U horadzie-pabracimie Minska Ejndchovienie rastuć duby, pasadžanyja ŭ honar źnikłych biełarusaŭ
16 vieraśnia tam projdzie cyrymonija ŭšanavańnia.
16 vieraśnia – 13 hadoŭ, jak źnikli Viktar Hančar i Anatol Krasoŭski. U hety dzień u Ejndchovienie (Niderłandy) adbudziecca cyrymonija ŭšanavańnia pamiaci hetych biełarusaŭ.
Čatyry hady tamu tut pry ŭdziele municypalnych uład u centry Ejndchoviena, jaki z 1995 hoda źjaŭlajecca horadam-pabracimam Minska, byli pasadžany 4 duby ŭ pamiać pra źnikłych Juryju Zacharanku, Viktaru Hančaru, Anatolu Krasoŭskamu, Dźmitryju Zavadskamu.
U niadzielu na akcyi vystupić udava biźniesmiena Iryna Krasoŭskaja, deputat parłamienta Niderłandaŭ Jan-Marynus Virsma i inšyja. Paety Leo Miesman i Pit van den Boom začytajuć svaje vieršy, pryśviečanyja źnikłym biełarusam.
Padčas cyrymonii budzie taksama začytany vierš Uładzimira Niaklajeva “Pamiaci źnikłych”, napisany śpiecyjalna da hetaj daty.
U datyčnaści da źniknieńnia Anatola Krasoŭskaha i Viktara Hančara padazrajecca šerah byłych i dziejučych vysokapastaŭlenych čynoŭnikaŭ.
Uładzimir Niaklajeŭ. Pamiaci źnikłych
Niama vas siarod miortvych i žyvych.
Vy na ziamli nie dažyli da śmierci.
Pakinuŭšy i rodnych, i čužych,
vy prosta źnikli, jak źnikaje viecier.
A my žyviom, bo treba žyć dalej,
kab zrazumieć, jak doraha my płacim
za ŭsio –
i što za ŭsio najdaražej
mahiły,
nad jakimi možna płakać…
Kamientary