Upieršyniu astranomy adkryli planetu pa‑za Soniečnaj systemaj, jakaja nahadvaje Ziamlu i na jakoj patencyjna mohuć isnavać umovy, spryjalnyja dla žyćcia.
Planetu znajšła hrupa z 11 eŭrapiejskich astranomaŭ. Planeta, paznačanaja jak 581 c, krychu bolšaja za Ziamlu i na joj mohuć być temperatury, što robiać mahčymymi isnavańnie vady ŭ vadkim stanie.
Adnak zorka Gliese 581, vakoł jakoj krucicca planeta, značna mieńšaja, słabiejšaja i chaładniejšaja za Sonca i zaličvajecca da h.zv. čyrvonych karlikaŭ. Zorki hetaha typu vypramieńvajuć słabaje, čyrvanavataje śviatło, adnak ich «praciahłaść žyćcia» daŭžejšaja za zorki typu Sonca.
Gliese 581 ź planetaj znachodziacca na adlehłaści 20,5 śvietłavych hod ad Ziamli — jak na kaśmičnyja adlehłaści dyk vielmi blizka.
Adkryćcio było vykanana pry dapamozie teleskopu Eŭrapiejskaj astranamičnaj abservatoryi ŭ Čyli. Specyjalnaja aparatura analizuje pamiechi ŭ roznych dyjapazonach śviatła, što vypramieńvajecca zorkami. Mienavita na padstavie hetych pamiechaŭ i ŭstaloŭvajecca isnavańnie addalenych planetaŭ.
Adkrytaja planeta 581 c pryblizna ŭ piać razoŭ ciažejšaja za Ziamlu. Pakul nie viadoma, ci maje jana skalisty charaktar, jak Ziamla, ci heta ladovy šar, pakryty vadoj. U pieršym vypadku jana była b niedzie ŭ 1,5 razy bolšaja za našuju planetu, a ŭ druhim — jašče bolšaja.
581 c abaračajecca vakoł zorki na vielmi blizkaj arbicie — adno abaračeńnie zajmaje ŭsiaho 13 dzion (Ziamli 365 dzion). Hravitacyja na jaje pavierchni prykładna ŭ 1,6 razy bolšaja za ziamnuju.
Na planecie musić być pavietra, chacia niemahčyma pakul vyznačyć jaho skład. Na dumku vynachodnikaŭ, temperatura na pavierchni planety moža vahacca ad 0 da 40 hradusaŭ C. Kali heta tak, na planecie moža być žyćcio ziamnoha typu.
Usie planety, adkrytyja da hetaha času, byli dla žyćcia albo nadta haračyja, albo nadta chałodnyja, albo byli prosta hazavymi šarami, padobnymi da Jupitera.
Zorka Gliese 581, što znachodzicca ŭ suzorji Vahaŭ, nadta słabaja, kab jaje možna było ŭbačyć biez teleskopu.
Videa z novaj planetaj možna pabačyć tut
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary