Kali ŭ kadar trapić staličny budynak na vulicy K. Marksa, 38, kvartał na Braniavym zavułku, Dom uradu, vas u lepšym vypadku paprosiać vydalić zdymak.
Adzin znajomy na minułym tydni sfatahrafavaŭsia na fonie rezidencyi prezydenta. Jana znachodziłasia praz darohu, dy ščodra pieralivałasia architekturnaj padśvietkaj. Zdymak rabiŭsia kala kino «Pijaner». Tym nia mienš achoŭnik paprasiŭ padyści maładych ludziej da siabie, vietliva prapanavaŭ pakazać kadry ličbavika i vydalić zdymki na fonie budynku. Potym jon znoŭ ža vietliva paprasiŭ pradjavić dakumenty i staranna zapisaŭ usie dadzienyja ŭ blaknot. Achoŭnik byŭ u formie, ale nazvacca admoviŭsia. Niaŭžo ŭ kožnym z nas specsłužby bačać patencyjnaha złačyncu?
Aficyjna
Pres‑sakratar Słužby biaśpieki prezydenta Alaksiej Husieŭ paćvierdziŭ najaŭnaść zabarony na fatahrafavańnie. Jon kaža, što zabarona dziejničaje ŭ adpaviednaści z Zakonam pra dziaržachovu:
— Isnuje śpis abjektaŭ, jakija zdymać nielha. Heta rezidencyja prezidenta, Dom uradu dy niekatoryja inšyja. Majecca na ŭvazie zdymka bujnym planam, jakaja dazvolić vyjavić asablivaści niasieńnia słužby, padychody da budynku, što znachodzicca pad dziaržachovaj. Supracoŭnik specsłužby pry fakcie zdymki pavinien daviedacca, u jakich metach jana viadziecca, jon maje prava prahledzieć kadry na ličbaviku i paprasić ścierci tyja, na jakich bačny bujny plan achoŭvajemaha abjektu. Taki paradak. Ludzi staviacca da hetaha z razumieńniem. Nijakich pretenzijaŭ da nas dahetul nie było. A toje, što nie ŭstalavana znakaŭ zabarony fatahrafavańnia kala specbudynkaŭ, mahčyma, heta našaja niedapracoŭka.
Tym nia mienš, fatahrafavać na vialikaj adlehłaści (200‑300 metraŭ), pad vuhłom, pa słovach spadara Alaksieja, možna biez abmiežavańniaŭ. A dla žurnalistaŭ, jak zapeŭniŭ pradstaŭnik SPB, uvohule niama nijakich pieraškodaŭ, patrebna tolki ŭzhadnieńnie.
Kamentar jurysta
— Kaniečnie, heta pierahib. Zabarona fatahrafavańnia publičnaj rezydencyi, zadavalnieńnia publičnaha intaresu vychodzić za ramki isnujučaha zakonapałažeńnia. Heta prosta supiarečyć zdarovamu sensu. Sapraŭdy, status abjekta, jaki znachodzicca pad achovaj, maje na ŭvazie prapuskny režym, nazirańnie, zabaronu na praviadzieńnia masavych mierapryjemstvaŭ bližej za 50 metraŭ, ale heta nia maje nijakaha dačynieńnia da ažyćciaŭleńnia lubicielskaha fatahrafavańnia.
Treba adznačyć, što biaśpieka prezydenta zabiaśpiečvajecca ŭsimi pravavymi j finansavymi mahčymaściami. Uzmocnieny ŭsie miery biaśpieki da krajnaści, navat tyja, u jakich niama nieabchodnaści i heta, darečy, pracuje na źnižeńnie imidžu hłavy dziaržavy, — kaža spadar Hary.
Kali niekatoryja krainy Ŭschodniaj Eŭropy adkryvajucca śvietu i intehrujucca ŭ sučasny eŭrapiejski asiarodak ź jahonymi sacyjalnymi, pravavymi i demakratyčnymi standartami (naprykład, u Prazie isnujuć ekskursii dla turystaŭ u prezydencki pałac), biełaruskaje hramadztva, vyhladaje na toje, viartajecca ŭ atmasferu ŭsieahulnaj pilnaści i padazronaści z boku specsłužbaŭ.
Kamientary