Siońnia, 26 krasavika, na siadzibie BNF adbyłasia pres‑kanferencyja zajaŭnikaŭ sioletniaha «Čarnobylskaha šlachu».
Siońnia, 26 krasavika, na siadzibie BNF adbyłasia pres‑kanferencyja zajaŭnikaŭ sioletniaha «Čarnobylskaha šlachu». Viktar Ivaškievič va ŭstupnym słovie skazaŭ, što zamiest tatalnych začystak ułada abrała taktyku «podleńkaha škodnictva». Ivaškievič mieŭ na ŭvazie aryšt hukaŭzmacnialnaj aparatury, a taksama toje, što ludziej prymusili iści vulicaj Surhanava, dzie išli ramontnyja darohi.
Siabra PBNF Juraś Ziańkovič paviedamiŭ, što ŭsich zatrymanych učora praź niekalki hadzinaŭ adpuścili, uziaŭšy adbitki palcaŭ i sfatahrafavaŭšy. Pavodle Ziańkoviča narakańniaŭ na abychodžańnie ŭ RUUSie ad zatrymanych nie było.
Staršynia Partyi BNF Vincuk Viačorka adznačyŭ, što mety akcyi byli dasiahnutyja. Jon skazaŭ: «Vidavočna, što vuličny patencyjał apazycyi zastajecca vielmi vialikim. Mianie paradavała šmatlikaść akcyi, paradavała, što asnoŭnuju masu skłała moładź, jakaja hatovaja iści na ryzyku. Kryŭdna, što adziny niezaležny telekanał, jaki tranślujecca ŭ Biełarusi, — «Eŭrańjus», — praihnaravaŭ «Čarnobylski šlach». Mnie padavałasia, što milicyjanty praz zuby strymlivali siabie, kab nie pačać nikoha źbivać i zatrymlivać. Dumaju, što ŭ hetym vialikaja zasłuha pamočnika dziaržsakratara ZŠA Devida Kramera».
Anatol Sidarevič adznačyŭ, što biełarusy časta zajmajucca samajedztvam, što datyčyć vuličnych akcyjaŭ: «U Maskvie źbirajecca 200‑300 čałaviek, i jany padymajuć šum na ŭsiu Eŭropu! U nas ža, kali prychodzić 5 tysiač, to akcyja ličycca niaŭdałaj. Ja zadavoleny ŭčorašniaj akcyjaj. Mahu śmieła skazać, što nie pačuŭ ad moładzi nivodnaha maciuka, nivodzin udzielnik nie dychnuŭ na mianie alkaholem. Heta nia moža nia radavać. Adzinaje, čaho ja bajaŭsia, — heta duraści i pravakacyjaŭ uładaŭ. Kali my išli pa Surhanava, dzie pravodzilisia ramontnyja raboty, ja bajaŭsia, kab nie paŭtarylisia padziei 17 kastryčnika 1999 hodu, ale ŭsio było dobra».
Naprykancy pres‑kanferencyi zajaŭniki paviedamili, što źbirajucca abskardžvać dziejańni milicyi ŭ sudzie. Ziańkovič da taho ž budzie abskardžvać svoj učorašni aryšt.
Kamientary