Lidar mižnarodnaj arhanizacyi «Małady front» (Čechija) Dźmitryj Daškievič etapavany ŭ kałoniju № 20 u Mazyry. Pra heta BiełaPAN paviedamiła namieśnik staršyni arhanizacyi Nasta Pałažanka.
Pra toje, što Daškieviča etapavali ź Viciebskaha śledčaha izalatara pa miescy adbyvańnia pakarańnia, Pałažanka daviedałasia 19 vieraśnia. Adnak u Viciebskim SIZA admaŭlalisia paviedamić, kudy nakiravany Daškievič.
«Siońnia my z advakatam abzvońvali kałonii i naviedali departamient vykanańnia pakarańniaŭ (DVP), dzie nam skazali, što Daškievič adpraŭleny ŭ kałoniju № 20. U pryncypie, takim čynam DVP adreahavaŭ na naš zapyt dvuchtydniovaj daŭnaści ab tym, kali i kudy budzie adpraŭleny Daškievič. Heta značyć, jany da apošniaha ciahnuli z adkazam i adkazali, kali Dźmitryja ŭžo pieraviali», — paviedamiła Pałažanka.
Jana adznačyła, što paśla prybyćcia ŭ mazyrskuju kałoniju Daškievič budzie źmieščany ŭ karancin. «Zvyčajna ŭ karancin nie dachodziać listy, i adtul ničoha nie prychodzić. U kožnaj kałonii karancin svoj, kolki Dźmitryj tam budzie, nieviadoma.Naprykład, paśla etapu ŭ kałoniju ŭ Horkach Daškievič prama ŭ karantynie trapiŭ u štrafny izalatar», — skazała Pałažanka.
28 žniŭnia Hłybocki rajonny sud na zakrytym vyjaznym pasiadžeńni ŭ kałonii № 13 rajcentra pryznaŭ Daškieviča vinavatym u «złosnym niepadparadkavańni patrabavańniam administracyi papraŭčaj ustanovy» (č.1 art. 411 KK) i prysudziŭ jaho da hoda pazbaŭleńnia voli. U termin pakarańnia ŭklučany čatyry miesiacy, jakija apazicyjanieru zastavałasia adbyć u kałonii pa pieršym kryminalnaj spravie.
U kałonii Hłybokaha lider «Maładoha frontu» adbyvaŭ pakarańnie pa kryminalnaj spravie, raspačataj u kancy 2010 hoda. Napiaredadni apošnich vybaraŭ prezidenta, 18 śniežnia 2010 hoda, Daškieviča i jaho tavaryša pa «Maładomu frontu» Eduarda Łobava zatrymali ŭ Minsku pa abvinavačvańni ŭ źbićci dvuch mužčyn. U sakaviku 2011 hoda Daškievič byŭ asudžany da dvuch hadoŭ pazbaŭleńnia voli ŭ kałonii ahulnaha režymu. Pradstaŭniki apazicyi i pravaabaroncy rascanili aryšt Daškieviča i Łobava, asudžanaha da čatyroch hadoŭ pazbaŭleńnia voli, jak previentyŭnuju mieru pa «začystcy» aktyvistaŭ apazicyi napiaredadni vybaraŭ. Mižnarodnyja pravaabarončyja arhanizacyi pryznali Daškieviča i Łobava palityčnymi viaźniami.
Kamientary