Listy ŭ redakcyju
Znoŭ pra rujnavańnie Miensku
Kolki emocyjaŭ było ŭ liście tvorčaj i navukovaj intelihiencyi da premjer-ministra sp.Linha! Ale praź jaho emacyjnaść i nieprafesijnaść ułady lohka «vypuścili paru ŭ śvistok». Takija akcyi — treba aŭtaram lista karystacca dośviedam minuŭščyny — rychtujucca hruntoŭna, z vyznačeńniem kožnaha etapu, vykanaŭcaŭ, z aporaj na lideraŭ.
Pry ratavańni «domu Šmienkiela» na šlachu ad vuł.Kalinoŭskaha, dzie drukavalisia Słavam Dubinkam fotazdymki, da dźviarej u cekoŭskim budynku na Karła Marksa, u jakich pieraniaŭ z ruk u ruki fotaalbom z hruntoŭnymi anatacyjami Zianon Paźniak, byli niekalki čałaviek, kožny ź jakich dobra viedaŭ svaju rolu i dakładna trymaŭsia chranalohii jaje vykanańnia. Ideolahi pabudovy śvietłaj budučyni vymušany byli pahadzicca z prafesijnaj arhumentacyjaj, na što i blizka nielha było spadziavacca niejkich 15 hadoŭ raniej pry źniščeńni Niamihi. «Dom Šmienkiela» staić na svaim miescy, a kupałaŭcam dobra ŭ starym teatralnym budynku na rahu Marksa i Enhielsa.
Prykład sa «Šmienkielem» nie adziny. Tamu i nastupiŭ u pieršaj pałovie 80-ch hadoŭ pierałom u staŭleńni ŭładaŭ da spadčyny, z čaho ŭ siaredzinie 80-ch raspačaŭsia restaŭracyjny ŭzdym.
Na pieršym tydni novaha hodu adbyłasia padzieja, raŭnaznačnaja źniščeńniu Niamihi: zrujnavany reštki muru zabudovy na płoščy Svabody, 19, 21, 23. «Naša Niva» adhuknułasia na hety fakt artykułam. Inšyja navat i blizka nie zaŭvažyli, jak byŭ zabity čarhovy jomisty ćvik u viečka truny histaryčnaha centru Miensku. Tolki i ŭ «Našaj Nivie» pra rujnavańnie skazana niejak budzionna. Kali b redakcyja parupiłasia zazirnuć u abhruntavańnie źniščeńnia taho muru, dyk havorki chapiła b nie na adzin numar. Za słovami «ob aktivizacii rabot po obnovleniju kompleksa domov 19, 21, 23 na pł.Svobody v h.Minskie i nieobchodimosti zavieršienija razborki zakonsiervirovannych konstrukcij kak piervoho samostojatielnoho etapa vosstanovitielnych rabot» nia prosta nieprafesijanalizm biurakratyčnaha murła, jakoje ŭsich naŭkoła trymaje za raschodny materyjał (lahierny pył, kali chočacie) u dasiahnieńni svajoj mety.
Serca balić pra takoje dumać, a pisać i zusim niaznosna. Dyj maŭčać nie vypadaje.
Łuceja Batoryna,
«horad Hrodna, Savieckaja, 8»
Kamientary