TBM nanosić kropkavyja ŭdary

Hramadskaje abjadnańnie «Tavarystva biełaruskaj movy imia Franciška Skaryny» (TBM) źviarnułasia ŭ Kanstytucyjny sud, Minski harvykankam i ŭ prakuraturu horada Minska ŭ suviazi ź niežadańniem kiraŭnictva staličnaha handlovaha centra «Karona» vykarystoŭvać biełaruskuju movu ŭ afarmleńni pradpryjemstva i infarmavańni hramadzian. Pra heta paviedamiŭ BiełaPAN staršynia TBM Aleh Trusaŭ.

Pavodle jaho słoŭ, z prapanovaj da kiraŭnictva handlovaha centra «Karona» vykarystoŭvać biełaruskuju movu ŭ dziejnaści centra źviarnulisia jak hramadzianie, hetak i TBM. U adkazie kiraŭnika staličnym filijałam TAA «Tytuń‑inviest» «Handlovy centr «Karona» Valeryja Pałynkova staršyni TBM zaznačajecca, što kiraŭnictva pradpryjemstva vybrała ruskuju movu «dla vizualnaha afarmleńnia handlovaha centra «Karona» i pradastaŭleńnia hramadzianam infarmacyi ab tavarach i pasłuhach z metaj stvareńnia spažyŭcam maksimalna zručnaha ažyćciaŭleńnia pakupak».

Jak zajaviŭ A.Trusaŭ, kiraŭnik handlovaha centra, vidać, pierabłytaŭ krainu svajho pražyvańnia i vybraŭ ruskuju movu, zabyŭšysia, što biełaruskuju, zhodna z aficyjnymi źviestkami, nazvali svajoj rodnaj movaj 74% nasielnictva krainy, u tym liku 500 tysiač čałaviek, jakija nie źjaŭlajucca pradstaŭnikami aŭtachtonnaj nacyjanalnaści. Voś čamu, upeŭnieny kiraŭnik TBM, nieabchodna ŭkazvać takim kiraŭnikam, jak V.Pałynkoŭ, ab nieabchodnaści vykarystańnia ŭ ich pradprymalnickaj dziejnaści jak minimum dźviuch dziaržaŭnych moŭ (biełaruskaj i ruskaj) pa prykładzie takich viadomych brendaŭ, jak «Reno», «Samsunh» i «Nieskafe».

Na dumku A.Trusava, kiraŭnik handlovaha centra «zbłytaŭ palityku z handlem, bo z ekanamičnaha punktu hledžańnia prymianieńnie biełaruskaj movy pašyraje kolkaść pakupnikoŭ i spryjaje pavieličeńniu prybytku». «Vidavočna, što pytańnie prybytkovaści centra nie vielmi chvaluje jaho kiraŭnictva. Voś čamu my źviarnulisia ŭ dziaržaŭnyja struktury, kab čynoŭniki patłumačyli Pałynkovu jaho miescaznachodžańnie i zaniepakojenaść kiraŭnika dziaržavy stanam dziaržaŭnaj biełaruskaj movy, — padkreśliŭ staršynia TBM. — My nie suprać ruskaj movy, adnak kali ŭ dziejnaści luboj ustanovy abo pradpryjemstva całkam ihnarujecca biełaruskaja mova, heta źnievažaje nacyjanalnyja pačućci hramadzian Biełarusi».

U zastaŭcy vykarystany plakat Uładzimiera Krukoŭskaha

• 0
• 0
• 0
• 0
• 0
• 0
• 0
• 0