Miaśnikovič damaŭlajecca pra biełaruska-indyjskija biznes-adnosiny

Najbolšuju cikavaść Biełaruś vykazvaje da partniorstva ź indyjskimi dziełavymi kołami ŭ pramysłovaści, farmaceŭtycy, mietałurhii, enierhietycy, śfiery vysokich technałohij.

Tut svaju pradukcyju pradstavili bolš jak 60 biełaruskich kampanij. Miaśnikovič adznačyŭ, što ciapier bolš za tysiaču indyjskich kampanij budujuć svoj biźnies u Biełarusi. Kiraŭnik urada vykazaŭ upeŭnienaść, što ŭžo ŭ niedalokaj pierśpiektyvie ich stanie bolš. Jon rastłumačyŭ, u čym pieravahi pracy na biełaruskim rynku, i zajaviŭ, što ŭrad stvoryć kamfortnyja i vyhadnyja ŭmovy dla biźniesu Indyi ŭ Biełarusi.

«Biełaruś — nadziejny ekanamičny partnior i dobry most pamiž Jeŭropaj i Jeŭrazijaj, — adznačyŭ Miaśnikovič. — Z ulikam hetaha my prapanujem indyjskamu biźniesu peŭnyja prajekty».

Premjer taksama ŭziaŭ udzieł u pracy biełaruska-indyjskahabiźnies-forumu ŭ Ńju-Deli.

«My prapanoŭvajem stvarać sumiesnyja pradpryjemstvy ŭ Indyi ŭ halinach, dzie biełarusy majuć pryznany vopyt vytvorčaści, technałohii i nou-chau. My akažam pry hetym vyhadnuju inviestycyjnuju padtrymku», — padkreśliŭ Miaśnikovič.

U Indyi ŭžo stvorany sumiesny zavod pa absłuhoŭvańni karjernych samazvałaŭ BiełAZ. Ciapier indyjskim partnioram prapanoŭvajecca ŭsia liniejka hetych mašyn hruzapadymalnaściu ad 50 da 450 ton.

Biełaruś prapanoŭvaje Indyi supracoŭnictva ŭ halinie vytvorčaści hruzavych aŭtamabilaŭ i aŭtobusaŭ MAZ i hatova ŭdzielničać u sumiesnym pradpryjemstvie pa vypusku hetaj techniki i jaje servisnym absłuhoŭvańni. A taksama moža prapanavać sistemu mašyn pad poŭny technałahičny cykł apracoŭki pradukcyi raślinavodstva (zbožžavyja, kukuruza, rys i inšyja kultury).

Michaił Miaśnikovič zaklikaŭ pašyryć prysutnaść indyjskaha biźniesu na biełaruskim rynku.

U pryvatnaści prem'jer-ministr prapanavaŭ supracoŭnictva ŭ budaŭnictvie hidraelektrastancyj, madernizacyi bujnych naftachimičnych pradpryjemstvaŭ, udzieł u pryvatyzacyi i pašyreńni mahutnaściaŭ «Hrodna Azotu».

Asablivaja ŭvaha była nadadziena partniorstvu ŭ farmaceŭtyčnaj śfiery. Farmaceŭtyčny rynak Biełarusi aceńvajecca prykładna ŭ 700 młn. dołaraŭ. U AEP jon składaje prykładna 10 młrd. dołaraŭ i nie mienš jak 50% ad hetaha abjomu — impart. «Inviestary, jakija pryjduć u Biełaruś z hetymi prajektami, stanuć pieršymi ŭ hetym vysokadachodnym siehmiencie», — padkreśliŭ Miaśnikovič.

Prem'jer-ministr taksama prapanavaŭ indyjskim biźniesmienam mahčymaść inviestavańnia ŭ Baranavickaje bavaŭnianaje abjadnańnie. «Z prycełam na jomisty rynak Mytnaha sajuza my realizujem prajekt pa stvareńni industryjalnaj zony na bazie Baranavickaha bavaŭnianaha abjadnańnia, jakoje źjaŭlajecca adnym z najbujniejšych vytvorcaŭ tekstylnaj pradukcyi ŭ Jeŭropie i SND», — zajaviŭ jon.

Miaśnikovič źviarnuŭ uvahu na toje, što

siońnia abjom uzajemnaha handlu pamiž Biełaruśsiu i Indyjaj składaje paŭmiljarda dołaraŭ.

Prem'jer-ministr zajaviŭ, što Biełaruś hatova da vykarystańnia samych sučasnych form inviestavańnia — ad stvareńnia zamiežnych źmiešanych kampanij da kancesijnych pahadnieńniaŭ. «U Biełarusi jeŭrapiejskaje zakanadaŭstva, jakoje harantuje ŭsie pravy inviestaram, — skazaŭ Miaśnikovič. — Zaprašajem indyjski biźnies inviestavać u Biełaruś. Pryjarytetnyja prajekty atrymajuć biesprecedentnyja lhoty — amal poŭnaje vyzvaleńnie ad padatkaŭ na pieryjad akupnaści inviestycyj».

Viačasłaŭ Budkievič, BiełaPAN.

• 0
• 0
• 0
• 0
• 0
• 0
• 0
• 0