Упершыню астраномы адкрылі плянэту па‑за Сонечнай сыстэмай, якая нагадвае Зямлю i на якой патэнцыйна могуць існаваць умовы, спрыяльныя для жыцьця.
Плянэту знайшла група з 11 эўрапейскіх астраномаў. Плянэта, пазначаная як 581 c, крыху большая за Зямлю i на ёй могуць быць тэмпэратуры, што робяць магчымымі існаваньне вады ў вадкім стане.
Аднак зорка Gliese 581, вакол якой круціцца плянэта, значна меньшая, слабейшая i халаднейшая за Сонца i залічваецца да г.зв. чырвоных карлікаў. Зоркі гэтага тыпу выпраменьваюць слабае, чырванаватае сьвятло, аднак іх «працягласьць жыцьця» даўжэйшая за зоркі тыпу Сонца.
Gliese 581 з плянэтай знаходзяцца на адлегласьці 20,5 сьветлавых год ад Зямлі — як на касьмічныя адлегласьці дык вельмі блізка.
Адкрыцьцё было выканана пры дапамозе тэлескопу Эўрапейскай астранамічнай абсэрваторыі ў Чылі. Спэцыяльная апаратура аналізуе памехі ў розных дыяпазонах сьвятла, што выпраменьваецца зоркамі. Менавіта на падставе гэтых памехаў і ўсталёўваецца існаваньне аддаленых плянэтаў.
Адкрытая плянэта 581 c прыблізна ў пяць разоў цяжэйшая за Зямлю. Пакуль не вядома, ці мае яна скалісты характар, як Зямля, ці гэта лядовы шар, пакрыты вадой. У першым выпадку яна была б недзе ў 1,5 разы большая за нашую плянэту, a ў другім — яшчэ большая.
581 c абарачаецца вакол зоркі на вельмі блізкай арбіце — адно абарачэньне займае ўсяго 13 дзён (Зямлі 365 дзён). Гравітацыя на яе паверхні прыкладна ў 1,6 разы большая за зямную.
На плянэце мусіць быць паветра, хаця немагчыма пакуль вызначыць яго склад. На думку вынаходнікаў, тэмпэратура на паверхні плянэты можа вагацца ад 0 да 40 градусаў C. Калі гэта так, на плянэце можа быць жыцьцё зямнога тыпу.
Усе плянэты, адкрытыя да гэтага часу, былі для жыцьця альбо надта гарачыя, альбо надта халодныя, альбо былі проста газавымі шарамі, падобнымі да Юпітэра.
Зорка Gliese 581, што знаходзіцца ў сузор’і Вагаў, надта слабая, каб яе можна было ўбачыць без тэлескопу.
Відэа з новай плянэтай можна пабачыць тут
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі2
Каментары