№ 34 (155), 13 — 19 śniežnia 1999 h.
Vočaradź k prezidzientu i łancuhi milicyi
6 čałaviek usio ž prabralisia za łancuhi, pieradali petycyi dy viarnulisia žyvyja j zdarovyja
Sapraŭdny piarepałach vyklikała biaskryŭdnaja inicyjatyva biełaruskaj apazycyi zanieści petycyi-patrabavańni Łukašenku. Užo za paru hadzinaŭ da mierkavanaha prychodu ludziej centar Miensku i asabliva kvartały vakoł prezydencyi byli napoŭnienyja milicyjantami, u dvarach stajali aŭtobusy z amonam. A pałovie na šostuju pierakryli vychad z metro “Kupałaŭskaja” da rezydencyi Łukašenki.
A šostaj ža viečara na chodnikach la Kupałaŭskaha teatru stajała dobrych čałaviek 40 žurnalistaŭ dy prykładna stolki ž aktyvistaŭ apazycyi z petycyjami-patrabavańniami ŭ rukach. Rezydencyju ačeplivali z usich bakoŭ ščylnyja łancuhi z socień “ludziej u błakitnym”, pratačycca praź jakija było niemahčyma.
Ale ŭsio ž pratačylisia. Pakul milicyjanty hladzieli, što budzie rabić natoŭp dy słuchali Bahdankievičavy słovy pra toje, što jon maje prava prynieści petycyju, šparkim bieham da administracyi praśliznuli namieśnik staršyni BNF Aleś Bialacki j supracoŭnik “Viasny-96” Uładzimier Padhoł, pieradali patrabavańni dy viarnulisia žyvyja j zdarovyja. Usiaho ž za viečar pieradać patrabavańni zdoleli šeść čałaviek, u tym liku lider sacyjał-demakrataŭ Mikoła Statkievič.
Vialikaha pudła dali milicyjanty ź vialikaju hrupaju školnikaŭ, čałaviek z 200, jakija razam z nastaŭnicami kročyli na spektakal u Teatar junaha hledača, što znachodzicca jakraz pobač z rezydencyjaj. Milicejskija kardony, zamiest taho, kab rasstupicca, uziali adzin adnoha pad łokci dy stali ŭ stojku. Nastaŭnica musiła raźviarnuć kalonu dy pajści ŭ abchod vulicami Lenina dy Pieršamajskaj, a heta šlach minimum z kilametar.
Alaksiej Šydłoŭski
Ciapier čytajuć
«Ludziej prymušali dumać, što ničoha nikoli nie źmienicca». Chto taki antykamunist Łasła Krasnaharkai, jaki atrymaŭ Nobieleŭskuju premiju pa litaratury?99
Kamientary