparciroŭcy hazu ŭ režymie tranzitu pa terytoryi Biełarusi ŭ abjomie nie bolš jak 60 młrd. kubamietraŭ, a «Hazprom» apłačvaje pasłuhi pa transparciroŭcy hazu pa mahistralnych hazapravodach na ahulnuju hraničnuju sumu 570 młn. dołaraŭ ZŠA.

Akramia hetaha,

na razhlad vynosicca dahavor, u adpaviednaści ź jakim «Hazprom» pradaje, a «Biełtranshaz» kuplaje ŭ 2013 hodzie haz u abjomie nie bolš jak 23 młrd. kubamietraŭ na ahulnuju hraničnuju sumu 4,1 młrd. dołaraŭ ZŠA.

U kancy listapada 2011 hoda «Hazprom» kupiŭ 50% akcyj «Biełtranshazu» za 2,5 młrd. dołaraŭ, davioŭšy svaju dolu ŭ pradpryjemstvie da 100%. Uzamien Biełaruś atrymała na hety hod skidku na haz i padpisała kantrakt na pastaŭki hazu ŭ 2012–2014 hadach. Siaredniehadavaja cana ŭ 2012 hodzie składzie 165,6 dołara za tysiaču kubamietraŭ. Pry hetym «Hazprom» pryniaŭ rašeńnie pierajmienavać kampaniju «Biełtranshaz» u «Hazprom transhaz Biełaruś».

U miežach mižuradavaha pahadnieńnia ab umovach kupli-prodažu akcyj i dalejšaj dziejnaści AAT «Biełtranshaz» «Hazprom» abaviazaŭsia maksimalna zahruzić hazapravody, raźmieščanyja na terytoryi Biełarusi. Pa mahistralnych trubapravodach, jakija prachodziać pa terytoryi Biełarusi, ažyćciaŭlajucca tranzitnyja pastaŭki rasijskaha pryrodnaha hazu ŭ Kalininhradskuju vobłaść Rasii, Litvu, Ukrainu, Polšču.

• 0
• 0
• 0
• 0
• 0
• 0
• 0
• 0