Dzie jany, našyja Navalnyja? Piša Pavieł Sieviaryniec.
- …I kaža im: idzicie za Mnoju!
Zrablu vas łaŭcami
ludziej.
Jevanhielle
pavodle Maćvieja 4:19
Biełaruś pavoli spłyvaje ŭ sieciva.
Ludskoje sumoŭje, naviny, knihi, haziety, nadvorje, karysnyja parady i razumnyja dumki, cikavaści i cikavostki, dy i sam čas biełarusa ŭsio bolš i bolš zabłytvajecca ŭ nieabdymnaj, šmatmoŭnaj, poŭnaj vybranych znakaŭ, ulubionych miełodyj, znajomych i novych abliččaŭ, paduładnaj adnamu tolki dotyku palcaŭ prastory. A jana, hetaja prastora, štodnia vykałychvaje z donnaj kałamućciu, padchoplivaje dy vyciahvaje na pavierchniu jašče nie viadomyja čałaviectvu bliskučyja cudy i strachaludstvy samaj hłybokaj u śviecie biełaruskaj hłybini.
Mienavita ŭ siecivie naŭpaŭniej uspłyvajuć biełaruskaja zasiarodžanaść i chitramudraść, zajzdraść i pakryŭdžanaść, pryhažość i letuciennaść, ahulnaja mlavaść i abyjakavaść da žyćcia.Biaskoncyja vodaraści vysłoŭjaŭ dy vyjavaŭ u siabroŭskich stužkach, hronki biezymiennaha i biespradmietnaha hnievu ŭ kamientarach, kiłatony tutejšaj bałotnaj tvani — i nikoli nie bačanyja na našaj presnavodnaj sušy (nie błytać z sušy) hłybakadumnyja salonaści… Staradaŭnija siadziby Bieraściejščyny (sa zdymkami), pružanskija plotki (z padrabiaznaściami), tutejšyja košty (dzie paśla kožnaje ličby — ooo! — kryki nuloŭ)… I kali ŭ navakolnych kałhasach usio jašče vyrašajuć abjava ŭ rajoncy, chatniaja telefonija dy radyjo ABS, dyk u pieravažna maładziovaj kamiendzie bolšaść abo «Ukantakcie», abo na internet-hulniach, abo na sajtach sumnieŭnaha źmiestu.
Sieciva imhnienna, čujnymi pozvami, adhukajecca na toje, što sapraŭdy chvaluje biełaruski narod, chvala narastaje, pieratvarajecca ŭ vał — i ludskoje mora raptam uskipaje vakoł vypadkovaha videa ci huku, jakija traplajuć siońniašniaj Biełarusi ŭ serca.
Ulotki i nalepki — užo tolki dapamožnyja sihnały. Biełaruskija maŭklivyja akcyi daviali mahutnaść płyniaŭ, narodžanych u sacyjalnych sietkach; dyk heta letaś, a z toj pary Bajnet jaŭna pašyryŭsia. Jeŭrapiejskija akcyi i arabskija viosny miljonami klikaŭ za ličanyja dni mianiajuć ułady i łady žyćcia. Navat Rasija, da jakoj uvohule ŭsio tuhavata dachodzić, narod jakoj viečna biezmołvstvujet — narešcie zakipieła praź sieciva paśla ŭsio toj ža sfalšavanaj «parłamienckaj kampanii».
Adkaz na biaśsiłaść «staroj apazicyi» — try-dabł-ju.Havaraščaja hałava «kandydata ŭ deputaty», katory vystupaje pa abłasnoj televizii za ŭsio dobraje i suprać usiaho kiepskaha, nikomu nie cikavaja. A voś videa, kolki ludziej nasamreč nahami zajšło da «vybarčych urnaŭ» 23 vieraśnia ŭ paraŭnańni z aficyjnymi dadzienymi «kamisijaŭ», sieciva parvie.
