Na siesii PA ABSIE budzie abmiarkoŭvacca situacyja ŭ Biełarusi

Delehaty XXI siesii Parłamienckaj asamblei ABSIE, jakaja adkryvajecca siońnia ŭ Manaka, abmiarkujuć u liku inšych pytańniaŭ situacyju ŭ Biełarusi.

Na siesii buduć zasłuchany dva prajekty rezalucyi pa Biełarusi. Adzin ź ich prezientuje biełaruskaja parłamienckaja delehacyja na čale z namieśnikam staršyni Pałaty pradstaŭnikoŭ Nacyjanalnaha schodu Viktaram Huminskim.

Jak paviedamiŭ 25 červienia śpikier nižniaj pałaty biełaruskaha parłamienta Uładzimir Andrejčanka, aficyjnaja rezalucyja «tyčycca raźvićcia novych vidaŭ enierhietyki». «Druhaja rezalucyja — suprać nas, jana padrychtavana brytanskimi parłamientaryjami, maje adnabakovy i tendencyjny charaktar. My chočam, kab jana nie była pryniata», — zajaviŭ Andrejčanka.

Nahadajem, prajekt alternatyŭnaj rezalucyi byŭ raspaŭsiudžany 27 červienia sakrataryjatam PA ABSIE.

Dakumient rekamienduje admovicca ad praviadzieńnia ŭ Biełarusi čempijanatu śvietu pa chakiei 2014 hoda, kali ŭłady nie vyzvalać usich palitźniavolenych.

Rezalucyja taksama zaklikaje aficyjny Minsk pavažać viaršenstva zakonu, svabodu ŚMI i pieramiaščeńnia, spynić pieraśled aktyvistaŭ niezaležnych prafsajuzaŭ i pravaabaroncaŭ, dazvolić praviadzieńnie mižnarodnaha rasśledavańnia infarmacyi ab katavańniach u turmach, viarnucca da razhladu zajavak na rehistracyju partyi «Biełaruskaja chryścijanskaja demakratyja» i pravaabarončaha centra «Viasna», jakim nieadnarazova ŭ hetym admaŭlali.

Pavodle źviestak sakrataryjata Parłamienckaj asamblei, suaŭtarami prajekta stali bolš jak 60 parłamientaryjaŭ z 21 dziaržavy.

Hety prajekt rezalucyi ŭžo prakamientavaŭ staršynia vierchniaj pałaty biełaruskaha parłamienta Anatol Rubinaŭ. Vystupajučy 29 červienia na zakryćci siesii Savieta Respubliki, jon skazaŭ: «Zachad praciahvaje palityku nacisku i sankcyj u dačynieńni da našaj krainy. Čarhovuju antybiełaruskuju rezalucyju jeŭrapalityki padrychtavali da razhladu na XXI siesii PA ABSIE. <…> Takija pravakacyjnyja dziejańni patrabujuć ad nas nie tolki spakoju i vytrymki, ale i aktyvizacyi i ŭzmacnieńnia pracy na mižparłamienckich i mižnarodnych placoŭkach».

U PA ABSIE ŭvachodziać 320 parłamientaryjaŭ z 55 krain Jeŭropy, Centralnaj Azii i Paŭnočnaj Amieryki. Asambleja daje płatformu dla mižparłamienckaj dypłamatyi, viadzie nazirańnie za vybarami i ŭmacoŭvaje mižnarodnaje supracoŭnictva dla vykanańnia abaviazacielstvaŭ pa palityčnych, ekanamičnych i ekałahičnych pytańniach, a taksama pa biaśpiecy i pravach čałavieka.

• 0
• 0
• 0
• 0
• 0
• 0
• 0
• 0