Biełaruś šostaja na eŭračempijanacie pa papsie

Śpiavak ź Biełarusi zaniaŭ šostaje miesca na piaćdziesiat pieršym konkursie «Eŭrabačańnia», jaki sioleta prachodzić u stalicy Finlandyi, Chelsynkach.

Jak i pradkazvałasia, pieršaje miesca na spabornictvie adyšło śpiavačcy z Serbii Maryi Šaryfavič. Druhoje zaniaŭ humarnoje travesty Vierka Siardziučka z Ukrainy. Na trecim miescy akazaŭsia rasiejski prajekt «Sieriebro».

Biełaruś addała pieršuju pazycyju pradstaŭnikam Rasiei, druhoje — Siardziučcy, treciaje — Małdovie.

Kałduna pastavili na pieršaje miesca Ŭkraina, Rasieja i Izrail. Jon taksama trapiŭ u dziasiatku ŭ bolšaści małych centralna- i ŭschodnieeŭrapiejskich krainaŭ ad Hrecyi da Iślandyi.

Jak i ŭ minułyja hady, krainy pieravažna addavali hałasy svaim susiedziam. Najbolš heta prajaŭlałasia ŭ byłoj Juhasłavii, SSSR i Ŭschodniaj Eŭropie. Taksama imihranty ŭ roznych krainach masava addavali hałasy krainam svajho pachodžańnia. Tamu Partuhalija prahałasavała za Ŭkrainu, Irlandyja — za Litvu.

Vierka Siardziučka taki prapiajała «Raša, hudbaj» zamiest zaćvierdžanaha «łaša tumbaj», što pa-manholsku aznačaje «ŭźbityja viarški». Alaksandar Cichanovič, jaki kamentavaŭ kancert na BT, na hetaje chulihanstva aburana zaŭvažyŭ: chiba možna adnoj krainie tak na druhuju śpiavać?

21-hadovy Kałdun vykanaŭ pieśniu «Work Your Magic» na vieršy Karena Kavalerana i muzyku Filipa Kirkorava.

Dźmitry Kałdun staŭ pieramožcam Nacyjanalnaha televizijnaha muzyčnaha prajektu «EŭraFest» pavodle vynikaŭ finalnaha hała-kancertu «Daroha na «Eŭrabačańnie».

U minułyja hady ŭdzielniki «Eŭrabačańnia» ad Biełarusi — duet «Alaksandra i Kanstancin», Anžalika Ahurbaš i Palina Smołava — u finał nie prabivalisia.

Pieśnia Kałduna nie vyłučałasia ni navinoj, ni kalarytam. Praŭda, u biełaruskaha vykanaŭcy jość hołas i plastyka, čym moža pachvalicca nia kožny ŭdzielnik eŭrapopšoŭ.

Varta adznačyć, što ŭ bolšaści eŭrapiejskich krainaŭ konkursu «Eŭravizii» nie nadajecca takoha značeńnia, jak u Biełarusi. Hetak. u Polščy jaho tranślacyju zvyčajna hladzić mizerny pracent telehledačoŭ. Dyj papsa nie zajmaje takoha miesca ŭ žyćci, jak u Biełarusi, dzie nacyjanalnyja rok-vykanaŭcy zabaronienyja da tranślacyi pa hałoŭnych radyjokanałach.

Šostaje miesca prateže Filipa Kirkorava — heta najbolšaje dasiahnieńnie Biełarusi za čatyry hady ŭdziełu ŭ konkursie. Dziakujučy jahonamu papadańniu ŭ dziasiatku najlepšych, na nastupnym konkursie, jaki adbudziecca ŭ Serbii, śpiavak z našaj krainy budzie vystupać adrazu ŭ finalnym kancercie.

• 0
• 0
• 0
• 0
• 0
• 0
• 0
• 0