Padčas niešmatlikich masavych akcyjaŭ biełarusy pavalna, posiedam siadziać u necie.Samy paśpiachovy palityčny lidar apošniaj kampanii, Sańnikaŭ — kandydat u prezidenty ad internet-sajta. Najbolš rozhałasnyja biełaruskija prajekty apošnich časoŭ razhortvajucca praz «kantakt», «ju-ciub», mulciki dy filmy, skačanyja na asabisty kampjutar. Z demahrafičnym źmianšeńniem kolkaści moładzi, z zakručvańniem hajek i adjezdam vialikaj kolkaści praca-zdolnych za miažu ŭ biełaruskaha ruchu, pa vialikim rachunku, zastaŭsia adziny resurs dla pašyreńnia — klipy, supołki dy akcyi, nakiravanyja na źbirańnie dy vyvad aktyŭnych anłajnieraŭ u žyćcio.
Adziny praryŭ, mahčymy zaraz u parłamienckaj kampanii 2012, — heta kali miljony biełarusaŭ daviedajucca praŭdu pra fakty falsifikacyi, vykładzienyja tysiačami vidavočcaŭ bajkotu ŭ net.U Biełarusi, dzie piać miljonaŭ karystalnikaŭ i sto tysiačaŭ błohieraŭ, tolki praź sieciva možna parazić zło ŭ takich maštabach: tut uvachod nie tolki dachaty, z dryžačym ad falšu hołasam: «Vybary!..» — ale i ŭ asabisty pakoj da kožnaha druhoha biełarusa.
I biełaruskaść, i svaboda, vycieśnienyja z realnaści, zasialajuć sieciva. I ŭ Biełarusi, i ŭ voli zaraz našmat bolš ahulnaha ź niabačnaściu, umoŭnaściu, pavietranaściu netu, čym siońniašniaj rečaisnaściu.
Heta — patencyjał. Mahčymaści vieści i jevanhielizacyju, i biełarusizacyju, i hramadzianskuju adukacyju, i palityčnuju ahitacyju — biasprykładnyja.Naviedvalnaść niezaležnych navinavych sajtaŭ suvymiernaja z absiahami aficyjnych ŚMI — pryčym jak na nacyjanalnym, tak i na miascovym uzroŭniach. I mahčymaść dać biełarusu ačomacca, uśviadomić siabie tym, kim jon jość, jak ni paradaksalna — najbolšyja ciapier mienavita tut.
Niaŭłoŭnaje elektramahnitnaje pole internetu — asnova alternatyvy prymusova padpisanym hazietam, čornym betešnym dy rasiejskim teleskryniam, viečna ciopłym ad siadzieńnia načalnickich zadoŭ kresłam na rajvykankamaŭskich naradach, ijerarchijam orhanaŭ i kantrolaŭ, pracoŭnym kantraktam i niaspłačanym kredytam, kolkisłojnym kratam strachu — usioj hruvastkaj i ržavaj šmatpaviarchovaj sistemie kletak režymu.
Dzie jany, našy Piatry i Andrei, łaŭcy čałaviekaŭ?..
Dzie jany, našy Navalnyja?
Znajści i złavić biełarusa, najvialikšaha admysłoŭca ŭ majsterstvie chavacca ŭ bulbu!...
Hałoŭnaje — nie zabłytacca ŭ siecivie samim.
Bo naša meta — nie «raskrucić» siabie, nie raspalić jašče bolšuju nianaviść da Łukašenki, a vyciahnuć z mora strachu, padmanu i ŭsieahulnaj chłuśni jak maha bolš jašče žyvych ludziej, jakija ŭrešcie źmieniać volaj i vieraj abličča hetaj ziamli…
Tak, jak było paŭsiul — ź lohkim, luboŭnym podycham niabačnaha i niaŭłoŭnaha Śviatoha Ducha.
Ciapier čytajuć
Pamierła 39-hadovaja eks-palitźniavolenaja Hanna Kandracienka. U kałonii ŭ jaje znajšli rak, ale nie vyzvalili31
Kamientary